3
Tigurə dɛɛn ma lɛɛrɩ ka pəni Sooli digə kam dɩ Davidi digə kam tɩtarɩ nɩ ka daanɩ. Davidi digə kam ma yɔɔrɩ ka naɩ dam dɛ maama ka wǝli da, yɩ kʋ daarɩ Sooli digə tiinə bam bwəm dɛ maama.
2 Davidi ta na wʋ Ebrɔn nɩ tɩn, mʋ o lʋgɩ o biə bardʋ bantʋ:
O bu-kwɩan kam mʋ yɩ Aminɔnɩ. Wʋntʋ nu maa yɩ Zizreyɛlɩ tiinə bukɔ Ahinoam.
3 Kilɩabɩ ma saŋɩ. O nu yɩ Abigayɛlɩ mʋ, o na yɩ Karmɛlɩ tu Na-balɩ kadəm wʋm tɩn.
Absalɔn maa yɩ o biə batɔ tu. O nu dɛɛn yɩ Gesuri tɩʋ pɛ Taliməyi bukɔ Maaka mʋ.
4 Adoniya maa yɩ o biə bana tu. O nu yɩ Hagiti.a
Sefatɩa maa yɩ biə banu tu. O nu yɩ Abitali.
5 Davidi biə bardʋ tu maa yɩ Yitrɩyam. O dɩ nu dɛɛn yɩ Egɩla mʋ.
Mʋ biə balʋ Davidi na lʋgɩ Ebrɔn nɩ tɩn.
Abenɩra gɔgɩ o zʋ Davidi kɔgɔ kʋm wʋnɩ
6 Maŋa kalʋ tigurə kam na tigi Sooli digə kam dɩ Davidi digə kam tɩtarɩ nɩ tɩn, Abenɩra ma ba o jɩgɩ dam zanzan Sooli kwaga nɔɔna bam maama wʋnɩ. 7 Sooli nan ya jɩgɩ o ka-biə wʋdoŋ, o yɩrɩ na yɩ Risipa. Wʋntʋ maa yɩ Aya bukɔ. Dɛ dɩdwɩ Sooli bu Isi-Bosɛtɩ ma ta dɩ Abenɩra o wɩ: «Bɛɛ mʋ kɩ yɩ n vu n pəni dɩ a ko ka-biə kam?»
8 Isi-Bosɛtɩ taanɩ dɩm ma fuli Abenɩra wʋʋ zanzan. O ma lǝr-o o wɩ: «Nmʋ pɛ cɩga nɩ amʋ yɩ bɩbarɩ nyɩm mʋ na? Amʋ wʋ́ yəgi Sooli kwaga nɔɔna bam a kɩ Zuda tiinə jɩŋa nɩ na? Dɩ zɩm maama, a tiini a kwe a cɩga maama mʋ a pa n ko Sooli, dɩ o digə tiinə dɩdaanɩ o badonnǝ maama. Amʋ nan mʋ cɩgɩ Davidi pa o ta wʋ di nmʋ, yɩ n laan kwe kaanɩ wʋntʋ taanɩ n ja n jeeri-nɩ. 9-10 Baŋa-Wɛ dɛɛn goni ni DƖ tiŋi dɩ Davidi DƖ wɩ: oó joŋi paarɩ dɩm Sooli dwi dɩm tee nɩ o pa Davidi. Wɛ nan wʋ́ pa a na a lɛɛrʋ, nɩnɛɛnɩ a na wʋ pɛ ni-gonim dɩm kʋntʋ sɩɩnɩ dɩ kɩ. Amʋ laan wʋ́ wǝli Davidi sɩ o di paarɩ Zuda tiinə dɩ Yisɩrayɛlɩ tiinə bam maama baŋa nɩ, kʋ na zɩgɩ Dan laŋa kam seeni sɩ kʋ yi Bɛɛr-Seba tɩn.» 11 Isi-Bosɛtɩ ma ga ni sɩ o puri dɩ Abenɩra, o na tiini o kwar-o tɩn ŋwaanɩ.
12 Abenɩra ma tʋŋɩ nɔɔna Davidi tee nɩ o wɩ: «Tɩʋ kʋm maama yɩ wɔɔ nyɩm mʋ, yɩ kʋ daɩ nmʋ? Nan sɛ sɩ nmʋ dɩ amʋ kɩ ni-mɔrɔ daanɩ, sɩ a ja Yisɩrayɛlɩ tiinə bam maama a ba a kɩ n kwaga nɩ.» 13 Davidi ma joori o lǝr-o o wɩ: «Nmʋ taanɩ dɩm lamma. N nan na lagɩ sɩ dɩ́ fɔgɩ dɩ́ kɩ ni-mɔrɔ daanɩ, sɩ n na bɩɩnɩ, sɩ n ja Sooli bukɔ Mikalɩ n joori n ja n ba n pa-nɩ.»
