Olwaandiko Lwo Kubaanza Lwa Paulo Hali
Timoteo
Empola
1
1 Iinye Paulo, nkasiindikwa kuba entumwa ya Kristu Yeézu ha chilagilo cha Múungu Omuchuúnguzi wéetu ne echa Kristu Yeézu. Weényini niwe itegezo lyéetu. 2 Niinkwaandikila íiwe Timoteo, mwaana waanze wa amazima omu kwiikiliza.Embabazi ne echiganyizi no obuhóolo kuluga hali Múungu Táata na hali Kristu Yeézu Omukáma wéetu, zibe hamo neewe.
Mulyaálibona Habwo Abeégesa Be Ebisuba
3 Obuchilo naalugileho kuzeenda omuchaalo cha Makedonia, nkakutweezela osigale omumuzihwa gwa Efeso. Kaandi obu niinkutweézela nntyo obóne kubaángila abaantu áabo abalikwoólekeelela ameégeso ge ebisuba. 4 Obaángile baleke kuhúugaana ha bwo kweétegeeleza emigani za kala, no okubala kwa amazíina ga baguúku gateena muhelo. Amagaambo áago góona nigaleeta kweéhakanisa kwoónka, tigakuhweela abaantu kumwiíkiliza Múungu. Kuba kumwiíkiliza Múungu nigwo omuháanda gwoómwe gwo kuchuúngula abaantu. 5 Náho ebilagilo byéetu nibyoolekeeleza abeekiliza bóona nka nikwo, beendane ha mwooyo omuluunzi, ha muganya gulikwéela, no okwiikiliza kwa amazima. 6 Náho abeégesa abaandi baálugile omubuteéka bwa áago, baáhiindukile no kuza omukugaamba empola zitéena kályo. 7 Nibeénda kuba abeégesa be ebilagilo bya Musa, nóobwo áago balikugáamba no kugakomeenteleza muno, boónyini tibakugasoomboókelwa.
8 Náho íichwe nitumanya nka nikwo ebilagilo bya Musa ni biluunzi, kaálaaba omuuntu naabitwaalilila omubuteéka óobwo obulikweendelwa. 9 Nitweendelwa kumanya nka nikwo ebilagilo tibikatiilweeho ha abeena entuungwa nzima, náho ebilagilo bitiilweeho habwa áabo abaheni be ebilagilo na ha ababisa, hali áabo abatali abakoondooki na ha abaheni, hali áabo abatakumugomokela Múungu na ha abalofu, hali áabo abalikwiita beesébo na baanyinábo, na aha beesi boóna bóona ba abaantu, 10 ha abasiihani na abaseeza abalikweélyaama, hali áabo abalikuguza abazáana, ababéehi, na hali áabo nibalahila ahabisuba. Ebilagilo bitiilweeho ha abaantu abalikukola amagaambo goóna góona agatakukuúndilana na ameégeso ga amazima. 11 Ameégeso áaga ga amazima nigabonwa omu Mpola Nzima, éezo ezilikwoóleka omugisa gwa Múungu alikusiimwa. Empola éezo niyo naategiizwe na Múungu nzilaangáane.
Embabazi Ya Yeézu Kristu Hali Paulo
12 Niimmusiima Kristu Yeézu Omukáma wéetu, ha kuba akaansoomboókelwa kuba íinye ndyo omweésigwa, yaantooza kuba omuhálila woómwe no kuúmpa obuhicha kukola ikola lyoómwe. 13 Akakola aátyo, noolu habubaandizo áaho, nkamuzuma no kwaágalaza abaantu boómwe, na nkaba ndi omusilimu. Weényini akaanzilila echiganyizi, ha kuba nkaba niinkola áago omu busilu no okwiikiliza nkaba nteenakwo. 14 Mazima Omukáma wéetu Yeézu Kristu akaanfuuha bwooli. Kaandi akaámpa okwiikiliza ne engoonzi ha kukwaátana náze.
15 Obusoomboozi bwo kweésigwa no kwiinaankulwa na bóona nibwo óobu, nka nikwo, “Kristu Yeézu akeeza omúunsi, abone kuchuúngula abeena ebiheno.” Omuli áabo abeena ebiheno, iinye nkozile ebiheno kusaaga bóona. 16 Náho habwe ensoonga éezo nyini, Yeézu Kristu akaánganyila iinye! Akanyoleka okweéyomeleza kwoómwe hali iinye owe ebiheno kuchila bóona, mbone kúba emanyiso hali áabo abalaamwiíkiliza babone kwiinaankula obulami bwa buchiile. 17 Múungu niwe Omukáma óogwo atéena omuhelo, takufwa, kaandi takubonwa, niwe weénka Múungu. Weényini ayenaankule isima ni ikuzo obucha no obuchiile! Amina.
Ebilagilo Bya Paulo Ahali Timoteo
18 Mwaana waanze Timoteo, naakuha echilagilo éechi, kwiingana ne empola yo obubáasia éezo zikagaambwa habwaáwe. Amagaambo áago gakuhweele kulwaana endwaana nzima yi ichúmu lye emilimo ya Múungu, 19 ha kukwaátilila okwiikiliza no kuba no omuganya gulikwéela. Abaantu abaandi bagayile kukola áago balikusoomboókelwa kuba na amazima, éecho chibatwaalilile kuleka okwiikiliza kwáabo. 20 Omubaantu áabo alimo Himenayo,b na Alekisanda. Áabo naábaheeleza ahi Izimu Elikúluc babone kweéyega, baleke kumuzuma Múungu.