Samowɛlɩ Twannʋ Tɩle Tu
Davidi ni Sooli na tɩgɩ te tɩn.
1
Davidi dɛɛn di Amalɛkɩ tiinə bam mʋ yɩ o daarɩ o joori Zikalagɩ. O maa maŋɩ da o kɩ da yale dɩdaanɩ Sooli maŋɩ o tɩ. 2 Davidi na joori yɩ kʋ kɩ da yatɔ tɩn nɔɔnʋ ma nuŋi Sooli jar-kərə bam wʋnɩ o ba o te. Nɔɔnʋ wʋm dɛɛn ya kaagɩ o gwaarʋ mʋ, yɩ o daarɩ o kwe kasʋlʋ o ma o taagɩ o yuu o wʋ-cɔgɔ kʋm ŋwaanɩ. O ma yi Davidi te, yɩ o vin o yibiyə tɩga nɩ o zul‑o.3 Davidi ma bwe‑o o wɩ: «Nmʋ nuŋi yən mʋ?» O dɩ ma ləri o wɩ: «Amʋ ya tɔgɩ a wʋ Yisɩrayɛlɩ jar-kərə bam wʋnɩ mʋ, yɩ a duri a lu najara yam wʋnɩ a ba yo seeni.»
4 Davidi daa ma ta dɩd-o nɩ: «Ta kʋlʋ maama na kɩ tɩn n brɩ-nɩ.» Nɔɔnʋ wʋm ma ləri o wɩ: «Yisɩrayɛlɩ jar-kərə bam duri mʋ ba jagɩ sɩ ba lu. Ba zanzan nɛ zʋnnɩ mʋ, ba badonnǝ dɩ ma tɩ. Sooli dɩ o bu Zonatan dɩ ma tɔgɩ ba tɩ.»
5 Davidi daa ma bwe nɔɔnʋ wʋm o wɩ: «N kɩ tɛ mʋ n lwarɩ nɩ Sooli dɩ Zonatan sɩɩnɩ ba tɩ?»
6 Nɔn-dʋŋʋ kʋm ma ləri o wɩ: «Amʋ yɔɔrɩ a zɩgɩ Giliboa piu kʋm yuu nɩ mʋ yɩ a na Sooli na salɩ o cicwe dɩm yɩra nɩ o zɩga. Kʋ ma maŋɩ dɩdaanɩ dɩ́ dʋna bam diini ba siseŋ-nɔɔna dɩ ba tərikooru tɩm ba duri ba ma yi o te. 7 O ma pipiri o na amʋ yɩ o bǝŋi-nɩ sɩ a vu a zən‑o. A ma sɛ yɩ a wɩ: ‹Pɛ, nii-nɩ da!› 8 O ma bwe amʋ o wɩ: ‹N yɩ wɔɔ mʋ?›. Amʋ ma lǝr-o a wɩ: ‹A yɩ Amalɛkɩ tu mʋ.› 9 O laan ma loori amʋ o wɩ: ‹Fɔgɩ n zɩgɩ kʋntʋ sɩ n gʋ-nɩ, sɩ a dam maama ti, yɩ a tʋʋnɩ dɩm bwələ mʋ.› 10 O na tagɩ kʋntʋ tɩn, a ma lɛɛrɩ a gʋ-o, bɛŋwaanɩ a lwarɩ nɩ kʋ tiini kʋ ni‑o yɩ o daa bá wəri. A laan ma dwanɩ paarɩ yipugə kam na wʋ o yuu nɩ tɩn, yɩ a daarɩ a lɩ o jɩŋa baŋa kam, sɩ a ja a ba a pa‑m. Amʋ tu, nii-tɩ da.»
