Olwaandiko Lwa Kábili Lwa Paulo Hali
Timoteo
Obweébeembezi
Olwaandiko óolu lwaandikilwe na Paulo, entumwa wa Yeézu Kristu (1:1-2). Akamwaándikila Timoteo óogwo akaba ali omuhwéezi woómwe wa héehi (1:2-5; 2:1). Paulo akaandika olwaandiko óolu obuchilo ali omu ibóhelo óokwo Ruumi (1:16-17). Akabohwa obuchilo bwo butégeki bwo omukáma Nero. Omumihaanguko éezo, Abakristu bakaba nibaagalazibwa bwooli habwo okwiikiliza kwáabo. Kaandi, Paulo akaba naateekuza nkokwo naayitwa óobu nyini zuba zuba (4:6-8). Obuchilo óobwo, Timoteo akaba ali omwiiboma lya Efeso, óogwo gukaba guli omuchaalo cha Asia (1:18; 4:12-13, 19). Neesana nka nikwo olwaandiko óolu lukaandikwa omu myaaka ya 64-67 kulugiilila okuzaalwa kwa Kristu.
Ensoonga yo kwaandika olwaandiko óolu, ekaba no kumugumya Timoteo abone kuba buligiligi kulaanga Empola Nzima habwo óogwo Yeézu, ayeéyomeleze no kweégumisiliza omu gagumile góona (1:6-8; 2:3-10, 24; 4:2-5). Paulo akamulagila Timoteo nka nikwo, abagaambile Abakristu bo okwo Efeso babe na akazeendele kaluunzi. Bakulaatile kuzima ameégeso áago beéyegile (2:14). Kaandi, naamusoomboólela Timoteo nka nikwo, ayaánge ha amagala góona ameégeso ge ebisuba, ayeégese aga amazima (1:13; 4:2-5). Kaandi, Paulo akaba naayeénda bwooli kumubona Timoteo (1:3-4; 4:9, 21).