Davidi kwaga nɔɔna na wʋ Zikalagɩ nɩ tɩn
12
Davidi dɛɛn ve o zʋʋrɩ Zikalagɩa nɩ, Kisi bu Sooli na zǝl-o o tee nɩ tɩn ŋwaanɩ. O na zʋʋrɩ da kʋntʋ tɩn, mʋ nɔn-babɛ sɩdonnǝ na ye najara kǝm lanyɩranɩ tɩn tu ba zən‑o sɩ o kɩ jara yam. 2 Pamaŋna bam dɛɛn jɩgɩ tɛn mʋ. Ba maa ye cɩna tam dɩ napana dʋlɩm lanyɩranɩ jazɩm dɩ jagwiə maama. Ba maa yɩ Bɛnzamɛn dwi tu Sooli cʋrrʋ mʋ. 3 Ba yigə tu wʋm mʋ yɩ Ahiyezera. O nyaanɩ Zoasɩ dɩ maa wʋ o kwaga nɩ. Bantʋ bale ko maa yɩ Gibea tu Semaa. Ba nɔɔna bam mʋ yɩ:Wʋntʋ dɛɛn yɩ nɔn-babɩa mʋ jar-kərə fiintɔ bam wʋnɩ yɩ o ta yɩ ba yigə tu. Ba nɔɔna badonnǝ maa yɩ:
Zeremi, dɩ Yahazeli, dɩ Yohanan, dɩ Gedɩra tu Yozabadɩ, 5 dɩ Eluzayi, dɩ Yerimoti, dɩ Bealia, dɩ Semari dɩ Harufi tu Sefatɩa, 6 dɩdaanɩ Kʋra tiinə Elikana, dɩ Yisiya, dɩ Azareli, dɩ Yozerɩ, dɩ Yasobɛmɩ, 7 kʋ wǝli dɩ Gedora tu Zeroham biə bale, Yowela dɩ Zebadia.
8 Nɔn-babɛ sɩdonnǝ dɩ dɛɛn nuŋi Gadɩ dwi dɩm wʋnɩ ba da ba wǝli Davidi kɔgɔ kʋm wʋnɩ. Ba ma vu o te kagʋa yuu nɩ. Ba dɩ dɛɛn yɩ pamaŋ-bɩbɛ sɩlʋ na ye najara kǝm lanyɩranɩ tɩn mʋ. Ba maa jɩgɩ najara cɩ-kwɛn dɩ cicwə. Ba maa jɩgɩ fʋʋnɩ nɩ nyoŋo te, yɩ ba tiini ba wara nɩ fərə na duri te pweeru yuu nɩ tɩn. 9 Ba yigə tu wʋm mʋ yɩ Etisɛrɩ. O kwaga nɔɔna maa yɩ:
Abdɩasɩ, dɩ Eliabɩ, 10 dɩ Misimana, dɩ Zeremi, 11 dɩ Atayi, dɩ Eliɛlɩ, 12 dɩ Yohanan, dɩ Elizabadɩ, 13 dɩ Zeremi, dɩ Makabanayi.
14 Nɔn-babɛ sɩntʋ na yɩ Gadɩ tiinə tɩn dɛɛn yɩ jar-kərə yigǝ tiinǝ mʋ. Ba dɩdʋa wʋ́ wanɩ nɔɔna bi o zəli najara wʋnɩ. Ba wʋnɩ wʋlʋ dam na daga tɩn waɩ nɔɔna mʋrʋ o zələ. 15 Pamaŋna bam kʋntʋ dɛɛn mʋ bɛ Zʋrdɛn bugə kam maŋa kalʋ ka ni na pɛɛlɩ bɩnɩ dɩm pulim cana kam nɩ tɩn. Ba ma vu ba zəli nɔɔna balʋ maama na zʋʋrɩ bubɛ dɩm bwəəlu tɩm wa-puli dɩ wa-zʋʋrɩ seeni tɩn pa ba duri ba viiri.
16 Baara badonnǝ na yɩ Bɛnzamɛn dwi tiinə dɩ Zuda dwi tiinə tɩn dɛɛn ve Davidi te o dam je sɩm nɩ. 17 Davidi ma zaŋɩ o jeeri-ba yɩ o ta dɩ ba o wɩ: «Abam na maa bɩɩnɩ amʋ te dɩ yazurǝ mʋ, sɩ á tɔgɩ á zəni-nɩ, amʋ dɩ nan sɛ sɩ dɩ́ maama wǝli daanɩ. Á nan na tu sɩ á yəgi-nɩ mʋ á pa a dʋna bam, sɩ dɩbam nabaara Wɛ dɩm taa ye kʋ ni nɩ sɩ DƖ daarɩ DƖ waarɩ abam. Bɛŋwaanɩ a wʋ kɩ kʋlʋkʋlʋ a cɔgɩ.»
