Abeégesa Be Ebisuba
4
1 Óobu, Omwooyo Mutakatíifu naagaámba habwéelu atéena kuseleka nka nikwo, omubilo bya ahamuheleeluko, abaandi balyaánagilana okwiikiliza kwa amazima, no kweétegeeleza emyooyo ya ababéehi, na ameégeso ga amazimu.a 2 Ameégeso áago, galyaágaambwa na ababéehi, nibagaamba ebigaambo byo obugóbya, ne ebiteékelezo bye emiganya yáabo tekusoomboókelwa ebizima ne ebíbi, ni nke ebisiliizwe ha mulilo. 3 Áabo balaábaangila abaantu nka nikwo baleke kuswéela, no kubalagila obutalya ebyookulya éebyo Múungu akabihaanga bibone kwiinaankulwa omu kusiima, na abaantu abeekiliza na abalikusoomboókelwa amazima. 4 Buli chihaángwa chóona cha Múungu ni chiluunzi, na tichiliho choóna chóona cho kwáangwa kachilikuba chinaankwiilwe omukusiima, 5 ha kuba cheelizwe ha chigaambo cha Múungu, ha kusaba omukusiima.Omuhálila We Entuungwa Nzima Wa Kristu Yeézu
6 Obeezukize beene béetu bóona omuli Kristu ameégeso áaga, áaho noóba omuhalila we entuungwa nzima wa Kristu Yeézu. Kaandi nooba waákula kuluunzi omumazima go okwiikiliza kwéetu no omumeégeso amazima áago íiwe okulaatiile. 7 Íiwe oyaánge éezo emigani za abakeékulu ba kala elikugaamba ebigaambo bitakukuúndilana ne bye ediini, náho oyemanyiize kutúula nkokwo alikwéenda Múungu. 8 Nichisoombooka chíti, “Okweémanyiiza okwo omubili nikugasa kache kwoónka, náho oyeyomeleze kugomokela Múungu, kwiina omugaso omuli byóona, ha kuba éechi nichitubonesa endagano yo obulami óobu no óobwo obulikwiiza.” 9 Obusoomboozi óobu no bwo kweésigwa no kwiinaankula na bóona. 10 Éechi nicho chilikutuleételela nitwaagalala no kukola emilimo ha bweéyomeleza, kuba nitumutegeza Múungu ali omulame, Omuchuúnguzi wa abaantu bóona, muno muno hali áabo abalikwiikiliza.b
11 Amagaambo áago, ogalagize no okugeégesa. 12 Omuuntu atalikugaya íiwe habwo kuba ochili omusígazi, náho oóbe emanyiso aha beekiliza omu kagaambile, akazeendele, no omuungoonzi, ha kwiikiliza no obugololoke. 13 Kuhika kiindeezayo óokwo, oyekomye omukusomela abaantu Amaandiko Matakatíifu, kaandi oyolekeelele no kweégesa. 14 Otaleka kukolesa obuhicha obwo buli omuliiwe bwi wahéelwe aha bubáasi,c na ahakuteelwáaho engalo na abanyaampala be ekelezia. 15 Ogateékuze áago, oyikwaate omuli áago, okuzeendelela kwáawe kubone kusoombooka na abaantu bóona. 16 Oyekomye akazeendele kaawe na ameégeso gaawe. Olame omukukola oótyo, habwo kuba koólikukola áago, noyechuúngula íiwe nyini na áabo abalikukuhuliiliza.