Davidi jigi Zuda tiinə pɛ
2
Kʋntʋ kwaga nɩ, Davidi ma bwe Baŋa-Wɛ o wɩ: «A joori Zuda laŋa kam sɩ a vu a taa zʋʋrɩ ba tɩɩnɩ dɩm dɩdʋa nɩ na?» Baŋa-Wɛ ma lǝr-o DƖ wɩ «Ɛɛn, ve.»Davidi daa ma bwe‑o o wɩ: «Tɩʋ kɔɔ mʋ a nan wʋ́ vu?» Baŋa-Wɛ maa wɩ: «Ve Ebrɔn.»a
2 Davidi ma zaŋɩ o vu Ebrɔn sɩ o taa zʋʋrɩ da, o dɩ o kaana bale bam, Ahinoam dɩdaanɩ Abigayɛlɩ. Ahinoam nan ya nuŋi Zizreyɛlɩ nɩ mʋ, Abigayɛlɩ maa yɩ Karmɛlɩ tu Na-balɩ kadəm wʋm. 3 Davidi nɔɔna bam dɩ ba sɔŋɔ tiinə maama dɩ dɛɛn ma tɔgɩ dɩd-o ba vu ba zʋʋrɩ Ebrɔn tɩʋ kʋm dɩ kʋ nawuurə yam wʋnɩ. 4 Zuda tiinə nakwa bam ma vu Ebrɔn nɩ, yɩ ba lo paarɩ nugə Davidi yuu nɩ ba tiŋ‑o sɩ o taa yɩ Zuda tiinə pɛ.b
Davidi ma ni nɩ Yabɛsɩ Galadɩ tiinə mʋ kwe Sooli ba kɩ. 5 Davidi ma tʋŋɩ nɔɔna ba tee nɩ dɩ kwǝrǝ kantʋ yɩ o wɩ:
«Baŋa-Wɛ wʋ́ kɩ abam yu-yoŋo, dɩ á na brɩ á pɛ wʋm cɩga á kwe‑o á kɩ tɩn. 6 Amʋ nan sɔɔlɩ Baŋa-Wɛ mʋ a pa abam sɩ DƖ dɩ brɩ abam cɩga, DƖ daarɩ o kɩ abam lanyɩranɩ. Á kǝm-laa kʋntʋ ŋwaanɩ amʋ dɩ wʋ́ kɩ abam lanyɩranɩ.c 7 Sooli na tɩgɩ tɩn, nan ta jɩgɩ-na baarɩ, sɩ á daarɩ á taá dana! Lwarɩ-na nɩ Zuda tiinə bam tiŋi-nɩ mʋ sɩ a taa yɩ ba pɛ.»
Davidi sɔŋɔ kʋm dɩdaanɩ Sooli sɔŋɔ kʋm tɩtarɩ najara yam taanɩ
8 Nera bu Abenɩra dɛɛn mʋ yɩ Sooli jar-kərə bam yigə tu. Sooli na tɩgɩ tɩn, Abenɩra ma ja Sooli bu Isi-Bosɛtɩ o bɛ Zʋrdɛn bugə kam o lu o vu Mahanayimi.d 9 Abenɩra ma pa Isi-Bosɛtɩ di paarɩ Galadɩ tɩɩnɩ dɩm baŋa nɩ, dɩ Asuuri tiinə baŋa nɩ, dɩ Zizreyɛlɩ je sɩm baŋa nɩ, kʋ ta wǝli dɩ Efrayim dwi tiinə bam, dɩ Bɛnzamɛn dwi tiinə bam, dɩdaanɩ Yisɩrayɛlɩ tiinə badaara bam maama baŋa nɩ. 10 Isi-Bosɛtɩ dɛɛn jɩgɩ bɩna fiinna mʋ yɩ o puli sɩ o di paarɩ. O ma jǝni paarɩ dɩm wʋnɩ bɩna yale.
