Kuba No Obweéyomeleza Omumilimo Ya Múungu
2
1 Óobu íiwe mwaana waanze, oóbe emaanzi habwe embabazi ezili omukukwaátana na Kristu Yeézu. 2 Amagaambo gi waahuliile áago nkaba nniinyeégesa omuméeso ga baalubona béenzi, áago ogaheéleze abaantu áabo bali abeésigwa, áabo nabo abalikuhicha kweégesa abáandi. 3 Oyégumisilize hamo na abáandi omu byaágalazo, nko omulwaani muzima wa Kristu Yeézu. 4 Táliho omulwaanila ngoma óogwo ali omuundwaana yi ichúmu, akamala akaza omumagaambo ga amabonwa agatakuhililana no omulimógwe. Kaálaakola aátyo, takumunuliza mukamáwe ayaamutiilého kuba omulwaani. 5 Nóobu omwiiluki alikwiiluka omu mizaano yo kusiíngaangana, tiyaákuhicha kubonesa kuháabwa omukáko nko omusiingi kayaakwiiluka kwoónka, kaálaaguluka ebilagilo byo omuzaano. 6 Kaandi, omulimi óogwo alikulima aha chífu, óogwo agasize kuba owaámbele ha kwiinaankula omugabo gwo omwéezo. 7 Timoteo, ogateékuze bwooli amagaambo áaga ndikukugaambila. Omukáma naakuha obuhicha bwo kusombookelwa buli chiintu.8 Omwiizuke Yeézu Kristu wo olugaanda lwo omukáma Daudi.a Weényini akazooka kuluga omubafwíile. Éezo niyo Empola Nzima yi ndikwoólekeelela. 9 Habwe éezo Mpola, iinye nniinyagalala no kubohwa nko omuzilwa. Náho echigaambo cha Múungu tichikubohwa. 10 Ha bwéecho, nniinnyegumisiliza ebigaambo byóona habwa abaantu áabo abatooziibwe na Múungu, kuba boónyini nabo beenaankule okuchuúnguka óokwo kuli omuli Kristu Yeézu, hamo ni ikuzo lya buchiile.
11 Obusoomboozi óobu no bwo kweésigwa nka nikwo,
“Katulaaba twaáfwiile hamo na Kristu,
neechwe tulyaátuula hamo náze.
12 Katulaaba nitweegumisiliza,
nitutégeka hamo náze.
Katulaamwooga weényini,
náwe naatwoóga.
13 Kabilaaba íichwe tituli abeésigwa hali weényini,
weényini asigala ali omweésigwa,
habwo kuba weényini áaba owa amazima, takuhicha kweéyaanga weénka.”
Ebilagilo Bya Múungu Ha Muzáana Óogwo Ayetegeeliize Wa Múungu
14 Obeezukize abeekiliza amagaambo áago, no kubahana omuméeso ga Múungu, baleke kweéhakanila habwa amagaambo kanaku. Empaka éezo tiziina mugaso, náho nizibasíisa áabo abalikuzihuliiliza. 15 Oyeyomeleze omukweégesa ha buteéka echigaambo cha amazima, na bityo oyeyoleke nka nikwo okuundiilwe omuméeso ga Múungu nko omukozi woómwe we emilimo óogwo atéena katókoozi ko kumukoza ensoni.
16 Náho, oyélige na abaantu áabo abalikugaamba amagaambo mábi agatéena kályo, agatakweendwa na Múungu, habwo kuba áago nigabatwaalilila abaantu omubusaago bwo kubakola baleke kumweétaho Múungu. 17 Ameégeso ga abaantu áabo nigasaambaáza obuhuta nke echigogo chizuunzile éecho chilikulya omubilib. Omuli áabo halimo Himenayo na Fileto. 18 Áabo baáhabile bwooli, baálekileho amazima ha kugaamba nka nikwo okuzooka kwa abáfwiile kukamala kubaho. Ha kweégesa éebyo, nibahabisa okwiikiliza kwa abaantu abáandi bunaanka. 19 Náho abaantu áabo abalikweémeelela bweémi, ni nko oluhazo olugumile óolwo olutiilwého na Múungu. Na ahalugulu yo óolwo luhazo hatiilweho olumanyiso óolwo lwaandikilweho nka nikwo,
“Omukáma Múungu naabasoomboókelwa abali boómwe.”c
Kaandi,
“Omuuntu weéna wéena óogwo alikwiíyeta nka nikwo weényini no owo Omukáma Múungu, aleke obuzilwa.”
20 Omuunzu empaango bilimo ebiseme bya buli lugaanda, tibilimo ebye ezaháabu ne bye efeeza byoónka, náho kaandi bilimo ne ebi ibúumba ne ebye emiti. Ebíindi bikozilwe ha bwi isima, ne ebíindi ne ebiseme kwoónka. 21 Mbweenu, kabilaaba omuuntu yeéyeza ha kweéliga hala na amagaambo áago góona go obuzilwa, naába echiseme echaáyelizwe ha bwi isima, echilikumugasa Omukáma, echiloongizwe habwa buli mulimo ogwo oguli muluunzi.
22 Oyélige na ameelu go obusigazi ha kulígila abakázi, oóbe wo kuzeendelela omubugololoki, omukwiikiliza, omu ngoonzi no omubuhóolo. Ozeendelele omuli áago, hamo na bóona áabo abéeta Omukáma ha muganya gulikwéela. 23 Oyaánge obuhakani bwe echisilu ne echimanyi, ha kuba noosoomboókelwa nka nikwo óobwo buzuumbukilamo endwaana. 24 Kaandi, tichikweendelwa omuzáana wo Omukáma kuba omukuúngani. Náho aábe omweégumisiliza, omuchuleezi ha baantu bóona, no omuuntu óogwo alikusombookelwa kweégesa. 25 Naayeendelwa aábe naabahana ha buchuléezi abaantu áabo abatakwiikililizana náze. Hamo lúundi Múungu yaakaábabonesa kutamwa ebiheno byáabo no kusombookelwa amazima. 26 Niho, amasala gáabo gakaábasubiile, bachuungúlwe kuluga omumutego gwi Izimu Elikúlu ogubakwáasile, babone kuba nibakola éebi ayeénda weényini.