11
Yisɩrayɛlɩ tiinə kɔgɔ kʋm maama dɛɛn ve Ebrɔn mʋ. Ba ma ta dɩ Davidi ba wɩ: «Nii mʋ. Dɩbam maama dɩdaanɩ nmʋ yɩ yɩra dɩdʋa dɩ jana dɩdʋa mʋ. 2 Faŋa yɩ Sooli ta yɩ dɩbam maama pɛ tɩn, nmʋ mʋ yɩ wʋlʋ na tɔgɩ dɩ́ yigə pa dɩ́ ve dɩ́ kɩ najara dɩ dɩ́ dʋna tɩn. Nmʋ Tu Baŋa-Wɛ nan ya maŋɩ DƖ ta dɩ nmʋ DƖ wɩ: ‹Nmʋ mʋ wʋ́ ji a nɔɔna Yisɩrayɛlɩ tiinə bam yuutu yɩ n nii ba baŋa nɩ nɩ nayɩrʋ te.› »3 Kʋntʋ tɩn, Yisɩrayɛlɩ nakwa bam maama dɛɛn jeeri Pɛ Davidi tee nɩ Ebrɔn nɩ mʋ. Baŋa-Wɛ yigə nɩ mʋ Davidi kɩ ni-mɔrɔ dɩ ba. Ba laan ma lo nugə o yuu nɩ sɩ o taa yɩ Yisɩrayɛlɩ tiinə bam maama pɛ, nɩ Baŋa-Wɛ ya na tagɩ dɩ Samowɛlɩ nɩ kʋʋ́ kɩ te tɩn.
Davidi wanɩ o joŋi Zeruzalɛm
4 Yebusi tiinə dɛɛn mʋ zʋʋrɩ Zeruzalɛm tɩʋ kʋm nɩ.a Tɩʋ kʋm yɩrɩ dɩdoŋ dɛɛn yɩ Yebusi mʋ. Davidi dɩdaanɩ Yisɩrayɛlɩ tiinə jar-kərə bam maama ma zaŋɩ ba vu Zeruzalɛm sɩ ba li tɩʋ kʋm. 5 Yebusi tiinə bam ma ta dɩ Davidi ba wɩ: «Abam bá na cwǝŋǝ á zʋ yo seeni.» Dɩ kʋntʋ dɩ, Davidi wanɩ Siyɔn o di. Siyɔn dɛɛn yɩ tɩʋ kʋm dam jǝgǝ mʋ. Nɔɔna laan maa jɩgɩ je sɩm kʋntʋ ba bǝi nɩ: ‹Davidi tɩʋ›.
6 Davidi ya tagɩ o wɩ: «Wʋlʋ na tɔgɩ jar-kərə bam yigə o zaŋɩ najara dɩ Yebusi tiinə bam, kʋ tu wʋ́ ji ba yigə tu.» Zeruya bu Zoabɩ mʋ yɩ wʋlʋ na puli o ja najara yam tɩn. Kʋntʋ ŋwaanɩ wʋntʋ sɩɩnɩ o ji jar-kərə bam yigə tu.
7 Davidi na di tɩʋ kʋm dam jǝgǝ kam tɩn, mʋ o lɛɛrɩ o maŋɩ da o zʋʋrɩ kʋ wʋnɩ. Kʋntʋ ŋwaanɩ mʋ ba bəŋi kʋ yɩrɩ ba wɩ: ‹Davidi tɩʋ›. 8 O ma zɩgɩ mɛ tɩga kam na suuri ka maŋɩ daanɩ tɩn o joori o lɔ tɩʋ kʋm o zɩgɩ o kaagɩ jǝgǝ kam. Tɩʋ kʋm je sɩlʋ ta na daarɩ tɩn mʋ Zoabɩ fɔgɩ o lɔ. 9 Davidi dam dɩm dɛɛn ma fɔgɩ dɩ puli dɩ kɩ da, Paŋwa Tu Baŋa-Wɛ dɩm na wʋ o tee nɩ tɩn ŋwaanɩ.
Pamaŋ-bɩbɛ sɩlʋ na wǝli Pɛ Davidi tɩn
10 Nɔɔna bantʋ dɛɛn mʋ yɩ Pɛ Davidi pamaŋ-babɛ sɩm yigǝ tiinǝ. Ba ma tɔgɩ dɩ Yisɩrayɛlɩ tiinə bam maama ba zɩgɩ Davidi kwaga nɩ, pa o laan ba o di paarɩ tɩga kam maama baŋa nɩ, nɩ Baŋa-Wɛ na maŋɩ o goni ni nɩ: kʋʋ́ kɩ te tɩn.
