4
1 Omuméeso ga Múungu no omuméeso ga Kristu Yeézu, óogwo alibachwaaziíka abali abalame na abáfwiile, habwo kuba naayiza kutégeka nko omukáma, nniinkulagila éebi: 2 Oyolekeelele echigaambo cha Múungu. Oóbe buligiligi kukola oótyo obuchilo bwoóna bwóona, ha buchilo óobwo obulikukuúndilana no omuli óobwo obutakukuúndilana. Oóbe noohana abaantu, oóbe noobachaahukila no kubatamo echihika, obaneémbelele. Oóbe nooyegesa ha bweegumisiliza bwóona. 3 Aha nsoonga, nibwiíza obuchilo óobwo abaantu balaaba nibaánga ameégeso ga amazima. Baleékaangwa kukulaatila okuligila kwáabo kwoónka, na bityo, nibatoóza abeégesa béenzi bo kubeégesa áago balikweenda bagahulile. 4 Balaáleka kuhuliliiza amazima, na balaákulaatila emigani ze ebisuba za kala. 5 Náho íiwe, ozile okwiibalilila omuli byóona, oyégumisilize ebyaágalazo, okole obuheéleza bwo kukúmuucha Empola Nzima, ozile kuluunzi omubuzáana bwáawe bwóona.6 Niinkugaambila áago, ha kuba enságama yaanze eli héehi kuheélezwa nke echitáambo che evíini ahi itaámbilo.a Omwáanya gwaanze gwo kufwa gweelilila héehi. 7 Nkalwaana endwaana nzima, oluzeendo nduhikize, kaandi mbiíkile amazima go okwiikiliza. 8 Obuchilo óobu, Omukáma Yeézu ambiikiile ensiimi ya amazima, áago weényini niwe omulamuzi owa amazima aleéza kuziímpa echilo cho kusubakwe. Tíwe iinye nyeénka, náho na abáandi bóona áabo abalikutegeza aha ngoonzi.
Okusaba Kwa Paulo Habwa Timoteo
9 Timoteo, oteho echihika, oyize hali iinye bwaangu, 10 ha kuba Dema akaansíga. Weényini akanulilwa amagaambo ge éensi, yaalamula kuzeenda omu chaalo cha Teesalonike. Náwe Kresike azeenzile omuchaalo cha Galatia, na Tito azeenzile omuchaalo cha Dalimatia. 11 Luka weénka niwe asigeele hamo neenye áaha. Mbwéenu, koóleeza kunu, oyize na Mariko, ha kuba naagasa kuba omuhwéezi waanze omu buheéleza bwa Múungu. 12 Nkasiindika Tikiko azeénde óokwo omwiiboma lya Efeso. 13 Koóleeza, oyize ne ebebo yaanze éezo nkasiga hali Karipo okwo omwiiboma lya Turoa, hamo ne ebitabu, muno muno éebyo ebye eémpu.
14 Alekisanda óogwo omuhéesi wa masaba, ankoliile kubi muno. Omukáma alaámusubiza kwiingana ne ebikolwa byoómwe. 15 Neewe kaandi, oyélige náze, ha kuba akaba hakanisa bwooli ameégeso géetu.
16 Omu kweétoonganila kwaanze ha ntulo yo kubaanza, talabeeleho nóobu oómo ogwo ayaayemeeliile olubazu lwaanze, bóona bakaannagilana. Niinsaba Múungu aleke kubapeetela echiheno éecho. 17 Náho Omukáma akaba ali hamo neenye, akaambonesa obuhicha bwo kwoólekeelela Empola Nzima yóona, kubabonesa Abanyamahaánga bóona babone kuhulila. Akanchuúngula omu lufu nko kuluga omukanwa ke entále. 18 Niinsoomboókelwa nka nikwo naazeendelela kuunchuúngula iinye kuluga omubuzilwa bwoóna bwóona no kuunyékomya kuzima kuhicha naáhika omubukáma bwoómwe bwo omu igulu. Ikuzo liina weényini Omukáma obucha no obuchiile! Amina.
Amagaambo Go Kulaga
19 Omwaángaluche Akila na mukazíwe Prisila, hamo na abeéka ya Onesiforo. 20 Erasto weényini akasigalila omu chaalo cha Koliinto. Torofimo náwe nkamusiga omwiiboma lya Mileto, akaba ali omulwéele. 21 Óobu, ozile bwiila kwiiza butakahikile omuhaanguko óogwo ogwe embého. Eubulo, Pude, Lino, na Klaudia, hamo na beene béetu bóona, nibakwaangalucha.
22 Omukáma aábe hamo no omwooyo gwáawe. Embabazi yoómwe eébe hamo neemwe mwéena.