18 Wɛ Joro ma ba Amasayi wʋlʋ na yɩ ba jar-kərə fiintɔ kʋm yigə tu tɩn baŋa nɩ, yɩ o ta o wɩ:
«Davidi! Dɩbam yɩ nmʋ nɔɔna mʋ,
Zese bu! Dɩ́ wʋ n kwaga nɩ.
Yazurə taa wʋ n tee nɩ,
sɩ kʋ kɛ kʋ yi balʋ dɩ
na wəli‑m tɩn.
Nmʋ Tu Wɛ dɩm wʋ́ zǝni-m.»
Davidi ma sɛ o joŋi-ba yɩ o daarɩ o pa ba ji o jar-kərə bam yigǝ tiinǝ.
19 Baara badonnǝ dɩ dɛɛn nuŋi Manasɩ dwi dɩm wʋnɩ ba da ba wǝli Davidi kɔgɔ kʋm wʋnɩ maŋa kalʋ o na tɔgɩ dɩ Filisi tiinə bam sɩ ba zaŋɩ najara dɩ Sooli tɩn. Kʋ nan na kɩ te tɩn, Davidi dɩ o nɔɔna bam wʋ wǝli Filisi tiinə bam, fʋʋnɩ na jaanɩ ba yigǝ tiinǝ bam tɩn ŋwaanɩ. Ba dɛɛn bʋŋɩ nɩ Davidi wʋ́ wanɩ o lɔ ba kwaga nɩ o joori Pɛ Sooli te o daarɩ-ba pa ba ga ba ŋwɩa mʋ. Kʋntʋ ŋwaanɩ ba jǝni tɩga nɩ ba bwɛ daanɩ yɩ ba pa Davidi pwɛ o tɩtɩ dɩ ba.b 20 Maŋa kalʋ Davidi na maa joori Zikalagɩ tɩn, Manasɩ nɔɔna balʋ na dɛ ba tɔgɩ dɩd-o tɩn mʋ yɩ:
Adina, dɩ Yozabadɩ, dɩ Yediayɛlɩ, dɩ Misɛɛlɩ, dɩ Yozabadɩ, dɩ Elihu, dɩ Ziletayi.
Nɔɔna bam kʋntʋ dɩdʋa dɩdʋa te Manasɩ dwi jar-kərə mʋrʋ mʋ. 21 Ba dɛɛn yǝni ba wǝli Davidi pa o wanɩ vɩnvɩrna balʋ na kɩ jara dɩ ba tɩn, bɛŋwaanɩ ba dɛɛn yɩ nɔn-babɛ mʋ cɩga cɩga yɩ ba kwǝri ba yɩ o jar-kərə bam yigǝ tiinǝ. 22 Dɛ maama wʋnɩ nɔɔna dɛɛn yǝni ba tui ba wǝli Davidi kɔgɔ kʋm wʋnɩ. Kʋntʋ dɛɛn ma pa o na jar-kərə kɔgɔ zanzan, nɩnɛɛnɩ Wɛ tɩtɩ jar-kərə tɩn.
Davidi kwaga nɔɔna na wʋ Ebrɔn nɩ tɩn
23 Davidi dɛɛn na wʋ Ebrɔn nɩ tɩn, baara balʋ na ye najara kǝm tɩn mʋ tu ba wǝli o jar-kərə kɔgɔ kʋm wʋnɩ, sɩ ba pa o ləri Sooli yuu nɩ o di paarɩ dɩm, nɩ Baŋa-Wɛ na maŋɩ DƖ pooli te tɩn. Nɔɔna bam ni mʋ tɩntʋ:
24 Zuda dwi dɩm wʋnɩ:
Baara mʋrrʋ tɩredʋ dɩ biə-nana (6,800). Bantʋ dɛɛn ze cɩ-kwɛn dɩ cicwə mʋ dɩ jara zɩla zanzan.
25 Simeyon dwi dɩm wʋnɩ:
Jar-kərə mʋrrʋ tɩrpɛ dɩ bi (7,100). Bantʋ yɩ pamag-bɩbɛ cɩga cɩga.
26 Levi dwi dɩm wʋnɩ:
Baara mʋrrʋ tɩna dɩ biə-yardʋ (4, 600). 27 Arɔn dwi tu Yehoyada dɩ wǝli da, dɩ o nɔɔna mʋrrʋ tɩtɔ dɩ biə-yarpɛ (3, 700). 28 Sadoki dɩ maa wʋra. O dɛɛn yɩ nɔn-dʋŋʋ kʋlʋ na yɩ nɔn-babɩa tɩn mʋ, yɩ dɩdɛɛra fiinle-bale (22) wʋ o tee nɩ, ba na yɩ o cʋrrʋ tɩn.
29 Bɛnzamɛn dwi dɩm wʋnɩ:
Baara mʋrrʋ tɩtɔ (3,000). Sooli tɩtɩ dwi dɩm mʋ kʋntʋ. Ba zanzan dɛɛn sɛ ba zɩgɩ Sooli dɩ o digə kam kwaga nɩ yɩ ba wʋ yagɩ.
