Wɛ ni-gonim daka kam
15
Davidi dɛɛn lɔgɩ sam mʋ o tɩtɩ tɩʋ Zeruzalɛm nɩ sɩ o taa zʋʋrɩ dɩ wʋnɩ. O ma daarɩ o cwi vwe sɩ o wanɩ o kwe Wɛ ni-gonim daka kam o zɩgɩ da. 2 O dɛɛn ma ta o wɩ: «Levi dwi tiinə yɩranɩ mʋ jɩgɩ cwǝŋǝ sɩ ba zɩŋɩ Wɛ ni-gonim daka kam. Bɛŋwaanɩ bantʋ mʋ Baŋa-Wɛ maŋɩ DƖ kuri sɩ ba taa zɩŋɩ-ka, sɩ ba daarɩ ba taa tʋŋɩ ba pa‑DƖ sɩ kʋ ta ve wuu.»a3 Davidi ma la Yisɩrayɛlɩ tiinə bam maama o kɩ daanɩ Zeruzalɛm nɩ, sɩ ba laan wanɩ ba kwe Wɛ ni-gonim daka kam ba ba ba zɩgɩ o na kɩ je sɩlʋ o pa-ka tɩn. 4 O ma bəŋi Arɔn dwi dɩm dɩ Levi dwi tiinə bam o kɩ daanɩ.
Bantʋ dɛɛn mʋ yɩ:
5 Levi bu Keyatɩ sɔ-yuu kʋm wʋnɩ:
Ba sɔ-yuu kʋm nakwɩ Yureli dɩ o cʋrrʋ bi dɩ fiinle (120).
6 Levi bu Merari sɔ-yuu kʋm wʋnɩ:
Ba sɔ-yuu kʋm nakwɩ Asaya dɩ o cʋrrʋ biə-yale dɩ fiinle (220).
7 Levi bu Gɛrsɔnɩ sɔ-yuu kʋm wʋnɩ:
Ba sɔ-yuu kʋm nakwɩ Zowɛlɩ dɩ o cʋrrʋ bi dɩ fiintɔ (130).
8 Elizafan sɔ-yuu kʋm wʋnɩ:
Ba sɔ-yuu kʋm nakwɩ Semaya dɩ o cʋrrʋ biə-yale (200).
9 Ebrɔn sɔ-yuu kʋm wʋnɩ:
Ba sɔ-yuu kʋm nakwɩ Eliɛlɩ dɩ o cʋrrʋ funɔnɔ (80).
10 Uziyɛlɩ sɔ-yuu kʋm wʋnɩ:
Ba sɔ-yuu kʋm nakwɩ Amɩnadabɩ dɩ o cʋrrʋ bi dɩ fugǝ-bale (112).
11 Davidi dɛɛn bəŋi Wɛ kaanɩm tiinə Sadoki, dɩ Abɩatarɩ. O ta ma bəŋi Levi dwi tiinə bardʋ bam, Yureli, dɩ Asaya, dɩ Zowɛlɩ, dɩ Semaya, dɩ Eliɛlɩ, dɩ Amɩnadabɩ. 12 O ma ta dɩ ba o wɩ: «Abam yɩ Levi dwi dɩm sɔ-yuni tɩm nakwa mʋ. Abam dɩdaanɩ á donnǝ Levi tiinə bam maŋɩ sɩ á kwɛ á tɩtɩ Wɛ ŋwaanɩ mʋ sɩ á wanɩ á zɩŋɩ Baŋa-Wɛ dɩm na yɩ Yisɩrayɛlɩ tiinə Wɛ tɩn ni-gonim daka kam á ja á ba mɛ amʋ na kwɛ sɩ ka taa wʋra tɩn. 13 Dɩ́ na kwaanɩ sɩ dɩ́ kɩ kʋntʋ pulim nɩ tɩn, abam Levi dwi tiinə ya tǝrǝ sɩ á zɩŋɩ-ka, nɩ Wɛ cullu tɩm na brɩ te tɩn. Kʋntʋ ŋwaanɩ dɩ́ Tu Baŋa-Wɛ banɩ fuli dɩ́ baŋa nɩ, dɩ́ na wʋ bwe‑DƖ sɩ dɩ́ lwarɩ dɩ́ na wʋ́ kɩ te tɩn ŋwaanɩ.»
14 Wɛ kaanɩm tiinə bam dɩ Levi tiinə bam ma kwɛ ba tɩtɩ Wɛ ŋwaanɩ sɩ ba wanɩ ba zɩŋɩ Baŋa-Wɛ dɩm na yɩ Yisɩrayɛlɩ tiinə Wɛ tɩn ni-gonim daka kam. 15 Levi tiinə bam kwe da-dɩdwaarʋ mʋ ba ma ba zɩŋɩ Wɛ daka kam ba bakalɩ baŋa nɩ, nɩ Baŋa-Wɛ dɛɛn na tɔgɩ Moyisi baŋa nɩ DƖ pa-ba ni sɩ ba kɩ te tɩn.
