Ba na gʋ Isi-Bosɛtɩ te tɩn
4
Sooli bu Isi-Bosɛtɩ dɛɛn ma ni nɩ ba gʋ Abenɩra Ebrɔn wʋnɩ. O vwana ma parɩ, yɩ fʋʋnɩ dɩ zʋ Yisɩrayɛlɩ tiinə bam maama kʋ ŋwaanɩ. 2 Isi-Bosɛtɩ dɛɛn jɩgɩ jar-kərə yigǝ tiinǝ bale na yɩ Beerotɩ tu Rimɔn biə. Ba yɩra maa yɩ Baana dɩ Rekabi. Ba yɩ Bɛnzamɛn dwi tiinə mʋ. Ba dɛɛn jeeli Beerotɩ tɩʋ kʋm ba kɩ Bɛnzamɛn laŋa kam wʋnɩ mʋ. 3 Bɛŋwaanɩ, balʋ dɛɛn ya na zʋʋrɩ Beerotɩ nɩ tɩn duri mʋ ba vu ba zʋʋrɩ Gitayim tɩʋ nɩ. Ba nan yɩ vərə mʋ tɩʋ kʋm kʋntʋ nɩ dɩ zɩm maama.4 Sooli bu Zonatan dɛɛn jɩgɩ bu o yɩrɩ na yɩ Mefibosɛtɩ.a O nɛ dɛɛn ba sɛa. Maŋa kalʋ o na jɩgɩ bɩna yanu tɩn, mʋ ba jaanɩ Sooli dɩ Zonatan luə taanɩ ba nuŋi Zizreyɛlɩ tɩʋ wʋnɩ ba ba. Ba na ni tɩn mʋ kaanɩ wʋlʋ na jɩgɩ Mefibosɛtɩ o nii tɩn kwe‑o sɩ o ja o duri o lu. O na tiini o lagɩ lɩla tɩn, bu wʋm ma vrɩ o jɩŋa nɩ o kwǝri o tʋ tɩga nɩ pa o ji gɔrɔ.
5 Dɛ dɩdwɩ wapuli dɩm na tiini ka dana tɩn, mʋ Isi-Bosɛtɩ tigi o digə nɩ o siə. Rimɔn biə Rekabi dɩ Baana ma vu ba yi o sɔŋɔ kʋm. 6-7 Ba ma zʋ sɔŋɔ kʋm wʋnɩ ba kɩ nɩnɛɛnɩ ba lagɩ ba beeri muni mʋ. Ba ma zʋ o digə kam wʋ dɩ o tigi o dɔ mʋ o gadogo baŋa nɩ. Ba ma kwe sʋgʋ ba zɔ o pugə nɩ ba gʋ. Ba ma goni o yuu, yɩ ba ja-kʋ ba joori ba liisi ba viiri. Tɩtɩɩ dɩm kʋntʋ nɩ, ba ma yɔɔrɩ ba kwe Zʋrdɛn bolo cwǝŋǝ kam ba vu taa ba pʋʋrɩ tɩga. 8 Ba ma ja Isi-Bosɛtɩ yuu kʋm ba vu Ebrɔn. Ba ma zʋ Pɛ Davidi te yɩ ba ta dɩd-o ba wɩ: «Nii, nmʋ dʋnʋ Sooli bu Isi-Bosɛtɩ yuu mʋ tɩntʋ. Sooli dɛɛn kwaanɩ sɩ o gʋ nmʋ mʋ, yɩ zɩm dɛ dɩntʋ Baŋa-Wɛ ŋwɩ n jɩnɩ Sooli dɩ o dwi dɩm maama baŋa nɩ DƖ pa‑m.»
9 Davidi ma ləri Rekabi dɩ o nyaanɩ Baana o wɩ: «Ŋwɩa Tu Baŋa-Wɛ yɩ dɩlʋ na joŋi amʋ DƖ yagɩ cam maama wʋnɩ tɩn mʋ. Amʋ nan dugi Dɩntʋ yɩrɩ ŋwaanɩ nɩ: á maŋɩ sɩ á tɩ mʋ! 10 Nɔɔnʋ wʋdoŋ dɛɛn tu o ta dɩ amʋ nɩ Sooli tɩga. Kʋ tu ya bʋŋɩ sɩ kwər-ywəŋə mʋ o tagɩ o brɩ-nɩ sɩ o joŋi ŋwɩɩrʋ dɩ ŋwaanɩ. A ma pa ba ja-o ba gʋ Zikalagɩ nɩ sɩ kʋ taa yɩ o ŋwɩɩrʋ!b 11 Abam nan zʋ nɔn-ŋʋm digə á gʋ-o o pwəgə je nɩ yɩ o dɔa. Á na tʋŋɩ pu-sɩŋa kikiə yalʋ tɩn, kʋʋ́ taa yɩ tɛ mʋ á yɩra nɩ? Amʋ dugi nɩ amʋ dɩ wʋ́ gʋ abam mʋ sɩ kʋ ləri nɔɔnʋ wʋm tʋʋnɩ dɩm yuu nɩ, pa á yɩra je lʋgʋ baŋa nɩ.»
12 Davidi ma pa o nɔɔna bam ni sɩ ba gʋ-ba. Ba ma gʋ-ba yɩ ba daarɩ ba goni ba jɩn dɩ ba nɛ. Ba ma kwe ba yɩra yam ba vu ba palɩ ba yagɩ Ebrɔn bugə kam ni nɩ. Ba ma daarɩ ba kwe Isi-Bosɛtɩ yuu kʋm ba ja ba vu ba kɩ Abenɩra yibeeli dɩm na wʋ Ebrɔn nɩ tɩn wʋnɩ.