Akazeendele Áako Múungu Alikweenda
4
1 Óobu beene béetu, mweéyegile kuluga hali íichwe óokwo mulikuhikiililwa kutuula, mubóne kumunuliza Múungu. Na mazima óokwo mulikukola mútyo. Óobu, nitubasaba no kubatweézela nka nikwo mugume hakuzeendelela mútyo nka nikwo yaatulagiile Omukáma Yeézu. 2 Nimusoomboókelwa emilagi éezo tukabalagila ha obuhicha bwo Omukáma Yeézu.3 Múungu naayeénda mube abaantu abatakatíifu, nikwo okugaamba mutaákuba nimuzila obusiihani. 4 Íimwe mwéena muzitegeke emibili yáanyu, omu butakatíifu na buli óomo aábe ni isima. 5 Mutaákuba na akahagáli nka Abanyamahaánga áabo abatakumumanya Múungu. 6 Omuli áago, omuuntu weéna wéena atamuhenela muzeenzíwe, nali kumubéeha. Nka nikwo ku twaabasoomboóliile no kubahana nka nikwo, bóona áabo abalikukola áago, Omukáma weényini naabeehoólela. 7 Múungu talatweésile kukola obusiihani, náho akatwéeta nka nikwo twiikale omu butakatíifu. 8 Habwéecho, omuuntu weéna wéena óogwo alikugaya ameégeso áaga, takumwáanga omuuntu, náho naamwaánga Múungu óogwo alikubaha íimwe Omwooyo gwoómwe Omutakatíifu.
9 Óobu, tákweendelwa nkokwo tubaandikile íimwe habwo kweendana, ha kuba íimwe mwaáyegesiibwe na Múungu nka nikwo óokwo chilikweendelwa kuzililana engoonzi. 10 Mazima mubakolele mútyo beene baanyu bóona abali omuchaalo chóona cha Makedonia. Óobu nitubasaba beene béetu, mugume hakweendana mútyo. 11 Mube no omwooyo gwo obuhóolo. Omuuntu weéna wéena ataákweetwaalalika omu magaambo ga abaandi, náho akole emilimo ye emikono yoómwe weényini, nko okwo ku twaabalagíile. 12 Áaho nimuba mwaáyoleka akazeendele kaluunzi ha abaantu áabo batali Abakristu. Kaandi timukuba abaantu abo abalikutegeza ebya abaandi.
Okuzoolwa Kwa Abáfwiile Áabo Bakamutegeza Yeézu
13 Íimwe beene béetu, nitweénda musoomboókelwe éebyo ebilaabagwaamo ha Abakristu áabo abáfwiile, mubóne kuchuleela obutaba no obuzune nka abaantu abaandi áabo abatéena okutegeza kwo kuzooka. 14 Íichwe, nitwiikiliza nkokwo Yeézu akafwa, kaandi akazooka. Habwéecho, nitutegeza nka nikwo Múungu naasiindika Yeézu kuzoola no kusuba hamo nabo abaantu bóona áabo abáfwiile bamwiíkiliize.
15 Mbweenu, éebi tulikubasoomboólela ha Chigaambo cho Omukáma Yeézu, nka nikwo íichwe áabo tuchaali tuli abalame, áabo tulaasigalila kuhicha obuchilo bwa weényini alaásuba, mazima titulibeébeembelela áabo abáfwiile. 16 Omukáma weényini alaátuuka kuluga omwiigulu. Nawe alaáhamuka aha buhicha, nawe maléeka mukúlu alyaáhamuka ahi iláka ne echikuli cha Múungu chilyaáhulilwa. Niho bóona áabo abáfwiile bamwiíkiliize Kristu, nibo baliibeembéla omukuzooka. 17 Niho íichwe áabo tuli méeso, áabo twaásigalila, nitusapúlwa hamo nábo omubwíile, tubone kumunyegeza Omukáma ahalugulu. Niho tulaaba hamo náze obucha no obuchiile. 18 Óobu mweétiimbye emiganya ha magaambo áago.