16 Davidi ma ta dɩ Levi tiinə nakwa bam sɩ ba kuri ba tɩtɩ cʋrrʋ tɩm wʋnɩ balʋ na waɩ ba leeni tɩn sɩ ba taa leeni wʋpolo le. Badaara maa wʋ́ taa taɩ kwaanʋ dwi dwi, yɩ badaara dɩ taa jɩgɩ zwɩ ba maga.b 17 Levi tiinə bam ma kuri Zowɛlɩ bu Hemanɩ, dɩ o cʋrʋ Azafɩ wʋlʋ ko na yɩ Berekiya tɩn. Kʋ maa na yɩ Merari dwi dɩm wʋnɩ, ba ma kuri Kusaya bu Etan. 18 Ba dɛɛn ta kuri ba cʋrrʋ tɩlʋ na wʋ́ wǝli-ba tɩn. Bantʋ mʋ yɩ:
Zakari, dɩ Yaazeli, dɩ Semiramɔtɩ, dɩ Yehiyɛlɩ, dɩ Yunni, dɩ Eliabɩ, dɩ Benaya, dɩ Maaseya, dɩ Matitɩya, dɩ Elifelewu, dɩ Mikinɩya, kʋ wǝli dɩ Wɛ-digə kam ni-yɩrɩna bale balʋ yɩra na yɩ Obɛd-Edɔmi, dɩ Yeyiyɛlɩ tɩn.
19 Hemanɩ, dɩ Azafɩ, dɩ Etan mʋ ba kuri sɩ ba taa magɩ canna zwɩ. 20 Ba dɛɛn ta kuri Zakari, dɩ Atɩsalɩ, dɩ Semiramɔtɩ, dɩ Yehiyɛlɩ, dɩ Yunni, dɩ Eliabɩ, dɩ Maaseya, dɩ Benaya sɩ ba taa taɩ kwan-balwa sɩ tɩ kwǝri taa ywəmmə. 21 Matitɩya, dɩ Elifelewu, dɩ Mikinɩya, dɩ Obɛd-Edɔmi, dɩ Yeyiyɛlɩ, dɩ Azazia maa wʋ́ taa taɩ kwan-kamunnu sɩ tɩ kwǝri dɩ́ taa ywəmmə. 22 Ba dɛɛn kuri Kenanɩa mʋ sɩ o taa yɩ lən-leenə bam yigə tu, o na yɔɔrɩ o yɩ gɔgɔ le wʋnɩ tɩn ŋwaanɩ.
23 Ba ma kuri Berekiya, dɩ Elikana sɩ bantʋ taa yɩrɩ Wɛ ni-gonim daka kam. 24 Wɛ kaanɩm tiinə Sebanɩa, dɩ Zosafatɩ, dɩ Netaneli, dɩ Amasayi, dɩ Zakari, dɩ Benaya, dɩ Eliezɛrɩ maa maŋɩ sɩ ba tʋ Wɛ ni-gonim daka kam yigə nɩ ba taa wui nabwaanʋ. Obɛd-Edɔmi, dɩ Yehia dɩ dɛɛn maa maŋɩ sɩ ba taa yɩrɩ daka kam ba wǝli da.
25 Davidi dɛɛn tɔgɩ dɩ Yisɩrayɛlɩ tiinə nakwa bam, kʋ wǝli dɩ jar-kərə dɩdɛɛra balʋ na te nɔɔna mʋrʋ mʋrʋ tɩn sɩ ba vu Obɛd-Edɔmi sɔŋɔ kʋm ba kwe Baŋa-Wɛ ni-gonim daka kam mʋ ba ja ba ba Zeruzalɛm. Ba na maa ve tɩn, ba jɩgɩ wʋpolo zanzan mʋ. 26 Wɛ dɛɛn yɔɔrɩ DƖ zǝni Levi tiinə balʋ na zɩŋɩ Baŋa-Wɛ ni-gonim daka kam tɩn. Kʋntʋ ŋwaanɩ ba ma gʋ na-bɛ sɩrpɛ dɩ pi-balɩ sɩrpɛ ba ma kaanɩ ba zuli‑DƖ.
27 Davidi, dɩ Levi tiinə balʋ maama na zɩŋɩ daka kam tɩn, kʋ wǝli dɩ lən-leenə bam, dɩ Kenanɩa wʋlʋ na nii ba tɩtʋŋa yam baŋa nɩ tɩn dɛɛn vɔgɩ gar-fɩfalɩ ba yɩra nɩ mʋ. Davidi tɩtɩ ma zʋ gwar-wʋgʋ kʋlʋ ba na mɛ gar-fɩfalɩ ba sɔ tɩn o daŋɩ da. 28 Yisɩrayɛlɩ tiinə kɔgɔ kʋm maama ma tɔgɩ ba la ba pu o kwaga, pa ba ja Baŋa-Wɛ ni-gonim daka kam ba vu Zeruzalɛm. Ba na maa ve tɩn, ba tiini ba kaasɩ wʋpolo sɔɔ mʋ yɩ ba wui nabwaanʋ, dɩ namunnu. Ba maa magɩ zwɩ yɩ ba daarɩ ba taɩ kwaanʋ dwi dwi dɩ. 29 Ba na yɔɔrɩ ba jɩgɩ Baŋa-Wɛ ni-gonim daka kam ba zʋʋrɩ Zeruzalɛm tɩʋ wʋnɩ te tɩn, mʋ Sooli bukɔ Mikalɩ tɔgɩ o takoro seeni o nii o na kɔgɔ kʋm. O maa na nɛ Pɛ Davidi na tiini o saɩ dɩ wʋpolo te tɩn, o ma goon‑o o bɩcarɩ nɩ.