Davidi jigi Yisɩrayɛlɩ tiinə bam maama pɛa
5
Yisɩrayɛlɩ dwi tiinə bam maama dɛɛn ve Ebrɔn mʋ. Ba ma ta dɩ Davidi ba wɩ: «Nii mʋ. Dɩbam maama dɩdaanɩ nmʋ yɩ yɩra dɩdʋa dɩ jana dɩdʋa mʋ. 2 Faŋa yɩ Sooli ta yɩ dɩbam maama pɛ tɩn, nmʋ mʋ yɩ wʋlʋ na tɔgɩ dɩ́ yigə pa dɩ́ ve dɩ́ kɩ najara dɩ dɩ́ dʋna tɩn. Baŋa-Wɛ nan ya maŋɩ DƖ ta dɩ nmʋ DƖ wɩ: ‹Nmʋ mʋ wʋ́ ji a nɔɔna Yisɩrayɛlɩ tiinə bam yuutu yɩ n nii ba baŋa nɩ nɩ nayɩrʋ te.› »b3 Kʋntʋ tɩn, Yisɩrayɛlɩ nakwa bam maama dɛɛn jeeri Pɛ Davidi tee nɩ Ebrɔn nɩ mʋ. Baŋa-Wɛ yigə nɩ mʋ Davidi kɩ ni-mɔrɔ dɩ ba. Ba laan ma lo paarɩ nugə o yuu nɩ sɩ o taa yɩ Yisɩrayɛlɩ tiinə bam maama pɛ.
4 Davidi dɛɛn jɩgɩ bɩna fiintɔ mʋ yɩ ba tiŋ‑o sɩ o ji pɛ. O ma di paarɩ dɩm bɩna fiinna. 5 O ya jǝni Ebrɔn nɩ o di paarɩ Zuda dwi tiinə baŋa nɩ bɩna yarpɛ dɩ cicoro mʋ, yɩ o daarɩ o vu o jǝni Zeruzalɛm nɩ o di Yisɩrayɛlɩ tiinə dɩdaanɩ Zuda tiinə maama paarɩ bɩna fiintɔ-yatɔ.
Davidi na di Zeruzalɛm te tɩn
1 Wǝǝnu Kɩbarɩ tɔnɔ 11:4-9
6 Yebusi tiinə dɛɛn mʋ zʋʋrɩ Zeruzalɛm tɩʋ kʋm nɩ. Davidi dɩdaanɩ o jar-kərə bam ma zaŋɩ ba vu Zeruzalɛm sɩ ba kɩ najara dɩ Yebusi tiinə bam. Nɔɔna bam kʋntʋ maa wʋ jeeli nɩ Davidi wʋ́ wanɩ o di ba tɩʋ kʋm. Kʋntʋ ŋwaanɩ ba dɛɛn mwan-o yɩ ba ta ba wɩ: «Lilwǝ dɩ gwanɩ tɩtɩ wʋ́ wanɩ ba cɩ abam sɩ á yɩ zʋ yo seeni.» 7 Dɩ kʋntʋ dɩ, Davidi wanɩ Siyɔn o di. Kʋ dɛɛn yɩ tɩʋ kʋm dam jǝgǝ mʋ. Nɔɔna laan maa jɩgɩ je sɩm kʋntʋ ba bǝi nɩ: ‹Davidi tɩʋ›.
8 Dɛ dɩm kʋntʋ nɩ Davidi dɛɛn tagɩ dɩ o nɔɔna bam o wɩ: «Nɔɔnʋ na bʋŋɩ sɩ o wanɩ Yebusi tiinə bam, kʋntʋ tu wʋ́ tɔgɩ piu bɔɔnɩ na-cwəŋə kam mʋ o zʋ tɩʋ kʋm o yi-ba. Amʋ tiini a culi-ba, dɩ ba na maŋɩ ba yɩ gwanɩ dɩ lilwǝ tɩn!» Kʋntʋ ŋwaanɩ nan mʋ ba tɛ ba taanɩ ba wɩ: ‹Lilwǝ dɩdaanɩ gwanɩ bá na cwǝŋǝ sɩ ba zʋ pɛ sɔŋɔ kʋm wʋ.›
9 Davidi na di tɩʋ kʋm dam jǝgǝ kam tɩn, mʋ o lɛɛrɩ o maŋɩ da o zʋʋrɩ kʋ wʋnɩ. O ma bəŋi kʋ yɩrɩ wɩ: ‹Davidi tɩʋ›. O ma zɩgɩ mɛ tɩga kam na suuri ka maŋɩ daanɩ tɩn o joori o lɔ tɩʋ kʋm o zɩgɩ o kaagɩ jǝgǝ kam maama. 10 Davidi dam dɩm dɛɛn ma fɔgɩ dɩ puli dɩ kɩ da, Paŋwa Tu Baŋa-Wɛ dɩm na wʋ o tee nɩ tɩn ŋwaanɩ.
