Ameégeso Habwe Esaala Ze Ekelezia
2
1 Mbweenu, hakubáanza, niimbakomeenteleza mube nimusabila abaantu bóona habweécheesha no kusiima Múungu. 2 Nimweendelwa kubasabila abakáma na abaandi bóona abeena obutégeki, tubone kwiikala ha bulami bwo obuhóolo, omukugomokela Múungu no okuba ni isima. 3 Echigaambo éechi cho kusaba ni chizima, kaandi nichimunuliza Múungu Omuchuúnguzi wéetu, 4 ha kuba naayeénda abaantu bóona bachuungulwe no kusoombookelwa amazima. 5 Heena Múungu oómo weénka, na kaandi heena omukwaátanisi oómo weénka wa abaantu na Múungu, weényini no omuuntu, niwe Kristu Yeézu. 6 Weényini akeésohoza obulami bwoómwe, abone kutugula kuluga omubuzáana tweekala tweéyagalwiile. Obu nibwo obubona óobwo Múungu akatuha omumwaanya óogwo akataho. 7 Na aha mpola éezo, iinye nkatoozibwa kuba omwoólekeelezi no kuba entumwa. Niingaamba ebya amazima, tiínkugaamba ebisuba. Nkatoozibwa kuba omweégesa wa áabo Abanyamahaánga, mbone kúba niinyolekeelela empola yo okwiikiliza na amazima.8 Habwéecho, buli ahaantu aaho mulikukoba kusaba, niinyeénda abaseeza beemuche engalo olugulu ha butakatíifua omu kusaba batéena echiníga nali endwaana.
Abakazi Omu Kelezia
9 Bityo nyini niinyeénda abakazi bazwaále ha kweétegeeleza, ahi isima, no okwiibalilila. Bataákwéenda okweénuza aha kwoógosa isóke, nali kwo kuzwaala ebiintu bye ezaháabu ne elúulu, nali emyéenda zo obukaani buháango. 10 Náho bazwaále ha bikolwa bizima, nkokwo balikweendelwa abakazi áabo abeekiliize kumugomokela Múungu. 11 Abakazi, kabalikuba nibeeyega, babe abeesiliize, bakoondoókele. 12 Tiínkukuúndila abakazi kweégesa nali okubategeka abaseeza, náho babe nibeesiliza. 13 Niingaámba nntyo, aha ensoonga Múungu akamuhaanga Adáamu olwookutaándika, ahakulaatiile Eva. 14 Kaandi Adáamu talabeehilwe, náho omukázi niwe ayaabeéhilwe, yaahenela echilagilo cha Múungu.b 15 Náho obuchilo abakazi nibazaala no kuleela abaana baabo, nibachuúngulwa kabalaaba nibazeendelela kwiikala omu kwiikiliza, engoonzi, obutakatíifu no omu kwiíbalilila.