Olwaandiko Lwa Kábili Lwa Paulo Hali
Timoteo
Empola
1
1 Iinye Paulo, óogwo Múungu yaayeenzile iinye iimbe entumwa ya Kristu Yeézu mbone kwoólekeelela endagano yo obulami óobwo buli omukweékwaatanisa na Kristu Yeézu. 2 Niinkwaandikila íiwe Timoteo, mwaana waanze we engoonzi.Embabazi no obuhóolo ebikuluga hali Isiichwe Múungu na hali Kristu Yeézu Omukáma wéetu, bibe hamo neewe.
Paulo Naamusiima Múungu No Kumutiibya Omuganya Timoteo
3 Nniimusiima Múungu óogwo ndikugomookela ha muganya gulikwéela, nka baguúku baanze okwo baamugomookiile, kaándikukwiízuka buli kaanya omu kusaba kwaanze kwe echilo na nyemisana. 4 Kaándikwiizuka amaziga gaawe, Nniindígila bwooli kubonana kaandi neewe, kuba mbone kwiízuzwa na amanulilwa. 5 Kaandi, nniinyizuka okwiikiliza kwáawe okutéena obugóbya. Okwiikiliza óokwo, akaba ayinakwo nyokweénkulu, Loisi na nyoko, Eunike. Kaandi nyina obweésige nka nikwo neewe oyinakwo.
6 Aha nsoonga éezo, nniinkwiizukiza nka nikwo, oyenegeze obuhicha óobwo Múungu akakuha obuchilo naakuteeliileho emikono. 7 Kola oótyo, ha kuba Múungu talatuhéele omwooyo gwo obutíini,a náho akatuha gwo obuhicha, ne engoonzi no omuganya gwo kwiibalilila.
8 Mbweenu, otaákuzilila ensoni kwaátula empola zo Omukáma wéetu, nali kuúnzilila ensoni ha kuba iinye ndi omu ibohelo habwa weényini. Náho oyégumye hamo na abáandi omubyaágalalo hamo neenye, habwe éezi Mpola Nzima habwa weényini, kwiingana no obuhicha óobwo olikuháabwa na Múungu. 9 Weényini akatuchuúngula, yaátutooza tube abaantu boómwe abatakatíifu. Talakozile aátyo habwe ebikolwa byéetu, náho akakola habwe ensoonga yoómwe ne embabazi zoómwe. Akatuzilila embabazi éezo omukutukwaátanisa na Kristu Yeézu, buluga butakabaandize obuchilo. 10 Náho óobu, Múungu ayolekile embabazi zoómwe hali íichwe, ha kwiiza kwoómwe Kristu Yeézu Omuchuúnguzi wéetu. Weényini akasiisa amagala go olufu, no kutwooleka obulami óobwo obutéena muhelo, ha muháanda gwe Empola Zoómwe Nzima.
11 Na habwe éezo Mpola Nzima, iinye ntooziibwe kuba omwoólekeelezi, entumwa no omweégesa habwo kwoólekeelela Empola Nzima. 12 Na aha nsoonga ye éebyo, neenye nniinyagalala. Náho tiínkuzila ensoni, aha nsoonga niimmusoomboókelwa óogwo neekiliize. Kaandi iinyetegeeliíze nka nikwo weényini naacheekomya kuluunzi éecho nkaheélezwa kuhicha echilo éecho cho kusuba kwoómwe. 13 Ogeékomye kuzima ameégeso ga mazima go okwiikiliza ne engoonzi za áago waahuliile kuluga hali iinye áago naakweégesize. Oyegese áago kunu oyina engoonzi no okwiikiliza omukukwaátana na Kristu Yeézu. 14 Amazima ge Empola Nzima éezo eheeliizwe hali iiwe, ozeékomye ha buhicha bwo Omwooyo Mutakatíifu ogulikutúula omuli íichwe.
15 Íiwe nosoomboókelwa nka nikwo, abaantu bóona bo omuchaalo cha Asia baánagilana. Omulyáabo balimo Figelo na Hermogene. 16 Niinsaba Omukáma abazilile echiganyizi abaantu be eéka ya Onesiforo, ha kuba entulo nyiinzi akaba naaguhuumuza omwooyo gwaanze. Kaandi, talaánziliile ensoni eminyololyo yaanze. 17 Náho obuchilo yeezile áaha omu chikaali cha Ruumi, akazila obwiila kuundoondela kuhicha yaámbona. 18 Omukáma Yeézu amuzilile Onesiforo okubonesa echiganyizi ha Mukáma Múungu, omu bilo byo omuchwaáziiko. Neewe noosoomboókelwa kuzima, meenzi áago akaankolela omwiiboma lyo óokwo Efeso.