Kʋ daarɩ Zuda dwi tiinə bam ma pa Davidi cɩga sɩ o taa yɩ ba pɛ. 11 Davidi ma maŋɩ Ebrɔn nɩ o di paarɩ Zuda tiinə bam baŋa nɩ bɩna yarpɛ dɩ cicoro.
12 Dɛ dɩdwɩ Abenɩra dɩ Isi-Bosɛtɩ dɩdɛɛra bam ma zɩgɩ Mahanayimi nɩ ba vu Gabawɔn. 13 Zeruya bu Zoabɩ dɩ dɛɛn ma ja Davidi dɩdɛɛra bam o vu o jeeri Abenɩra dɩ o nɔɔna bam Gabawɔn bulə kam nɩ. Nɔɔnʋ maama dɩ o jar-kərə maa wʋ bulə kam bubɛ nɩ, kɔgɔ dɩdʋa wʋ bulə kam daa kadoŋ nɩ yɩ kɔgɔ kʋdoŋ wʋ ka daa kakam kam nɩ pa ba jǝni ba jeeri daanɩ. 14 Abenɩra ma ta dɩ Zoabɩ o wɩ: «Lɩ n jar-kərə bam wʋnɩ nɔɔnʋ dɩdʋa dɩdʋa sɩ amʋ dɩ lɩ dɩdʋa dɩdʋa. Bantʋ maa wʋ́ jeeri daanɩ ba jaŋɩ bale bale sɩ dɩ́ nii.» Zoabɩ ma sɛ.
15 Ba ma lɩ Bɛnzamɛn dwi dɩm nɔɔna fugǝ-bale na yɩ Isi-Bosɛtɩ kwaga nɔɔna tɩn sɩ ba nuŋi ba jeeri Davidi nɔɔna fugǝ-bale dɩdaanɩ najara. 16 Ba bale bale na wʋ najara yam wʋnɩ tɩn, ba maama ma ja da yuuywe. Ba laan ma kwe sʋ-lwaanʋ ba mʋʋrɩ da sɛ nɩ, yɩ ba gʋ daanɩ. Kʋ dɛ kʋntʋ mʋ yɩ nɔɔna fiinle-bana bam maama tɩ. Ba ma pa je sɩm kʋntʋ yɩrɩ nɩ: ‹Sʋ-lwaanʋ Kaporo›. 17 Kʋ na tu kʋ cɛ tɩn, nɔɔna bam maama ma lɛɛrɩ ba zʋ najara wʋnɩ. Davidi jar-kərə bam ma di Abenɩra dɩ Yisɩrayɛlɩ jar-kərə bam.
18 Zeruya biə batɔ bam, Zoabɩ, dɩ Abisayi, dɩ Azayɛlɩ dɛɛn tɔgɩ ba wʋ najara yam wʋnɩ. Kʋ na yɩ Azayɛlɩ, wʋntʋ dɛɛn warɩma o dwe fərə. 19 O ma zaŋɩ o yɔɔrɩ o zəli Abenɩra sɩ o ja. O maa wʋ sɛ sɩ o tɔgɩ wo-gaa. 20 Abenɩra ma pipiri o na‑o yɩ o wɩ: «Azayɛlɩ, nmʋ mʋ zəli-nɩ kʋntʋ na?» O dɩ ma ləri o wɩ: «Ɛɛn, kʋ yɩ amʋ mʋ.»
21 Abenɩra daa ma ta dɩd-o o wɩ: «Nan yagɩ amʋ sɩ n vu n beeri nɔn-dʋŋʋ kʋdoŋ n zəli. N na jaanɩ kʋ tu, sɩ n joŋi o najara zɩla yam n ta n te.» Azayɛlɩ ma vɩn sɩ o yagɩ Abenɩra zəlim.
