Davidi dwi dɩm taanɩ
14
Tiiri tɩʋ Pɛ Hiramɩ dɛɛn ma tʋŋɩ nɔɔna Davidi tee nɩ sɩ ba kɩ pipiu daanɩ. O ma pa ba ja Sɛdrɩ dɛ ba vu ba pa‑o. O ta ma pa nɔɔna balʋ na ye kandwa sarɩm tɩn, dɩ gwarʋ tɔgɩ ba vu, sɩ ba wanɩ ba lɔ pɛ sɔŋɔ ba pa Davidi.a 2 Davidi ma lwarɩ nɩ Baŋa-Wɛ mʋ sɩɩnɩ DƖ pa o di Yisɩrayɛlɩ tɩʋ paarɩ, yɩ DƖ ta daarɩ DƖ pa o paarɩ dɩm fɔgɩ dɩ puli lanyɩranɩ, Wɛ tɩtɩ nɔɔna Yisɩrayɛlɩ tiinə bam ŋwaanɩ.3 Davidi na zʋʋrɩ Zeruzalɛm nɩ tɩn, mʋ o daa ta di kaana badonnǝ o wǝli da. Ba ma lʋ biə, bəkəri dɩ bɩsankam, ba pa‑o. 4 Biə balʋ Davidi na lʋgɩ Zeruzalɛm nɩ tɩn yɩra mʋ tɩntʋ:
Samʋa, dɩ Sobabɩ, dɩ Natan, dɩ Solɔmɔn, 5 dɩ Yɩbarɩ, dɩ Elisʋa, dɩ Elipelete, 6 dɩ Noga, dɩ Nefɛgɩ, dɩ Yafɩa, 7 dɩ Elisama, dɩ Beliada, dɩdaanɩ Elifelɛtɩ.
Davidi wanɩ Filisi tiinə bam.
8 Filisi tiinə bam dɛɛn ma ni nɩ ba tiŋi Davidi sɩ o taa yɩ Yisɩrayɛlɩ tiinə maama pɛ. Ba ma la ba jar-kərə bam maama ba kɩ daanɩ ba vu ba beeri o jǝgǝ sɩ ba ja. Davidi ma lwarɩ kʋ ni nɩ yɩ o nuŋi tɩʋ kʋm nɩ o vu sɩ o jeeri-ba. 9 Filisi tiinə bam ma ba ba yi Refayim bolo kʋm. Ba ma kɩ jara dɩ nɔɔna balʋ na zʋʋrɩ da tɩn. 10 Davidi ma bwe Wɛ o wɩ: «A ve a jeeri Filisi tiinə bam dɩ najara, sɩ nmʋ wʋ́ kɩ-ba a jɩŋa nɩ na?» Baŋa-Wɛ ma lǝr-o DƖ wɩ: «Ɛɛn, zaŋɩ n vu n jeeri-ba, sɩ amʋ wʋ́ kɩ-ba n jɩŋa nɩ.»
11 Davidi ma vu o yi Baalɩ Perazim. O ma wanɩ Filisi tiinə bam o di. O laan ma ta o wɩ: «Wɛ tɔgɩ amʋ dam baŋa nɩ mʋ DƖ magɩ DƖ pʋrɩ a dʋna bam baŋa nɩ o zəli-ba, nɩnɛɛnɩ na na magɩ ba pʋrɩ te tɩn.» Ba ma lɛɛrɩ ba jɩgɩ je sɩm kʋntʋ ba bǝi nɩ ‹Baalɩ Perazim›.b 12 Dáanɩ mʋ Filisi tiinə bam duri ba daarɩ ba jwǝnǝ yam ba yagɩ. Davidi ma pa o nɔɔna bam ni sɩ ba kwe mim ba zwɛ jwǝnǝ yam.
13 Kʋ na kɩ da fɩnfɩɩn tɩn, Filisi jar-kərə bam daa ta ma joori Refayim bolo kʋm ba kɩ jara dɩ nɔɔna bam. 14 Davidi daa ma bwe Wɛ sɩ o lwarɩ o na wʋ́ kɩ te tɩn. Wɛ ma ta DƖ wɩ: «Nmʋ na jeeri-ba, sɩ n yɩ yɔɔrɩ ba yigə vɩkɩ. Nan kaagɩ n tɔgɩ Murie tweeru tɩm n kɩkarɩ daa kadoŋ kam nɩ n yi-ba. 15 Ta n nii tweeru tɩm yuu nɩ. Nmʋ na tu n ni kʋ dwana dɩ baŋa nɩ, sɩ n laan nuŋi n jeeri-ba. Kʋ brɩ nɩ amʋ tɩtɩ mʋ dɛ á yigə sɩ a jeeri Filisi tiinə jar-kərə bam dɩ najara a daarɩ a di-ba.» 16 Davidi ma sɩɩnɩ o kɩ kʋlʋ Wɛ na brɩ-o sɩ o kɩ tɩn. Kʋ ma pa ba wanɩ Filisi jar-kərə bam ba di. Ba ma zɩgɩ Gabawɔn nɩ ba zəli-ba ba vu ba yi Gezɛrɩ.
17 Kʋntʋ maama baŋa nɩ mʋ Davidi yɩrɩ dɛɛn zaŋɩ dɩ jagɩ tɩga baŋa je maama nɩ. Baŋa-Wɛ ma pa dwi-gɛ tiinə maama tiini ba kwarɩ fʋʋnɩ dɩd-o.