14 Davidi ma daarɩ o tʋŋɩ nɔɔna Isi-Bosɛtɩ tee nɩ o wɩ: «Joori n pa-nɩ a kaanɩ Mikalɩ. A dɛɛn gʋ Filisi tiinə bi mʋ sɩ a wan‑o a di a ma kɩ a kaanɩ.»b
15 Mikalɩ dɛɛn nan ya zʋ Layisi bu Paliti mʋ. Isi-Bosɛtɩ ma pa ba vu ba joŋi Mikalɩ o tee nɩ. 16 Ba na maa kɛ tɩn, Paliti ma tɔgɩ Mikalɩ kwaga yɩ o keeri taan o vu o yi Bawurim tɩʋ kʋm. Abenɩra ma bag‑o o nɩ: o joori sɔŋɔ! O ma pipiri o joori.c
17 Abenɩra ma vu Yisɩrayɛlɩ nakwa bam te o ta dɩ ba o wɩ: «Maŋa kalʋ abam na bʋŋɩ sɩ Davidi taa yɩ á pɛ tɩn, kʋ daɩ zɩm. 18 Cwǝŋǝ laan tigə sɩ á kɩ á wʋbʋŋa na lagɩ te tɩn. Nan yɩ swe-na nɩ Baŋa-Wɛ ya maŋɩ DƖ goni ni sɩ DƖ tɔgɩ DƖ tɩntʋŋnʋ Davidi baŋa nɩ DƖ joŋi DƖ nɔɔna Yisɩrayɛlɩ tiinə bam DƖ yagɩ Filisi tiinə bam dɩ dɩ́ dʋna maama jɩŋa nɩ mʋ.»
19 Abenɩra tɩtɩ ma vu o ŋɔɔnɩ dɩ Bɛnzamɛn dwi tiinə bam. O laan ma daarɩ o vu Ebrɔn sɩ o lwǝni kʋlʋ na kɩ tɩn o brɩ Davidi, sɩ o taa ye Yisɩrayɛlɩ tiinə dɩ Bɛnzamɛn tiinə bam maama na bʋŋɩ sɩ ba kɩ te tɩn. 20 Abenɩra ma ja nɔɔna fiinle o kɩ o kwaga nɩ yɩ ba vu Ebrɔn. Ba na yi da tɩn, mʋ Davidi pɛ ba kɩ candiə kamunu ba pa-ba. 21 Kʋ kwaga nɩ mʋ Abenɩra dɛɛn tagɩ dɩ Davidi o wɩ: «Pɛ, pa-nɩ cwǝŋǝ sɩ a vu a la Yisɩrayɛlɩ tiinə bam a kɩ daanɩ sɩ ba jeeri‑m. Ba laan maa wʋ́ kɩ ni-mɔrɔ dɩ nmʋ sɩ n ta n yɩ ba pɛ, n di paarɩ tɩga kam maama nɩ, nɩ n wʋbʋŋa na lagɩ te tɩn.» Davidi ma banɩ Abenɩra o yagɩ cwǝŋǝ nɩ, pa o joori o viiri dɩ o yazurə.
22 Zoabɩ dɩ Davidi jar-kərə bam dɛɛn ya ve najara kǝm nɩ mʋ. Ba ma vrɩ jɩjɩgɩrʋ zanzan ba dʋna tee nɩ ba ja joori sɔŋɔ. Ba na yi Ebrɔn tɩn dɩdaanɩ Abenɩra daa tǝrǝ. O dɩ Davidi ŋɔɔnɩ ba ti mʋ, yɩ pɛ wʋm pa o viiri dɩ o yazurə. 23 Zoabɩ dɩdaanɩ o kwaga kam na yɔɔrɩ ba yi tɩn, mʋ nɔɔnʋ tag‑o o nɩ: «Nera bu Abenɩra ya tu yo seeni o na Pɛ, yɩ o pa o joori o viiri dɩ o yazurə.»
24 Zoabɩ ma vu o zʋ Davidi te yɩ o wɩ: «Abenɩra na tu nmʋ te tɩn, bɛɛ mʋ yɩ n yag-o pa o joori o viiri mwalɩ mwalɩ? 25 Nmʋ maŋɩ n ye Abenɩra na yɩ wʋlʋ. O tu sɩ o ŋɔ n swan mʋ o nii, sɩ o lwarɩ n na-vəli dɩdaanɩ kʋlʋ maama n na jɩgɩ n kɩ tɩn.»
