Ebilagilo Ha Abahálila Abeekiliza
6
1 Bóona abali iífo yo omugaámba gwo obuhalila, nibeendelwa babazililile isima abakáma báabo, kubonesa izíina lya Múungu na ameégeso géetu galeke kuzúmwa. 2 Abahálila áabo abeena abakáma báabo abali abeekiliza, batabagaya habwo kuba boónyini ni beene báabo omuli Kristu. Náho nibeendelwa kubakolela kuzima, ha kuba áabo abalikubonesa omugaso gwe emilimo yáabo baábeele abeekiliza bazeenzi báabo, kaandi ne enfula záabo.Ameégeso Ge Ebisuba No Obuhite Bwa Mazima
Áago ogeégese no kugakomeenteleza. 3 Kabilaaba omuuntu weéna wéena naayegesa kúundi, na kaandi takukuúndilana na ameégeso ageene obulami áago Omukáma wéetu Yeézu Kristu, nali agatakukuúndilana na ameégeso go kumugomokela Múungu, 4 áaho áaba ayizwiile okweébona. Kaandi takusoomboókelwa echigaambo choóna chóona. Abaantu áabo nibahatikiliza okuhakana okutéena na mugaso habwa amagaambo kanaku. Omuli éebyo nihazuumbukamo ichubi, endwáana, ebizumi, ebiteékulizo bíbi, 5 kaandi nibazeendelela omukweéhakanila okutakuhwa. Abaantu áabo baásiisikeele obweenze, abaábuzilwe amazima. Nibateekuza nka nikwo kugomokela Múungu nigwo muhaanda gwo kubonesa obuhite.
6 Náho amazima, kugomokela Múungu no kuhicha kwiina ibona liháango. 7 Omuunsi éezi, tituleezile na choóna chóona, kaandi titulihicha kulugámo na choóna chóona. 8 Mbweenu, katulaaba twiina ebyookulya ne byo kuzwaala, tuhikwe ne éebyo. 9 Náho abeene etuúnku mpaango yo obuhite, nibaza omubileengeso no okugwaamo, na bityo kubaswa omuluzuumba lwa akahagali keengi ke echifweéla akeena entaambala. Etuúnku éezi nizibatwaálila omubuhuta no kusiingaalichibwa. 10 Okweenda bwooli empilya niyo entabuko ye enaku nyiinzi. Omukuligila bwooli empilya, abaantu abaandi bakunagileene okwiikiliza kwáabo baaza omukutahwa tahwa hala nakwo, no kusaasisa emiganya yáabo habuzune bwiinzi.
Ebikáamo Hali Timoteo
11 Náho íiwe, omuuntu wa Múungu, ogeéluke amagaambo áago. Okulaatile entuungwa enzima omuméeso ga Múungu no kumugomokela, otuúle omukwiikiliza, ozile engoonzi, oóbe no okweégumisiliza hamo ne obufula. 12 Olwaane endwaana nzima ha bwa amazima go okwiikiliza kwéetu, obóne kukwaatilila obulami obwo obucha no obuchiile. Obulami óobwo nibwo waayetiilwe áaho óobu okakúunda omukulahila kwáawe omuméeso ga baalubona béenzi. 13 Omuméeso ga Múungu ogwo alikubitaho obulami ebiintu byoona, na omuméeso ga Kristu Yeézu ogwo akasohoza obubona bwa mazima omuméeso ga Pontio Pilato,a niinkukomeenteleza nka nikwo, 14 okwaatilile ebilagilo éebyo ha kubikoondoókela na otéena kutuúzilwa, kuhicha kaáliiza Omukáma wéetu Yeézu Kristu. 15 Kwiiza kwoómwe nikuba obuchilo óobwo aloongize Múungu. Múungu niwe omugisa, weényini weénka niwe ali kutégeka, niwe Omutégeki wa abatégeki, no Omukáma wa abakáma bóona. 16 Weényini weénka, niwe atalifwa, ayikeele omu mwaangab ogwo omuuntu atakuhicha kugwiílilila héehi. Kaandi tihaliho omuuntu weéna wéena óogwo alamubweene, nali óogwo yaakuhicha kumubona. Isima na amagala biina weényini, obucha no obuchiile. Amina.
17 Balagile abahíte bo omuunsi éezi baleke kweébuga, nali kutegeza obuhite bwáabo bwe éensi éezi, ha kuba óobwo no bwa omwáanya muche. Náho bamutegeze Múungu ogwo alikutuha ebiintu byoona ha bufula bwoómwe, tubone kubikozesa ha manulilwa. 18 Kaandi obalagile bakole ebizima, obuhite bwáabo bube omukukola ebikolwa bizima. Babe no omuganya gwo kusohoza no kuba bweémi hakukobela hamo na abaandi ebiintu byáabo. 19 Ha kukola batyo, nibeeteélaho ensáho ebone kuba oluhazo luzima ha buchilo obulikwiizayo. Bityo nikwo nibeenaankula obulami bwa mazima.
20 Timoteo, ogeékomye kuzima amazima áago oheélwe. Otaákutulaanila omumagaambo áago agatakumugomokela Múungu na agateena kalyo koóna na kóona. Kaandi otaza omukweéhakanila kwo obufweéla, áago abaandi nibageéta nigo amasala. 21 Ha kukwaatilila áago, abaantu abaandi baálekile amazima go okwiikiliza kwéetu.
Embabazi ya Múungu eébe hamo neemwe.