Obuzilwa Omubilo Bya Aha Muhelo
3
1 Óobu, osombookelwe echigaambo éechi nka nikwo, ebilo bya aha muheleeluko halaaba no obuchilo bwe enaku ezisaagiilize. 2 Obuchilo óobwo, abaantu balaaba abalikweéyeenda boónyini, balaaba abeena ameelu ge empilya, balaaba abalikweésiingiza, nibaba abeena ihagi, nibaba abalikulyogooza Múungu, tibakubakoondoókela abazeele báabo, abatéena kusiima, na abali abazilwa. 3 Kaandi, tibalizila ngoonzi na muuntu weéna wéena, tíbalyeenda kulamulwa, balaaba abanyeegani, tibaliba no kwiibalilila, balaaba enduluhe, tíbalyeenda ebizima, 4 balaaba enobi, balaaba ne echipaampo, na balaaba abahelani be echisilimu. Balaaba abalikweenda ebya katóozi kuchila okumwéenda weényini Múungu. 5 Abaantu áabo ahéelu nibasusana nko oóti na abaantu abalikumugomookela Múungu, náho omumiganya yáabo nibaánga obuhicha bwa Múungu. Abaantu be entúungwa éezo, oyélige hala nabo.6 Omuli áabo nyini, balimo áabo abalikutaahamo ha nsoonga mbi omu maka ga abaantu, no kubabeeha abakázi abalikwoóloba emiganya. Abakázi áabo abalemeeleelwa ne emigugu ye ebiheno, abatwaalilizibwa no oluhagali lwa buli kazeendele. 7 Abakázi áabo abaleengesa kweéyega buchiile, náho balemwa kuhika ha kusombookelwa amasala ga amazima. 8 Abaantu áabo nibahakana amazima ga Múungu, nka Yane na Yambre,a nkokwo bakasiingaangana na Musa. Abaantu nka áabo baásiisikeele omu kuteékuza kwáabo no kwáanga amazima go okwiikiliza kwéetu. 9 Náho tibalihicha kuzeendelela bwooli, ha kuba obufweéla bwáabo bulaásoombooka ha baantu bóona, nka nikwo byaabéele hali Yane na Yambre.
Ebilagilo Bya Paulo Hali Timoteo
10 Náho íiwe, okulaatiile kuzima ameégeso gaanze, engeso záanze, ensoonga záanze, okwiikiliza kwaanze, okweéyomeleza kwaanze, 11 engoonzi záanze no okweégumisiliza kwaanze. Noomanya nka nikwo abaantu óokwo baanhikiíliile no kuunnyagalaza, obuchilo naabeele ndi óokwo omu byaalo bya Antiokia, Ikonio na Lisitira. Kaandi, noomanya nka nikwo neegumisilize omuunnáku éezo zóona, no Omukáma yaánchuúngula kuluga omuli áago góona. 12 Mbweenu, bóona áabo abalikumwiíkiliza Kristu Yeézu no kweenda kutúula ha kugomookela Múungu, balaaba nibaáywa. 13 Náho abakola ebiheno na ababéehi balaázeendelela no kusaagiliza omukuba abaheni bwooli, nibaba abalikubéeha abáandi no kubéehwa.
14 Náho íiwe, osigale omumagaambo áago waayegesizwe no kwiiza kugeékiliza nka nikwo na aga amazima. Óobu olame omuli áago, ha kuba noobasoomboókelwa áabo abakweégesize. 15 Kuluga aha bucheche bwáawe, ogasoomboókiilwe Amaandiko Matakatíifu. Amaandiko áago gakuheele amasala kuhicha obóne kubonesa obuchuúnguzi ha muháanda gwo kumwiikiliza Kristu Yeézu. 16 Amaandiko góona Matakatíifu gaandikilwe ha bwoólekeelelezi bwo obuhicha bwa Múungu. Nago nigagasa ha kweégesa amazima, na hakubahana abaantu babone kulekela obuzilwa, kubahabula kabalikuhaba, no kuboólekeelela okugololoka omuméeso ga Múungu. 17 Amaandiko áago nigakola omuuntu alikumutegeza Múungu aábe yaábeele buligiligi bwooli, abone kukola buli mulimo oguli muluunzi.