16
Davidi dɛɛn ya maŋɩ o cwi vwe Wɛ daka kam ŋwaanɩ. Ba ma kwe daka kam ba zɩgɩ vwe dɩm wʋnɩ. Ba ma gʋ vara ba kɩ kaanɩm ba zwɛ ba pa Wɛ, yɩ ba daarɩ ba ja yazurə pɛɛra ba ba sɩ ba ma ba zuli‑DƖ.2 Davidi na tu o ba o kɩ kaanɩm dɩm o ti tɩn, o laan sɔɔlɩ mʋ o bʋrɩ bʋrɩ o pa nɔɔna bam dɩ Baŋa-Wɛ yɩrɩ.3 O ta ma pa ba cɛ wʋdiiru tɩm ba pa Yisɩrayɛlɩ tiinə kɔgɔ kʋm maama, baara dɩ kaana. Nɔɔnʋ maama ma joŋi dɩpɛ dɩdʋa, dɩ nwam-wɔɔrɩ, dɩ kacɩnnʋ maasa.
4 Davidi dɛɛn ma kuri Levi tiinə badonnǝ sɩ ba taa zuli Baŋa-Wɛ dɩm na yɩ Yisɩrayɛlɩ tiinə Wɛ tɩn DƖ daka kam yigə nɩ. Ba tɩtʋŋa maa yɩ sɩ ba taa zuli‑DƖ, yɩ ba kɩ DƖ le, yɩ ba daarɩ ba tee‑DƖ. 5 Bantʋ wʋnɩ Azafɩ dɛɛn mʋ yɩ ba yigə tu. Zakari ma saŋɩ, kʋ wǝli dɩ Yeyiyɛlɩ, dɩ Semiramɔtɩ, dɩ Yehiyɛlɩ, dɩ Matitɩya, dɩ Eliabɩ, dɩ Benaya, dɩ Obɛd-Edɔmi, dɩ Yeyiyɛlɩ wʋdoŋ. Bantʋ maa yɩ balʋ na taɩ kwaanʋ dwi dwi tɩn. Azafɩ mʋ te zwɩ sɩm magɩm. 6 Wɛ kaanɩm tiinə Benaya dɩ Yahazeli maa zɩgɩ Wɛ ni-gonim daka kam yigə nɩ ba wui nabwaanʋ tɩm maŋa dɩ maŋa.
Davidi le-kəm ləŋə
7 Dɛ dɩm kʋntʋ nɩ mʋ Davidi puli o pa Azafɩ dɩ o donnǝ bam leeni Wɛ lǝŋ-ŋwɩ ləŋə kantʋ sɩ ba ma ba kɩ Baŋa-Wɛ le:
8 Kɩ-na Baŋa-Wɛ le,
sɩ á daarɩ á tee DƖ yɩrɩ!
Pa-na sɩ lʋgʋ baŋa dwi tiinə lwarɩ
DƖ na tʋŋɩ kʋlʋ maama tɩn.
9 Leeni-na tiə le á pa‑DƖ.
Ta-na kwaanʋ á tee‑DƖ!
Brɩ-na nɔɔna DƖ tɩtʋŋ-kamunə na yɩ te tɩn.
10 Taá jɩgɩ-na wʋpolo,
DƖ yɩrɩ dɩm na yɩ lanyɩranɩ fasɩ tɩn ŋwaanɩ.
Abam balʋ na kwaanɩ
sɩ á lwarɩ Baŋa-Wɛ tɩn,
di-na ywəəni.
11 Ve-na Baŋa-Wɛ yigə nɩ
sɩ DƖ pa á joŋi dam.
Taá fɔɔrɩ-na á twɛ‑DƖ
maŋa maama wʋnɩ.
12 Joori á guli-na DƖ tɩtʋŋ-kamunnu tɩm,
dɩdaanɩ DƖ wo-kɩnkagɩla yam gulə,
sɩ á yɩ swe DƖ bʋra bʋrɩm dɩm
DƖ na pɛ abam tɩn swiə.
13 Cɩga tɩn, á yɩ balʋ Wɛ na kuri
DƖ pa DƖ tɩtɩ mʋ.
Á maa yɩ Wɛ tɩntʋŋnʋ Yisɩrayɛlɩ biə bam.
Zakɔbɩ dwi dɩm mʋ kʋntʋ.
14 Wʋntʋ nan mʋ yɩ dɩbam Tu
Baŋa-Wɛ dɩm.
DƖ maa te lʋgʋ baŋa maama
dɩ cɩga.
15 Guli-na DƖ na goni DƖ ni
dɩ DƖ nɔɔna bam te tɩn,
sɩ á daa yɩ swe dɩ swiə.