11 Tiiri tɩʋ Pɛ Hiramɩ dɛɛn ma tʋŋɩ nɔɔna Davidi tee nɩ sɩ ba kɩ pipiu daanɩ.c O ma pa ba ja Sɛdrɩ dɛ ba vu ba pa‑o. O ta ma pa da-lwara, dɩ kandwa-cɩrna tɔgɩ ba vu, pa ba lɔ pɛ sɔŋɔ ba pa Davidi. 12 Davidi ma lwarɩ nɩ Baŋa-Wɛ mʋ sɩɩnɩ DƖ pa o di Yisɩrayɛlɩ tɩʋ paarɩ, yɩ DƖ ta daarɩ DƖ pa o paarɩ dɩm fɔgɩ dɩ puli lanyɩranɩ Wɛ tɩtɩ nɔɔna Yisɩrayɛlɩ tiinə bam ŋwaanɩ.
13 Davidi na zɩgɩ Ebrɔn nɩ o vu o zʋʋrɩ Zeruzalɛm nɩ tɩn, mʋ o daa ta di ka-bi zanzan o wǝli o kaana bam wʋnɩ. Ba ma lʋ biə zanzan, bəkəri dɩ bɩsankam, ba pa‑o. 14 Biə balʋ Davidi na lʋgɩ Zeruzalɛm nɩ tɩn yɩra mʋ tɩntʋ:
Samʋa, dɩ Sobabɩ, dɩ Natan, dɩ Salomɔn, 15 dɩ Yɩbarɩ, dɩ Elisʋa, dɩ Nefɛgɩ, dɩ Yafɩa, 16 dɩ Elisama, dɩ Ɛlyada, dɩdaanɩ Elifelɛtɩ.
Davidi di Filisi tiinə bam
17 Filisi tiinə bam dɛɛn ma ni nɩ ba tiŋi Davidi sɩ o taa yɩ Yisɩrayɛlɩ tiinə pɛ. Ba ma la ba jar-kərə bam maama ba kɩ daanɩ ba vu ba beeri o jǝgǝ sɩ ba ja. Davidi ma lwarɩ kʋ ni nɩ yɩ o nuŋi tɩʋ kʋm nɩ o vu o səgi dalɩm je sɩm nɩ. 18 Filisi tiinə bam ma ba ba yi Refayim bolo kʋm. Ba ma maŋɩ da ba faarɩ je sɩm maama. 19 Davidi ma bwe Baŋa-Wɛ o wɩ: «A ve a jeeri Filisi tiinə bam dɩ najara, sɩ nmʋ wʋ́ kɩ-ba a jɩŋa nɩ na?» Baŋa-Wɛ ma lǝr-o DƖ wɩ: «Ɛɛn, zaŋɩ n vu n jeeri-ba, sɩ amʋ wʋ́ sɩɩnɩ a kɩ-ba n jɩŋa nɩ.»
20 Davidi ma vu o yi Baalɩ Perazim o jeeri Filisi tiinə bam. O ma wanɩ-ba o di. O laan ma ta o wɩ: «Baŋa-Wɛ magɩ DƖ pʋrɩ a dʋna bam baŋa nɩ mʋ DƖ zəli-ba, nɩnɛɛnɩ na na magɩ ba pʋrɩ te tɩn.» Ba ma lɛɛrɩ ba jɩgɩ je sɩm kʋntʋ ba bǝi nɩ ‹Baalɩ Perazim›. d 21 Dáanɩ mʋ Filisi tiinə bam duri ba daarɩ ba jwǝnǝ yam ba yagɩ. Davidi dɩ o nɔɔna bam ma pɛ-ya ba ja ba viiri.
22 Kʋ na kɩ da fɩnfɩɩn tɩn, Filisi jar-kərə bam daa ta ma joori ba ba ba faarɩ Refayim bolo kʋm maama. 23 Davidi daa ma bwe Baŋa-Wɛ sɩ o lwarɩ o na wʋ kɩ te tɩn. Wɛ maa wɩ o yɩ zaŋɩ o bɛ o jeeri-ba. O kaagɩ-ba o vu o kɛ ba kwaga seeni, sɩ oó vu o tʋ ba baŋa nɩ, tweeru tɩlʋ ba na ma ba bəi sɩ murie tɩn ni seeni. 24 Ta n nii tweeru tɩm yuu nɩ. Nmʋ na tu n ni kʋ dwana dɩ baŋa nɩ, sɩ n laan zaŋɩ n jeeri-ba. Kʋ brɩ nɩ amʋ Baŋa-Wɛ tɩtɩ mʋ dɛ á yigə sɩ a jeeri Filisi tiinə bam dɩ najara sɩ a di-ba.»
25 Davidi ma sɩɩnɩ o kɩ kʋlʋ Baŋa-Wɛ na brɩ-o sɩ o kɩ tɩn. Kʋ ma pa o wanɩ Filisi tiinə bam o di. O ma zɩgɩ Gabawɔn nɩ o zəli-ba o vu o yi Gezɛrɩ.