11 Pamaŋ-babɛ sɩm yɩra mʋ tɩntʋ:
Hakimoni tu Yasobɛmɩ dɛɛn mʋ yɩ ‹Pamaŋ-bɩbɛ sɩtɔ sɩm› yigə tu wʋm. O dɛɛn jeeri nɔɔna biə-yatɔ (300) mʋ dɩ jara. O ma kwe o cicwe o ma gʋ ba maama jara-kǝm bɩdwɩ baŋa nɩ.
12 Wʋlʋ na saŋɩ wʋntʋ kwaga pamaŋ-bɩbɛ sɩtɔ sɩm wʋnɩ tɩn dɛɛn yɩ Awoyi tu Dodo bu Eleyazaarɩ mʋ.
13 Dɛ dɩdʋa Filisi tiinə bam na gilimi Pasɩ-Damim nɩ najara ŋwaanɩ tɩn, Eleyazaarɩ wʋ Davidi tee nɩ mʋ. Je sɩm kʋntʋ nɩ nɔɔna dugi caarab mʋ ba kara nɩ. Dáanɩ mʋ Yisɩrayɛlɩ jar-kərə bam titwəni ba duri sɩ ba lu Filisi tiinə bam jɩŋa nɩ. 14 Davidi dɩ Eleyazaarɩ ma zɩgɩ kara kam tɩtarɩ nɩ ba kwaanɩ ba kɩ jara yam ka ŋwaanɩ. Ba ma gʋ Filisi tiinə bam zanzan. Baŋa-Wɛ dɛɛn ma pa Yisɩrayɛlɩ tiinə bam di wɔnɔ zanzan.
15 Dɛ dɩdʋa mʋ pamaŋ-bɩbɛ fiintɔ sɩm wʋnɩ sɩtɔ dɛɛn ve Davidi te, o na səgi Adulamɩ piu bɔɔnɩ wʋnɩ tɩn. Filisi tiinə jar-kərə kɔgɔ kʋdoŋ ya tu ba kikili Refayim bolo kʋm nɩ. 16 Ba kɔgɔ kʋdoŋ dɩ ya joŋi Betelɩhɛm tɩʋ kʋm mʋ ba wʋra. Kʋntʋ maama dɩdaanɩ Davidi ya wʋ o piu kʋm dalɩm je sɩm nɩ mʋ. 17 Davidi wʋbʋŋa ma tiini ya ja o tɩtɩ tɩʋ kʋm yɩ o ta o wɩ: «Wɔɔ mʋ wʋ́ zaŋɩ o vu Betelɩhɛm sɩ o mɔ na vʋlɩ dɩlʋ na tigi tɩʋ kʋm manchoŋo ni nɩ tɩn wʋnɩ o ja o ba o pa-nɩ sɩ a nyɔ?» 18 Pamaŋ-bɩbɛ sɩtɔ sɩm kʋntʋ ma lɩ ba tɔgɩ Filisi tiinə kɔgɔ kʋm wʋnɩ ba vu ba yi vʋlɩ dɩm ba mɔ na bam, yɩ ba joori ba ja-ba ba ba ba pa Davidi. Ba na joori tɩn, o ma vɩn sɩ o nyɔ na bam kʋntʋ. O ma lo-ba o yagɩ tɩga nɩ sɩ ba taa yɩ pɛɛrɩ ba pa Baŋa-Wɛ. 19 O ma ta o wɩ: «Amʋ Tu Wɛ, amʋ bá wanɩ a nyɔ na bantʋ! A na nyɔgɩ-ba, kʋ nyɩ dɩ a nyɔgɩ nɔɔna bantʋ jana mʋ, ba na sɛ sɩ ba ga ba ŋwɩa sɩ ba ma mɔ na bantʋ tɩn ŋwaanɩ.» O ma vɩn sɩ o nyɔ-ba.
Pamaŋ-bɩbɛ sɩtɔ sɩntʋ dɛɛn na tʋŋɩ te tɩn mʋ kʋntʋ.
20 Zoabɩ nyaanɩ Abisayi dɩ dɛɛn mʋ yɩ ‹Pamaŋ-bɩbɛ fiintɔ kʋm›c yigə tu. O ma kwe o cicwe o jeeri nɔɔna biə-yatɔ (300) jara wʋnɩ o gʋ. Kʋntʋ ŋwaanɩ o ma na yɩrɩ pamaŋ-bɩbɛ sɩtɔ sɩm yigə nɩ. 21 Wʋntʋ dɛɛn mʋ tiini o na yɩrɩ o dwǝni pamaŋ-bɩbɛ fiintɔ kʋm maama, yɩ o ji ba yigə tu. O nan wʋ wǝli pamaŋ-bɩbɛ sɩtɔ sɩm wʋnɩ.