DƖ bá kwanɩ DƖ ni sɩ kʋ taa ve maŋa maama,
dwiə mʋrʋ na wʋ́ saŋɩ tɩn.
16 Wɛ dɛɛn goni DƖ ni dɩm kʋntʋ mʋ dɩ Abraham,
yɩ DƖ daarɩ DƖ du durə
DƖ ma goni ni dɩ Yizakɩ.
17 Zakɔbɩ na tu o wʋra tɩn,
Wɛ ma fɔgɩ DƖ kɩ ni-gonim dɩm DƖ pa‑o,
sɩ o dɩ o kwaga kam
taa tɔgɩ-dɩ maŋa maama.
18 Wɛ ma ta dɩd-o DƖ wɩ:
«Amʋ lagɩ a pa nmʋ Kaanan tɩga kam mʋ,
sɩ nmʋ dɩ n dwi dɩm joŋi-ka á taá te.»
19 Ba kɔgɔ kʋm dɛɛn ta ba daga.
Ba maa yɩ nɔɔna fɩnfɩɩn yɩranɩ,
yɩ ba kaagɩ Kaanan tɩga kam nɩ ba beerǝ,
nɩ vərə mʋ te.
20 Ba maa tʋlɩ tɩɩnɩ dɩm maama wʋnɩ
dɩ dwi tiinə maama wʋnɩ.
21 Dɩ kʋntʋ dɩ, Wɛ dɛɛn wʋ pɛ pwələ
sɩ nɔɔna bɛɛsɩ-ba.
Bantʋ ŋwaanɩ mʋ
DƖ dɛɛn kaanɩ pwa yɩ DƖ wɩ:
22 «Yɩ dwe-na nɔɔna bantʋ,
sɩ amʋ mʋ kuri-ba a pa a tɩtɩ.
Nan yɩ pa-na kʋ cɛ
amʋ nijoŋnǝ bam yɩra.»
23 Leeni-na á ma á zuli Baŋa-Wɛ,
abam balʋ maama na wʋ tɩga baŋa nɩ tɩn!
Á ta tɔɔlɩ-na DƖ vrɩm dɩm kwər-ywəŋə kam dɛ maama woo!
Á ta tʋlɩ-na DƖ paarɩ zulə yam na yɩ tɩte tɩn dwi-tiinə bam tɩtarɩ nɩ,
tʋlɩ-na DƖ tɩtʋŋ-kɩnkagɩla yam dwiə yam maama wʋnɩ!
24 Ta-na jaja sɩ dwi maama tiinə lwarɩ nɩ:
DƖ paarɩ-zulǝ yam gaalɩ.
Pa-na sɩ nɔɔna maama ni
DƖ tɩtʋŋ-kamunə yam ŋwa.
25 Bɛŋwaanɩ, Baŋa-Wɛ tiini DƖ yɩ kamunu mʋ.
DƖ ma sɩɩnɩ DƖ maŋɩ dɩdaanɩ tiə.
Nɔɔna maŋɩ sɩ ba taa kwarɩ-DƖ
sɩ kʋ dwǝni wa yam maama.
26 Wa yalʋ dwi-gɛ tiinə na zuli tɩn
yɩ jwǝnǝ mʋ.
Kʋ nan yɩ Baŋa-Wɛ mʋ naanɩ wɛyuu maama.
27 Kamunni dɩdaanɩ paarɩ mʋ
wʋ DƖ tee nɩ.
Dam dɩ ywəəni dɩ maa wʋ
DƖ tɩtɩ digə kam nɩ.
28 Lʋgʋ baŋa dwi tiinə maama,
kwe-na zulə á pa Baŋa-Wɛ.
DƖ na jɩgɩ dam dɩ paarɩ-zulǝ tɩn ŋwaanɩ,
kwe-na zulə á pa‑DƖ.
29 DƖ yɩrɩ dɩm na maŋɩ dɩ tiə tɩn ŋwaanɩ,
kwe-na zulə á pa‑DƖ.
Ja-na pɛɛra á vu DƖ yigə
á ma á zuli‑DƖ.
Zuli-na Baŋa-Wɛ
sɩ kʋ tɔgɩ dɩ DƖ na tiini
DƖ jɩgɩ lam te tɩn.
30 Nabiinǝ maama maŋɩ sɩ
ba taa kwarɩ-DƖ yɩ ba yɩra saɩ mʋ.
DƖ naanɩ lʋgʋ kʋm pa kʋ zɩgɩ mʋ ga cɛpɩ.
Kʋ bá fɔgɩ kʋ gɔ maŋa dɩ maŋa.
31 Pa wɛyuu kʋm taa di ywəəni!
Ta pa tɩga kam baŋa
taa jɩgɩ wʋpolo!