26 Zoabɩ ma nuŋi da Davidi tee nɩ, yɩ o vu o tʋŋɩ nɔɔna Abenɩra kwaga nɩ sɩ ba ja-o ba joori. Ba ma beer‑o ba na Sira vʋlɩ dɩm seeni. Ba ma ja-o ba joori, yɩ Davidi yǝri kʋ ni nɩ. 27 Abenɩra na joori o vu o yi Ebrɔn tɩn, mʋ Zoabɩ jaan‑o o fʋfɔ o vu gugoro kʋdoŋ nɩ, tɩʋ kʋm manco-pɩʋ ni nɩ. O ma kɩ nɩnɛɛnɩ o lagɩ sɩ ba bwɛ woŋo mʋ daanɩ. Dáanɩ mʋ o zɔg-o o pugə nɩ o gʋ, sɩ kʋ ŋwɩ Abenɩra na gʋ wʋntʋ cʋrʋ Azayɛlɩ tɩn jɩnɩ.d
28 Davidi dɛɛn na tu o lwarɩ nɩ Zoabɩ gʋ Abenɩra tɩn, o maa wɩ: «Baŋa-Wɛ wʋ́ zɩgɩ amʋ kwaga nɩ sɩ amʋ dɩ a nɔn-biə bam maama yigə tǝrǝ Abenɩra tʋʋnɩ dɩm wʋnɩ. 29 Abenɩra tʋʋnɩ dɩm jɩnɩ wʋ Zoabɩ dɩ o sɔŋɔ tiinə baŋa nɩ. Wɛ wʋ́ pa Zoabɩ dwi dɩm maama wʋnɩ, yawɩɩrʋ dwi dwi yɩ fɔgɩ tɩ ti sɩ kʋ taa ve wuu. Ŋwan-pwəm wʋ́ lɩ ba badonnǝ yɩra nɩ. Ba badonnǝ wʋ́ taa yɩ nanywaanʋ, dɩ gwaarʋe. Ba badonnǝ wʋ́ tɩ najara kǝm wʋnɩ. Ba badaara wʋ́ ga wʋdiu sɩ ba di.»
30 Kʋ dɛɛn dɛ kʋntʋ mʋ yɩ Zoabɩ dɩ o nyaanɩ Abisayi paalɩ ba gʋ Abenɩra. Kʋ nan yɩ o dɩ dɛɛn na gʋ ba cʋrʋ Azayɛlɩ Gabawɔn najara yam nɩ tɩn ŋwaanɩ mʋ ba kɩ kʋntʋ.
31 Davidi ma ta dɩ Zoabɩ dɩ o nɔɔna bam maama o wɩ: «Á maama kaarɩ-na á gwaarʋ, sɩ á daarɩ á zʋ gwar-zɩnzwara wʋ-cɔgɔ ŋwaanɩ. Dɩ́ maŋɩ sɩ dɩ́ di Abenɩra luə mʋ.» Davidi tɩtɩ ma pɛ Abenɩra na wʋ gandwa yalʋ baŋa nɩ tɩn kwaga o pu. 32 Ba ma kwe Abenɩra ba kɩ Ebrɔn wʋnɩ. Davidi ma maŋɩ o yibeeli dɩm nɩ o keeri zanzan. Nɔɔna bam maama dɩ ma tiini ba keeri. 33 Davidi dɛɛn dɛ kʋ ŋwaanɩ o leeni luə ləŋə kantʋ Abenɩra baŋa nɩ o wɩ:
«Abenɩra yɩ nɔn-joro mʋ,
pa o tɩ tʋʋnɩ dɩntʋ dwi na?
34 Abenɩra, ba wʋ vɔgɩ n jɩn sɩm.
Ba nan wʋ mɛ capʋnnʋ ba vɔ n nɛ dɩ.
Nmʋ yɔɔrɩ n tɩ nɔn-gʋra jɩŋa nɩ mʋ!»
Davidi na leeni ləŋə kam kʋntʋ tɩn, nɔɔna bam maama daa ma tʋ kərə nɩ. 35 Ba ma kwaanɩ sɩ ba koori Davidi sɩ o joori o di wʋdiu dɛ dɩm kʋntʋ nɩ. O ma vɩn yɩ o du durə o wɩ: «Amʋ na di wʋdiu yɩ Wɛ wʋ zʋ, sɩ Wɛ pa lɛɛrʋ yi-nɩ!»
36 Nɔɔna bam na maanɩ Davidi na kɩ te kʋntʋ tɩn, ba ma sɛ dɩ wʋpolo. Ba wʋʋ yǝni kʋ da kʋlʋ maama pɛ wʋm na kɩ tɩn mʋ. 37 Dɩntʋ dɛ dɩm nɩ, Zuda tiinə bam dɩ Yisɩrayɛlɩ tiinə bam maama ma lwarɩ nɩ: Abenɩra na tɩgɩ tɩn, kʋ daɩ Davidi yigə.
38 Davidi dɛɛn ma ta dɩ o nɔɔna bam o wɩ: «Abam wʋ maanɩ nɩ Yisɩrayɛlɩ tiinə nɔn-kamunu zɩm mʋ tɩgɩ na? 39 Amʋ zɩm yɩ Pɛ wʋlʋ Wɛ na kuri tɩn mʋ. Dɩ kʋntʋ dɩ, a nan tiini a bwǝnǝ mʋ lagɩ-lagɩ. Zeruya biə bale bam kʋntʋ tiini ba dana sɩ a wanɩ-ba a cɩ. Baŋa-Wɛ nan mʋ wʋ́ waarɩ-ba sɩ kʋ maŋɩ dɩ ba tɩtʋŋ-lwaannʋ tɩm!»f