Kubonwa Kwo Omubisa No Kwiiza Kwo Omukáma Yeézu
2
1 Óobu beene béetu, nitubaandikila habwo okusuba kwo Omukáma wéetu Yeézu Kristu, na nka nikwo tulaakóba hali weényini.a Nitubasaba nka nikwo, 2 mutagoókelwa bwaangu nali kuba ne kweétimwa nka nikwo echilo cho kwiiza Omukáma chaáhikile. Kuba lúundi mwaáhuliize ebisuba éebyo omu mpola bunaanka zo obubáasi, nali zo kwoólekeelela, nali zo olwaandiko óolwo lulikuteékuzwa nka nikwo lulugile hali íichwe. 3 Mteekililizana no omuuntu weéna wéena kubaleétela obugóbya hali choóna chóona, ha kuba echilo éecho tichilihika omukubáanza, chitakabeele ebilo éebyo éebi abaantu béenzi nibamuhiinduka bwooli Múungu, kaandi obuchilo Omubisab óogu naába yaámanyiikeene hali íimwe. Óogwo niwe alaásiingaalichwa butúnu ahamuheleeluko. 4 Weényini talikuúndilana na buli chiintu éecho abaantu nibazila nka nikwo ni múungu nali éecho balikulámya, na alaayeésiingiza kuba omukúlu wa byoona. Kaandi alaaza no kwiikala omuunzu ya Múungu no kweégaamba nka nikwo weényini niwe Múungu.5 Ngási, timukwiizuka nka nikwo kánaabeele ndi hamo neemwe tiindabasoombooliile éebi byóona? 6 Na nimusoomboókelwa éecho echilikumwaángila óobu nyini, abone kubonwa ha buchilo óobwo obulikugasa. 7 Noobu nyini, amagala go bweeseleke go obubisa nigakola emilimo, na nigasigala bweeseleke kuhicha obuchilo óogwo alikugachigilila alaáyihibwáaho. 8 Áaho niho Omubisa óogwo alaasuúlulwa. Náho obuchilo Omukáma Yeézu kaáliiza, alyaámwiita no olwooya kuluga omukánwake, na alyaámusiingaalicha ha mboneko yo kwiiza kwoómwe.
9 Obuchilo bwo kwiiza kwo Omubisa óogwo, aléeza na amagala góona gi Izimu Elikúluc no kukola emanyiso na amahano ge ebisuba. 10 Alaábabéeha ha mihaanda bunaanka bunaanka bóona áabo bali omu muhaanda gwo kubula, ha kuba tibakwiikiliza kwéenda amazima babone kuchuúngulwa. 11 Habwéecho, Múungu naabasiindikila obubéehi obusaagiliize, babone kubwiikiliza óobwo bubéehi. 12 Kuba bóona áabo abalekile kwiikiliza amazima náho bakaba nibeenuliza omubiheno, balyaáchwaáziikwa.
Kweémeelela Bweémi No Kweétegeeleza Ameégeso
13 Náho íichwe, nitweendelwa kumusiima Múungu buchiile habwi íimwe, beene béetu abo mulikuzililwa engoonzi no Omukáma Yeézu. Nitweendelwa kukola tútyo, ha kuba akabatóoza íimwe kuluga ahabubaandizo bwo kuháanga kwoómwe, mubóne kwiinaankula obuchuúnguzi.d Obuchuúnguzi óobwo mubwiinaankwiile ha muhaanda gwo Omwooyo Mutakatíifu óogu naayeza na ha muhaanda gwo kwiikiliza amazima. 14 Múungu akabayeta, kuba mubóne kwiinaankula obuchuúnguzi óobwo ha muhaanda gwe Empola Nzima éezo tukoolekeelela hali íimwe. Yaábayeta kuba mubóne kutulaanila omu ikuzo lyo Omukáma wéetu Yeézu Kristu. 15 Óobu beene béetu, mwiimeelele bweémi no kweétegeza ameégeso áago mkeenaankula, keelaaba na ha kwoólekeelela kwéetu, nali ha nyaandiko zéetu.
16 Isíichwe Múungu yaátuziliile engoonzi, na ha mbabazi yoómwe naatugumagúmya obucha no obuchiile no kutuha itegezo liteekene. Nitumusaba weényini Múungu Táata hamo no Omukáma wéetu Yeézu Kristu nka nikwo, 17 abatiímbye emiganya no kubagumya, kuba mubóne kuhicha kugaamba na kukola góona agali amaluunzi.