Wɛ ni-gonim daka kam
13
Davidi dɛɛn mʋ nɛ dɩ o jar-kərə dɩdɛɛra balʋ na te nɔɔna mʋrʋ mʋrʋ tɩn, dɩ balʋ na te nɔɔna bi bi tɩn, dɩ o jar-kərə bam yigǝ tiinǝ maama. 2 O ma daarɩ o ta dɩ Yisɩrayɛlɩ tiinə nɔn-kɔgɔ kʋm maama o wɩ: «Abam na wʋ́ sɛ, yɩ kʋ na tɔgɩ dɩbam Tu Baŋa-Wɛ wʋbʋŋa dɩ, pa-na sɩ dɩ́ tʋŋɩ kwǝrǝ dɩ́ pa dɩ́ cʋrrʋ tɩlʋ na wʋ Yisɩrayɛlɩ laŋa kam je maama nɩ tɩn sɩ ba maama ba yo sɩ dɩ́ jeeri daanɩ. Dɩ́ ta wʋ́ tʋŋɩ kwǝrǝ kam kʋntʋ dɩ́ pa Wɛ kaanɩm tiinə dɩ Levi dwi tiinə maama na wʋ tɩɩnɩ dɩlʋ pwəli na gilimi-dɩ tɩn wʋnɩ. 3 Pa-na dɩ́ kwaanɩ dɩ́ kwe dɩ́ Tu Wɛ ni-gonim daka kam dɩ́ ja dɩ́ joori dɩ́ tee nɩ. Bɛŋwaanɩ, maŋa kalʋ Sooli na jɩgɩ paarɩ dɩm o di tɩn, dɩ́ wʋ bwe sɩ dɩ́ lwarɩ Wɛ wʋbʋŋa.» 4 Davidi na tagɩ kʋntʋ tɩn, nɔn-kɔgɔ kʋm maama ma sɛ o taanɩ dɩm, kʋ na tɔgɩ cwǝŋǝ ba maama yigə nɩ tɩn ŋwaanɩ.5 Davidi ma la Yisɩrayɛlɩ tiinə bam maama kʋ zɩgɩ Ezipi sisəm dɩma nɩ sɩ kʋ vu kʋ yi Lebo-Hamatɩ o kɩ daanɩ, sɩ ba da ba vu Kiriaf-Jeerim ba kwe Wɛ ni-gonim daka kam ba ja ba ba.b 6 O ma da ba yigə sɩ ba maama vu Zuda tɩʋ Baala kʋlʋ yɩrɩ dɩdoŋ na yɩ Kiriaf-Jeerim tɩn. Ba dɛɛn ve sɩ ba ja Wɛ ni-gonim daka kam mʋ ba joori Zeruzalɛm.c Daka kam kʋntʋ wʋra Baŋa-Wɛ yɩrɩ ŋwaanɩ mʋ. Wʋntʋ di paarɩ Serubɛn sɩm tɩtarɩ laŋa nɩ, sɩ na zɩgɩ daka kam baŋa nɩ tɩn.
7 Daka kam nan ya wʋ Abinadabɩ sɔŋɔ nɩ mʋ. Ba ma vu ba kwe-ka ba daŋɩ na-bɛ təriko-dʋŋʋ baŋa nɩ. Abinadabɩ biə bale Yuza dɩ Ayo maa tɔgɩ təriko kʋm yɩ ba yɩrɩ-kʋ. 8 Davidi dɩ Yisɩrayɛlɩ tiinə bam maama ma leeni le ba zuli Wɛ dɩ ba dam maama. Ba ta maa jɩgɩ kwaanʋ, dɩ gungwe, dɩ nabwaanʋ, dɩdaanɩ kwɛɛra zɩla dwi dwi ba kwɛɛrɩ, yɩ ba daarɩ ba saɩ ba tɔgɩ kwaga.
9 Ba ma vu ba yi Kidon na yǝni o frɩ o mɩna mɛ tɩn. Na-bɛ sɩm ma garɩ sɩ tɩtɩ sɩ lagɩ sɩ tʋ. Yuza ma zi Wɛ ni-gonim daka kam sɩ o pa ka fɔgɩ ka zɩgɩ. 10 Baŋa-Wɛ banɩ ma tiini dɩ zaŋɩ Yuza baŋa nɩ, o na twɩ o jɩŋa o dwe daka kam tɩn ŋwaanɩ. Nɛ sɩm kʋntʋ ni nɩ, Wɛ ma magɩ Yuza DƖ gʋ. 11 Davidi wʋʋ ma fuli zanzan dɩ Baŋa-Wɛ na tɔgɩ DƖ ban-zɔŋɔ kʋm baŋa DƖ gʋ Yuza tɩn. Kʋntʋ ma pa o bəŋi je sɩm kʋntʋ yɩrɩ o wɩ: ‹Pɛrɩzi Yuza.›d Mʋ je sɩm yɩrɩ dɩ zɩm maama. 12 Kǝm dɩm kʋntʋ ma pa Davidi kwarɩ Wɛ. O ma bwɛ o wɩ: «Amʋ wʋ́ kɩ tɛ mʋ a ja Wɛ ni-gonim daka kam a ba a te?» 13 O daa maa wʋ jaanɩ-ka o ja o vu o zʋ o tɩtɩ tɩʋ Zeruzalɛm wʋnɩ. O ma lɛɛrɩ o pa ba ywəri ba ja-ka ba vu Gatɩ tu Obɛd-Edɔmi sɔŋɔ. 14 Wɛ ni-gonim daka kam ma maŋɩ Obɛd-Edɔmi sɔŋɔ nɩ canɩ sɩtɔ mʋ. Ka na wʋra tɩn, Baŋa-Wɛ ma kɩ wʋntʋ dɩ o sɔŋɔ tiinə, dɩ o wǝǝnu maama yu-yoŋo.