Kweéloonza Ha Chilo Cho Kwiiza Omukáma Yeézu
5
1 Beene béetu, nituleeba nka nikwo tutaákubaandikila habwo obuchilo ne emihaanguko zo kwiiza Omukáma. 2 Kuba íimwe nyini nimusoomboókelwa nka nikwo echilo cho kwiiza kwo Omukáma chilyáaba cho kubagwáamo nko omwíibi óokwo ayiza itúumbi. 3 Obuchilo abaantu balaagaámba báti, “Twiine obuhóolo, kaandi tuli bazima,” áaho niho okusiingaalichwa kulaabeézila. Okusiingaalichwa óokwo kulaabagwaamo, nko obusuungu bwo kweéchuungula óokwo bumwiizila omukázi owe éenda. Omuli áago tibakuchuúngulwa na káti.4 Náho íimwe, beene béetu, echilo éecho tichikubasaanga nko omwíibi, ha kuba íimwe timuli omuunsiimbaazi. 5 Íimwe mwéena na abaana bo omwaangaa, kaandi ba nyémisana. Íichwe twéena tí baantu bo omuchilo nali omuunsiimbaazi. 6 Óobu, tutaákuba nka abaandi áabo balikubyáama otúlo, náho tube méeso no kwiibalilila. 7 Abaantu áabo balikubyáama otúlo, nibalyaáma omuchilo. Kaandi áabo abalikutamiila, nibatamiila omuchilo. 8 Náho ha kuba íichwe na abaantu ba nyémisana, tube no kwiibalilila. Tube no okwiikiliza ne engoonzi, éebyo nibiba nke enchíinzi omu kalezi. Kaandi tumutegeze Múungu kutuchuúngula, niho nituba nkokwo tuzweele enchíinzi omu mutwe. 9 Múungu talatutoólize íichwe abone kutusiingaalicha ha chihulumuko choómwe chiháango, náho akatutooza tubone kweenaankula obuchuúnguzi ha muhaanda gwo Omukáma wéetu Yeézu Kristu. 10 Óogwo niwe akafwa habwi íichwe, tubone kutúula hamo náze, obuchilo tuchili abalame nóobu obuchilo twaáfwiile. 11 Mbweenu, mweétiimbye emiganya no kuhweelana nka nikwo ku mulikukola.
Entuungwa Éezo Neegasa Ha Abeekiliza
12 Mbweenu beene béetu, nitubasaba mubazilile isima áabo abalikwaágalala hachifu habwíimwe, no kubeétegeeleza íimwe ha buhicha bwo Omukáma Yeézu no kubahana. 13 Mubazilile isima liháango bwooli no kubazilila engoonzi kwiingana ne emilimo yáabo. Kaandi mube no obuhóolo omuli íimwe.
14 Beene béetu, nitubaneembelela, mube nimubahana abaléenga no kubatiimbya áabo abáfwiile emiganya. Kaandi mube nimubatiímbya áabo abatéena amagala no kubeéyomeleza abaantu bóona. 15 Mweémanye nka nikwo omuuntu weéna wéena atamweéhoolela muzeenzíwe obuzilwa kwo obuzilwa. Náho buchiile mube nimukolelana ebizima íimwe no kukolela ebizima abaantu bóona. 16 Mube na amanulilwa buchiile, 17 kaandi musabe obutazila ihelezo. 18 Mube nimumusiima Múungu ahali byóona, ha kuba éebyo nibyo weényini alikweenda hali íimwe omukukwaátana na Yeézu Kristu.
19 Mutagulaaza Omwooyo Mutakatíifu. 20 Kaandi mutabugaya obubáasi,b 21 náho mugageme amagaambo go obubáasi no kuguma omuli áago gali amaluunzi, 22 na mweélige omuli góona áago agali mábi. 23 Múungu weényini óogwo ali wo obuhóolo, abéeze bwooli íimwe omuli byóona. Weényini abeemanye emiganya yaanyu no obulami bwaanyu ne emibili yaanyu, mubóne kuba abatéena ebilegelelo kuhika obuchilo bwo kwiiza kwoómwe Omukáma wéetu Yeézu Kristu. 24 Múungu weényini óogwo alikubalaalika no omweésigwa, náwe naabakolela áago.
Amagaambo Go Kulaga
25 Beene béetu, neechwe mutusabile hali Múungu. 26 Mubaángaluche beene béetu bóona abatakatíifu omukubanyweégela aha ngoonzi ze Echikristu. 27 Niimbakomeenteleza ha buhicha bwo Omukáma Yeézu nka nikwo, olwaandiko óolu mubasomele beene béetu bóona.
28 Embabazi yo Omukáma wéetu Yeézu Kristu, eébe hamo neemwe mwéena.