22 Yehoyada bu Benaya dɩ dɛɛn yɩ jar-kəru mʋ na yɩ nɔn-babɩa. O nuŋi Kabezɩlɩ mʋ, yɩ o tʋŋɩ baarɩ zanzan.
Benaya dɛɛn gʋ Moabɩ pamaŋ-bɩbɛ sɩle. O ta ma tu goŋo wʋnɩ o gʋ nyoŋo dɛ dɩdʋa waarʋ na tiini tɩ wʋra maŋa kalʋ tɩn. 23 Benaya ta gʋ Ezipi nɔn-wagɩlɩ dɩdoŋ mʋ. Nɔɔnʋ wʋm dɩdwarɩm dɛɛn yɩ kantɩ ni maŋɩm kuni bɩnu, yɩ o ze cicwe na maŋɩ dɩ bəŋə tɩn mʋ. Yɩ kʋ daarɩ Benaya jɩgɩ da-lɔŋɔ. O ma vu o vrɩ cicwe dɩm Ezipi tu wʋm jɩŋa nɩ, o joori o ma-dɩ o zɔ‑o o gʋ. 24 Yehoyada bu Benaya dɛɛn na tʋŋɩ te tɩn mʋ kʋntʋ. O dɩ ma na yɩrɩ pamaŋ-bɩbɛ sɩtɔ sɩm yigə nɩ. 25 O ma tiini o na yɩrɩ pamaŋ-bɩbɛ fiintɔ kʋm wʋnɩ, yɩ o wʋ tɔgɩ o wǝli pamaŋ-bɩbɛ sɩtɔ sɩm wʋnɩ. Davidi ma pa Benaya ji balʋ na yɩr-o tɩn yigə tu.
26 Pamaŋ-babɛ sɩm sɩdaara yɩra mʋ tɩntʋ:
Zoabɩ nyaanɩ Azayɛlɩ.
Betelɩhɛm tu Dodo bu Elanan.
27 Harɔrɩ tu Samɔtɩ.
Peloni tu Helezɩ.
28 Tekoa tu Ikɛsɩ bu Yirǝ.
Anatɔtɩ tu Abizeri.
29 Usati tu Sibekayi.
Awoyi tu Yilayi.
30 Netofa tu Maharayi.
Netofa tu Baana bu Heledi.
31 Ribayi bu Itayi, na nuŋi Gibea tɩʋ Bɛnzamɛn laŋa kam nɩ tɩn.
Piratɔnɩ tu Benaya.
32 Hurayi na nuŋi Gaasa bu-tʋlɩ sɩm seeni tɩn.
Araba tu Abɩyɛlɩ.
33 Barum tu Azɩmavɛtɩ.
Saalebon tu Eliaba.
34 Gizon tu Hasem biə.
Ararɩ tu Sagɩa bu Zonatan.
35 Ararɩ tu Sakarɩ bu Ahiyam.
Uri bu Elifalɩ.
36 Mekera tu Hefɛrɩ.
Peloni tu Ahiya.
37 Karmɛlɩ tu Esirayi.
Ezibayi bu Naarayi.
38 Natan nyaanɩ Zowɛlɩ.
Hagarɩ bu Mibaarɩ.
39 Amɔn tu Selɛkɩ.
Beerotɩ tu Narayi.
Wʋntʋ dɛɛn ze Zeruya bu Zoabɩ jara zɩla yam mʋ.
40 Yetɛrɩ tu Yirǝ.
Yetɛrɩ tu Garɛbɩ.
41 Hɛtɩ tu Yuri.
Alayi bu Zabadɩ.
42 Ruban dwi tu Siza bu Adina.
Wʋntʋ dɛɛn yɩ Ruban dwi tiinə yigə tu, yɩ o jɩgɩ kwaga nɔɔna fiintɔ.
43 Maaka bu Hanan.
Mitini tu Zosafatɩ.
44 Astarɔtɩ tu Yozɩasɩ.
Aroyɛrɩ tu Hotam biə bale, Sama dɩdaanɩ Yeyiyɛlɩ.
45 Tizi tu Yediayɛlɩ bu Simiri, dɩ o nyaanɩ Yoa.
46 Mahavi tu Eliɛlɩ.
Elinaam biə bale, Yeribayi dɩdaanɩ Yosavia.
Moabɩ tu Yitama.
47 Eliɛlɩ, dɩ Obɛdɩ, dɩ Mezoba tu Yaaseli.