30 Efrayim dwi dɩm wʋnɩ:
Baara mʋrrʋ fiinle dɩ biə-nana (20, 800). Bantʋ dɛɛn tiini ba jɩgɩ yɩrɩ mʋ ba sɔ-yuni tɩm wʋnɩ.
31 Manasɩ dwi cicoro kʋm wʋnɩ:
Baara mʋrrʋ fugə-nana (18,000). Ba cʋrrʋ tɩm dɛɛn kuri-ba dɩdʋa dɩdʋa sɩ ba yɔɔrɩ ba ba ba wǝli Davidi sɩ o ji pɛ.
32 Yisakaarɩ dwi dɩm wʋnɩ:
Dɩdɛɛra biə-yale (200), dɩ ba cʋrrʋ tɩlʋ maama na wʋ ba kwaga nɔɔna tɩn. Dɩdɛɛra bam kʋntʋ ye kʋlʋ na jɩgɩ kʋ kɩ kantʋ maŋa kam nɩ tɩn pa ba lwarɩ cwǝŋǝ kalʋ Yisɩrayɛlɩ tiinə na maŋɩ sɩ ba tɔgɩ tɩn.
33 Zabulɔn dwi dɩm wʋnɩ:
Jar-kərə mʋrrʋ fiinnu (50,000). Ba dɛɛn ye jara kǝm lanyɩranɩ mʋ. Ba maa jɩgɩ jara zɩla dwi dwi sɩ ba ma wǝli Davidi najara wʋnɩ. Ba dɛɛn yɔɔrɩ ba kɩ ba cɩga dɩd-o.
34 Nɛfitali dwi dɩm wʋnɩ:
Jar-kərə yigǝ tiinǝ mʋrʋ (1,000), kʋ wǝli dɩ ba jar-kərə mʋrrʋ fiintɔ-tɩrpɛ (37,000) na zeeri najara cɩ-kwɛn dɩ cicwə tɩn.
35 Dan dwi dɩm wʋnɩ:
Jar-kərə mʋrrʋ fiinle-nana dɩ biə-yardʋ (28, 600).
36 Asɛɛrɩ dwi dɩm wʋnɩ:
Jar-kərə mʋrrʋ fiinna (40,000). Bantʋ ye najara kǝm lanyɩranɩ.
37 Yisɩrayɛlɩ dwiə yalʋ dɛɛn na zʋʋrɩ Zʋrdɛn bugə kam wa-puli seeni tɩn. Ruban dwi dɩm, dɩ Gadɩ dwi dɩm, kʋ wǝli dɩ Manasɩ dwi cicoro kʋm mʋ kʋntʋ:
Jar-kərə mʋrrʋ bi dɩ fiinle (120,000). Ba dɩ dɛɛn jɩgɩ jara zɩla dwi dwi.
38 Nɔɔna bam kʋntʋ maama dɛɛn yɩ jar-kərə balʋ na ti ba yigə sɩ ba zaŋɩ najara yam tɩn mʋ. Ba na tu Davidi te Ebrɔn nɩ tɩn, ba wʋbʋŋa ya jaanɩ sɩ ba pa o di paarɩ Yisɩrayɛlɩ tɩʋ kʋm maama baŋa nɩ mʋ. Kʋ nan daɩ bantʋ yɩranɩ. Yisɩrayɛlɩ tiinǝ badonnǝ bam dɩ maama bʋbʋŋɩ yɩ dɩdʋa mʋ, sɩ ba pa Davidi paarɩ dɩm. 39 Nɔɔna bantʋ maama dɛɛn maŋɩ Davidi tee nɩ mʋ da yatɔ ba di wʋdi-fɔrɔ candiə. Bɛŋwaanɩ, ba cʋrrʋ tɩm dɛɛn pɛ-ba ba na lagɩ kʋlʋ tɩn maama mʋ. 40 Ba nu-biə badonnǝ na wʋ Yisakaarɩ, dɩ Zabulɔn, dɩ Nɛfitali dwiə yam maama laŋa nɩ tɩn dɩ ma la wʋdiiru zanzan ba tʋŋɩ ba pa-ba sɩ ba taa di. Ba dɛɛn mɛ bɩnɛ, dɩ yogondə, dɩ bɩna-sise, dɩ na-bɛ ba zɩŋɩ wʋdiiru tɩm ba ba ba pa-ba. Wʋdiiru tɩm maa yɩ muni, dɩ kapɩrɩ-kʋra, dɩ maasa, dɩ sana, dɩ nugə, kʋ ta wǝli dɩ na-balɩ, dɩ peeni. Bɛŋwaanɩ Yisɩrayɛlɩ tɩʋ kʋm maama nɩ mʋ ba dɛɛn di ywəəni lanyɩranɩ.