Olwaandiko Lwa Kábili Lwa Paulo Ha
Abateesalonike
Empola
1
1 Iinye Paulo, hamo na Silwaanoa na Timoteo. Nitubaandikila íimwe omu ekelezia yo omumuzihwa gwa Teesalonike áabo mumwiikiliize Isíichwe Múungu no Omukáma Yeézu Kristu.2 Embabazi no obuhóolo kuluga hali Isíichwe Múungu no Omukáma wéetu Yeézu Kristu zibe hamo neemwe.
Omuchwaáziiko Gwa Múungu Obuchilo Bwo Kusuba Kwa Yeézu
3 Beene béetu, nitweendelwa kumusiima Múungu buchiile habwi íimwe, ha kuba okwiikiliza kwéenyu nikwoongela bwooli, kaandi engoonzi zaanyu nizizeendelela kwoongela hali buli oómo. 4 Habwéecho nitweébona omu makelezia ga Múungu habwo okweégumya kwéenyu no okwiikiliza kwéenyu óokwo mwiína, omu byaágalazo byóona no okuzugumisibwa óokwo mulikweémela.
5 Áago góona nigamanyisa nka nikwo, omuchwaáziiko gwa Múungu no gwa amazima. Ha muchwaáziiko óogwo íimwe mugasize kwiinaankula obukáma bwoómwe, óobwo mulikwaágalazibwa habwa bwoónyini. 6 Weényini Múungu alaákola amazima. Alaábeehoólela omu kubaágalaza áabo abalikubeéboneela íimwe, 7 no kubabonesa okuhuúmula hamo neechwe íimwe áabo mulikwaágalazibwa. Alaakola áago obuchilo Omukáma Yeézu kaáliiza kuluga omwiigulu, hamo na bamaléeka abo obuhicha bwoómwe 8 omulumuli lwo omulilo. Yeézu niwe alaábeehoólela bóona áabo abatakumumanya Múungu na áabo abatakuzikoondokela Empola Nzima zo Omukáma wéetu Yeézu. 9 Omuchwaaziiko gwáabo gulyáaba okusiingaalichwa kwo bucha no buchiile no kunugwa hala kuluga omuméeso go Omukáma hamo ni ikuzo lyoómwe likulu. 10 Ha chilo éecho weényini kaáleeza naabona kukuzwa omu batakatíifu boómwe, no kukaamalilwa kuluga ha baantu bóona áabo abamwiíkiliize. Kaandi neemwe nimuba omuli áabo, ha kuba okwaátula kwéetu kukeekililizibwa halíimwe. 11 Hali áago nitubasabila buchiile, nka nikwo Múungu wéetu abagase kwiingana no okweetwa kwaanyu, na aha buhicha bwoómwe, ahikiilize amagaambo amazima áago mulikweenda kukola, no kuhikiiliza emilimo yaanyu yoona mizima yo okwiikiliza hali Yeézu. 12 Nitusaba tútyo, tubone izíina lyo Omukáma wéetu Yeézu libe nilikuzwa habwíimwe. Kaandi neemwe mube nimukuzwa habwa weényini. Áaga nigaba nigakolwa habwe embabazi ya Múungu wéetu, ne yo Omukáma wéetu Yeézu Kristu.