22 Abenɩra daa ta ma kaan‑o yɩ o wɩ: «Yɩ ta n zəli-nɩ sɩ n ja! Amʋ ba lagɩ sɩ a frɩ‑m a dɩ tɩga nɩ a gʋ. Nmʋ na fɩn-nɩ sɩ a gʋ-m, a daa bá wanɩ n zɩmbaarʋ Zoabɩ yibiyə a nii.» 23 Azayɛlɩ nan wʋ sɛ sɩ o joori kwaga. Abenɩra ma kwe o cicwe dɩm nabili seeni o tɔ Azayɛlɩ pugə nɩ dɩ dam pa dɩ mʋʋrɩ da yɩ dɩ kɛ dɩ nuŋi o kwaga nɩ. Azayɛlɩ ma tʋ tɩga nɩ o tɩ. Wʋlʋ maama na tu o yi mɛ Azayɛlɩ na tɩgɩ o tigi tɩn, kʋ tu wʋ́ maŋɩ dáanɩ mʋ o zɩgɩ.
24 Zoabɩ dɩ Abisayi laan ma zəli Abenɩra sɩ ba ja. Wa-zʋʋrɩ maŋa nɩ mʋ ba yi Amma zoŋo kʋm seeni. Je sɩm kʋntʋ wʋ Gabawɔn kagʋa kam cwǝŋǝ nɩ mʋ, mɛ na bwələ dɩ Gia tɩn. 25 Abenɩra ma la Bɛnzamɛn jar-kərə bam o kɩ daanɩ zoŋo kʋdoŋ yuu nɩ. Ba ti ba yigə mʋ sɩ ba kɩ najara. 26 Abenɩra ma tɔɔlɩ o bəŋi Zoabɩ o wɩ: «Dɩ́ lagɩ dɩ́ ja najara taan dɩ́ gʋ daanɩ dɩ́ vu dɩ́ yi yən mʋ? N bá pa dɩ́ yagɩ kʋntʋ na? N wʋ maanɩ nɩ kʋ kweelim je wʋ́ taa yɩ wʋ-cɔgɔ yɩranɩ mʋ na? Dɩbam maama na yɩ cʋrrʋ daanɩ tɩn, nmʋ bá kɩ lɩla n ta dɩ n nɔɔna bam sɩ ba daa yɩ zəli dɩbam na?»
27 Zoabɩ ma sɛ yɩ o wɩ: «Amʋ dugi Ŋwɩa Tu Wɛ dɩm yɩrɩ ŋwaanɩ, nmʋ ya na wʋ tagɩ tɩntʋ, a nɔɔna bam yaá kwe tɩtɩɩ dɩm maama ba ma zəli abam ba ja mʋ.» 28 Zoabɩ ma lɩ o nabɔnɔ kʋm o wu pa o nɔɔna bam maama zɩgɩ. Ba ma yagɩ Yisɩrayɛlɩ tiinə bam zəlim. Ba daa wʋ magɩ najara dedaanɩ-ba.
29 Tɩtɩɩ dɩm kʋntʋ maama Abenɩra dɩ o jar-kərə bam ma vu ba tɔgɩ Zʋrdɛn bolo kʋm nɩ ba kɛ. Ba ma vu ba bɛ Zʋrdɛn bugə kam. Tɩga na pʋʋrɩ tɩn, ba ta maa ve taan, ba vu ba yi Mahanayimi.
30 Zoabɩ na yagɩ Abenɩra zəlim tɩn, o ma zaŋɩ sɩ o joori sɔŋɔ. O ma jeeli o nɔɔna bam ni yɩ o maanɩ nɩ ba fugə-nʋgʋ mʋ wǝli Azayɛlɩ wʋnɩ yɩ ba tǝrǝ. 31 Davidi jar-kərə bam nan ya gʋ Abenɩra nɔɔna bam biə-yatɔ dɩdaanɩ fusɩrdʋ mʋ na yɩ Bɛnzamɛn dwi dɩm tiinə. 32 Zoabɩ dɩ o nɔɔna bam ma ja Azayɛlɩ yɩra yam ba vu Betelɩhɛm. Ba ma kɩ-o o ko yibeeli dɩm wʋnɩ. Kʋntʋ kwaga nɩ, mʋ ba ve kʋntʋ taan tɩtɩɩ dɩm maama wʋnɩ. Tɩ-pʋra ni nɩ ba ma yi Ebrɔn.