Pa dwi maama tiinə taa tɛ nɩ:
‹Baŋa-Wɛ mʋ yɩ Pɛ!›
32 Pa nɩnɩʋ kʋm taa wuurǝ,
kʋntʋ dɩ wǝǝnu tɩlʋ maama
na wʋ kʋ wʋnɩ tɩn.
Pa karɩ sɩm dɩ sɩ wʋdiiru tɩm maama taa caka!
33 Tweeru tɩlʋ na wʋ kagʋa nɩ tɩn
laan wʋ́ kaasɩ wʋpolo kaasa
tɩ tee Baŋa-Wɛ.
Bɛŋwaanɩ, DƖ maa bɩɩnɩ sɩ DƖ di
lʋgʋ baŋa maama taanɩ mʋ.
34 Pa dɩ́ kɩ-na Baŋa-Wɛ le,
sɩ DƖ tiini DƖ lamma.
DƖ sono kʋm wʋra mʋ maŋa maama.
35 Loori-na Wɛ á ta wɩ:
«Nmʋ yɩ dɩbam Vɩrnʋ.
Dɩ́ loori-m, joŋi dɩbam n yagɩ!
Lɩ dɩbam dwi-gɛ tiinə bam tɩtarɩ nɩ n kɩ daanɩ,
sɩ n pa dɩ́ joori
dɩ́ tɩtɩ tɩʋ kʋm.
Dɩ́ laan wʋ́ kɩ nmʋ le,
n yɩrɩ dɩm na yɩ lanyɩranɩ fasɩ tɩn ŋwaanɩ,
yɩ dɩ́ daarɩ dɩ́ taa tee‑m
n paarɩ-zulǝ yam ŋwaanɩ.»
36 Pa-na dɩ́ taa zuli Baŋa-Wɛ dɩm
na yɩ Yisɩrayɛlɩ tiinə Wɛ tɩn!
Dɩntʋ maŋɩ dɩ zulǝ mʋ
kʋ zɩgɩ faŋa faŋa
sɩ kʋ taa ve maŋa maama.
Nɔɔna bam maama laan ma ta ba wɩ: «Amina!» Ba ma daarɩ ba tee Baŋa-Wɛ.
Wɛ zulə yam taanɩ
37 Pɛ Davidi dɛɛn na kuri Azafɩ dɩ o cʋrrʋ tɩm sɩ ba taa zuli Baŋa-Wɛ DƖ ni-gonim daka kam yigə nɩ tɩn, o ma pa ba tʋŋɩ ba pa Wɛ dɛ maama wʋnɩ, nɩ cullu tɩm na brɩ te tɩn. 38 O ta ma pa Yedutun bu Obɛd-Edɔmi dɩ o cʋrrʋ fusɩrdʋ-nana (68) dɩ tʋŋɩ ba wǝli da. Obɛd-Edɔmi dɩdaanɩ Hosa dɛɛn yɩrɩ Wɛ-di-kamunu niə yam mʋ.
39 Kʋ ta na yɩ Sadoki dɩ o donnǝ kaanɩm tiinə bam, Davidi dɛɛn pɛ ba tʋŋɩ ba pa Baŋa-Wɛ DƖ jero-vwe dɩm nɩ mʋ. Wara-je sɩlʋ na wʋ Gabawɔn nɩ tɩn mʋ kʋntʋ.a 40 Ba dɛɛn yǝni ba maŋɩ sɩ ba gʋ vara ba zwɛ ba pa Baŋa-Wɛ zwɛɛm kaanɩm bimbim dɩm baŋa nɩ tɩtɩɩtɩ dɩ dɩdaan-ni maama mʋ, nɩ Baŋa-Wɛ niə yam na brɩ sɩ Yisɩrayɛlɩ tiinə taa kɩ te tɩn. 41 Yedutun dɩ Hemanɩ dɛɛn mʋ wǝli ba wʋnɩ, dɩdaanɩ balʋ maama Davidi na kuri dɩdʋa dɩdʋa tɩn sɩ ba taa kɩ Baŋa-Wɛ le, DƖ sono kʋm na wʋra maŋa maama tɩn ŋwaanɩ. 42 Hemanɩ dɩ Yedutun dɛɛn nii lən-leenə bam baŋa nɩ mʋ. Ba maa jɩgɩ nabwaanʋ, dɩ zwɩ dɩ kwɛɛra zɩla dwi dwi sɩ ba taa maɩ ba zuli Wɛ. Yedutun dwi dɩm maa maŋɩ sɩ ba taa yɩrɩ Wɛ-digə kam ni dɩm.
43 Ba na ti kʋntʋ maama tɩn, nɔɔna maama ma joori ba sam. Davidi dɩ ma joori sɔŋɔ sɩ o loori Wɛ sɩ DƖ kɩ o sɔŋɔ tiinə bam lanyɩranɩ.