Akazeendele Ha Abeekiliza
5
1 Otachaáhalila omuséeza mukúlu, náho omuneémbelele nka iíso waawe. Abasigazi nabo obaneémbelele nka beende baanyu, 2 abakeékulu nka nyoko, na abahalákazi nka banyaányoko. Ozile oótyo hakugololokelwa omuganya.3 Obe ni isima ha abakazi abakaambwiile áabo abatéena obuzune. 4 Náho omukazi akaambwiile óogwo ayina abaana nali abeézukulu, áabo nibeendelwa beéyege kuhikiiliza obutegeki bwo omumaka gáabo. Kabalaazila batyo, niho nibalihila abazeele báabo ebizima éebyo baabakoliile. Bityo nikwo nichimunuliza Múungu. 5 Omukazi akaambwiile óogwo atéena no omuuntu wo kumuzuna, óogwo áaba naamweésiga Múungu, aguma omu kusaba no kulamiliza echilo na nyemisana abone kuzunwa hali Múungu. 6 Náho óogwo alikwiikala omu bya katóozi, óogwo naába afwiile noobu alikubonekana acháali omulame. 7 Obahe ebilagilo bya amagaambo áago, bateéza kutuúzilwa. 8 Náho omuuntu weéna wéena ogwo atakubeémanya abadugu boómwe, muno muno áabo olula lwoómwe, óogwo naába yaákwóoga okwiikilizakwe, kaandi naába yaaba mubi kusaagáho omuuntu atali omwiikiliza.
9 Omukazi akaambwiile naayikililizibwa kuba omu lubalo lwa abakaambwiile, kaálaaba ayina emyáaka kubaandiza makúmi mukáaga, na kaálaaba ali omukazi ayaaswiilwe no omuséeza oómo weénka.a 10 Aábe omuuntu alikukuzwa kuzima habwe bikolwa byoómwe éebi: aábe alezile abaana boómwe kuluunzi, aábe ayaaziliile obufula abazenyi, aábe ayaayetiilého kuzima ha abatakatíifu ha kwóoza amagulu gáabo, aábe azunile áabo abalikwaágalazibwa, kaandi aábe ayetiilého hakukola ebikolwa byóona ebizima. 11 Náho abakazi áabo abakaambwiile abachili abahalákazi, otabeekililiza kuza omu lubalo, ha kuba akahagáli ko omubili nikabasiínga, nibeénda kuswéelwa kaandi kuchila kweétaho habwa Kristu. 12 Omuli éecho nibaba baayeletela omuchwaáziiko, ha kuba baálekileho endagano yáabo yo kubaanza. 13 Kaandi abahalákazi abakaambwiile nka áabo, nibeeyega entuungwa zo kuba abaléenga, nibabuungeéla buungeéla omumaka ga abaantu. Hamo ne éebyo, baba abateélanisi no kucheécheela omu magaambo ga abaandi, kunu nibagaámba amagaambo kanaku áago gatahikiiliilwe kugaambwa. 14 Óobu, iinye niinyeénda abahalákazi abakaambwiile, babe nibasweélwa, bazaále abaana no kuleeba amaka gáabo, kuba ababisa béetu batabonesa omuhaanda gwo kutugaamba kubi. 15 Niingaámba nntyo, ha kuba abakaambwiile abaandi baámazile kuhiinduka no okukulaatila Izimu Elikúlu.b
16 Kabilaaba omukázi omwiikiliza ali hamo na abakazi abakaambwiile omu badugu boomwe, abazune weényini nyini. Bityo, ekelezia ebone okuleka kulemeelelwa. Niho ekelezia elaaba na omwáanya gwo kuhweela abakazi abaandi abakaambwiile abateena abokubazuna.
17 Abanyaampala áabo abalikweémeelelela ekelezia kuluunzi, bazililwe isima no kukolelwa ebizima,c muno muno áabo abalikwaágalala omukwoólekeelela no omukweégesa. 18 Niingaámba nntyo, ha kuba byaandikilwe omu Maandiko Amatakatíifu biti, “Ente keélikuba nehuulila ebikuumba bye engano, otaziboha omunwa.”d Kaandi chaandikilwe, “Omukozi we emilimo agasilwe omuhe empeéla yoómwe.”e
19 Otalikiliza ebilegelelo habwo omunyaampala we ekelezia, otéena obubona bwa abaantu babili nali básatu.f 20 Náho abanyaampala áabo balikuzeendelela kukola ebiheno, obakáame omuméeso ga abaandi bóona, kuba áabo nabo beétimwe.
Ebikáamo Hali Timoteo
21 Niinkulagila omuméeso ga Múungu, no omuméeso ga Kristu Yeézu na bamaléeka abatooziibwe nka nikwo, oyekomye áago, otalichwaaziika ha bwiila nali kukola echigaambo choóna chóona éecho kweendekeza olubazu lumo. 22 Otalyaánguhiliza bwiila kumuteelaho engalo omuuntu weéna wéena habwe emilimo yo Omukáma, habwo kuba kolaamutaho omuheni omumilimo éezo, iiwe neewe noóba waákoba náze ebiheno byoómwe. Íiwe oyekomye omumwooyo gwaawe, gubone kusigala nigweéla.
23 Kubaandiza óobu, íiwe otanywa améenzi goónka, náho oóbe noónywa ne eviinig nche habwe eenda yaawe na amalwáala áago agakwaágalaza buchiile.
24 Abaantu abaandi, ebiheno byáabo bibonwa habweelu, nabyo ni nko oóti bibeembelela kuzeenda omukuchwaáziikwa kwáabo. Náho abaantu abaandi, ebiheno byáabo biba biíselekile, bisoombooka ahaleéza. 25 Bityo nyini, ebikolwa ebili bizima bibonwa habweelu, na noolu áago ageéselekile ha mwaanya, mazima nigeéza kumanywa ahaleéza.