Entuungwa Za Abeémeelelezi Be Ekelezia
3
1 “Omuuntu óogwo alikuligila emilimo yo kuba omwiimeelelezi we ekelezia, óogwo naalígila omulimo muzima.” Obusoomboozi óobu no bwo kweésigwa. 2 Mbweenu, ha mwiímeelelezi we ekelezia, ni lwaampaka aábe omuuntu óogwo atéena kutuúzilwa. Aábe iíba wo omukázi oómo weénka, aábe ayina okwiibalilila, kaandi aábe enyetegeelezi, male aábe omuuntu óogwo alikukuzibwa, omufula, no omuuntu óogwo alikumanya kweégesa. 3 Ataákuba omutamiizi, ataákuba omusaámbe, aábe omuteékaani atali omulwaani. Kaandi ataákuba alikutwaálalika empilya. 4 Aábe omuuntu alikweétegeleza kuzima eéka yoómwe, óogwo alikusoombookelwa kweégesa abaanábe omu kazeendele ko kumukoondoókela no kumuha isima. 5 Kabilaaba omuuntu naalemwa kwiítegeeleza kuzima eéka yoómwe weényini, naahichaho aáta kwiimeelelela abeekiliza be ekelezia ya Múungu? 6 Kaandi, ataákuba omuuntu óogwo achuungukile zuba zuba óobu nyini, ataákwiiza akeébuga. Okweébuga óokwo nikumukola achwaaziíkwe nkokwo lyaachwaázikiilwe Izimu Elikúlu. 7 Náho, naahikiililwa aábe omuuntu óogwo alikugaambwa kuzima na abaantu aba ahéelu, ateéza kugóoka no kuhatila omumutego gwi Izimu Elikúlu.Entuungwa Za Abahalila Be Ekelezia
8 Abahalila be ekeleziaa nabo, babe abeétegeeliize kuluunzi, bataákuba nyaandimi ibili, bataákuba abatamiizi, bataákuba abeena etuúnku mbi yo kubonesa empilya. 9 Náho, babe abaantu áabo nibeekomya ha mazima agasuulwiilwe go okwiikiliza kwéetu ha muganya gulikwéela. 10 Áabo nabo, babaánze bagemwe batakataándikile emilimo. Na kabalaabonekana bateena kutuúzilwa, niho bakole emilimo éezo yo okuheéleza. 11 Bityo nyini, nabo baanyinéenzu báabob bazile okwiíbalilila, bataákuba abanyeegani, babe no kwiibalilila na kaandi babe abeésigwa omuli byóona. 12 Abahalila be ekelezia babe no omukázi oómo weénka, na babe nibeetegeeleza kuluunzi abaana báabo na abaandi abali omumaka gáabo. 13 Áabo abalikukola emilimo yo obuheéleza kuzima, nibaba ne ensiimbililo nzima. Áaho nibaba no obugimi buháango bwo kwaátula empola zo okwiikiliza kwáabo omuli Kristu Yeézu.
Amazima Go Okwiikiliza Kwéetu
14 Niinkwaandikila empola éezo, nóobwo niintegeza kwiiza hali íiwe bwaangu. 15 Náho kiindeélililwa, obóne kusoombookelwa áago agalikuhikiililwa abaantu kukola omuunzu ya Múungu. Abaantu áabo nibo ekelezia ya Múungu ali omulame, ne ekelezia niyo oluhazo ne enchiinzi ya amazima. 16 Amagaambo ga amazima áago Múungu yaatusuúlulwiilwe na áago kusobeza, nago nigo áaga,
Weényini akasuululwa kwo mubili,
yaamanyiswa no Omwooyo kuba no owa amazima,
akabonwa hali bamaléeka,
akalaangaanwa omu mahaánga góona,
yaategezwa na abaantu be éensi,
akatwáalwa olugulu omwi ikuzo.