11 Davidi na ni kʋntʋ tɩn, o wʋʋ dɛɛn ma cɔgɩ. O ma ja o na zʋ gwaarʋ tɩlʋ tɩn o vaŋɩ o kaarɩ. O nɔɔna bam maama dɩ ma kɩ kʋntʋ. 12 Ba ma lɛɛrɩ ba keeri taan yɩ ba vɔ ni sɩ kʋ vu kʋ yi dɩdaan-ni maŋa. Ba wʋ dɛɛn cɔgɩ zanzan Sooli dɩ o bu Zonatan tʋʋnɩ dɩm ŋwaanɩ, dɩdaanɩ Baŋa-Wɛ tɩtɩ nɔɔna bam maama ŋwaanɩ, dɩ Yisɩrayɛlɩ tiinə bam zanzan na tɩgɩ najara yam wʋnɩ tɩn ŋwaanɩ.a
13 Davidi daa ma bwe nɔn-dʋŋʋ kʋlʋ na jaanɩ kwǝrǝ kam o ba o pa‑o tɩn o wɩ: «Nmʋ nuŋi yən mʋ?» O dɩ ma ləri o wɩ: «A yɩ Amalɛkɩ tu mʋ, yɩ a laan zʋʋrɩ Yisɩrayɛlɩ tɩga kam nɩ.»
14 Davidi laan ma bwe‑o o wɩ: «Bɛɛ mʋ tu n yuu nɩ pa n ma n jɩŋa n gʋ Baŋa-Wɛ na kuri wʋlʋ sɩ o taa yɩ Pɛ tɩn? Fʋʋnɩ ba jɩgɩ-m na?» 15 O ma bəŋi o nɔɔna bam dɩdʋa o pa‑o ni o wɩ: «Zɔ‑o n gʋ!» O dɩ ma sɩɩnɩ o vu o zɔ Amalɛkɩ tu wʋm o gʋ. 16 Davidi nan ya tagɩ dɩ Amalɛkɩ tu wʋm mʋ o wɩ: «Nmʋ tʋʋnɩ dɩm yɩ n tɩtɩ yigə mʋ. N mɛ n ni mʋ n ŋɔɔnɩ n vɩn n tɩtɩ bʋra, dɩ n na wɩ: nmʋ mʋ gʋ Pɛ wʋlʋ Baŋa-Wɛ na kuri tɩn.»
Davidi keeri Sooli dɩ Zonatan tʋʋnɩ
17 Davidi dɛɛn laan ma leeni luə ləŋə sɩ o ma o guli Sooli dɩ Zonatan gulə. 18 O ta ma pa ni sɩ ba kwe-ka ba brɩ Zuda tiinə maama. O ma bəŋi ləŋə kam nɩ ‹Taŋa Baŋa Ləŋə.› Ləŋə kam kʋntʋ pʋpʋnɩ ka tiŋi Cɩga tu tɔnɔ kʋm wʋnɩ mʋ. O maa wɩ:
19 «Yisɩrayɛlɩ tiinə bam,
dɩ́ pamaŋ-babɛ sɩm tʋ dɩ́ pweeru tɩm yuu nɩ ba tɩ.
Nii-na dɩ́ jar-kərə dɩdɛɛra bam na tiini ba tʋ te!
20 Yɩ ta-na taanɩ dɩntʋ sɩ Gatɩ tiinə ni.
Yɩ tɔɔlɩ-na-dɩ Asekelon tɩʋ kʋm pooni nɩ.
Filisi tiinə kaana na ni-dɩ,
baá taa cakɩ mʋ dɩ wʋpolo.
Balʋ na yǝri Wɛ tɩn wʋ́ taa mwana.
21 Giliboa pweeru tɩm,
Wɛ bá sɛ sɩ nyɔnɔ daa tʋ á yuu nɩ.
Dʋa dɩ nan daa bá nɩ.
Abam karɩ sɩm daa bá kɩ wʋdiiru.
Bɛŋwaanɩ, dáanɩ mʋ pamaŋna bam najara zɩla yam maŋɩ tɩɩrʋ wʋnɩ.
Ba daa ba lagɩ ba lo paarɩ nugə
ba ma taagɩ Sooli jara-kǝm cɩ-kwaŋa kam.
22 Zonatan dɛɛn na tagɩ o taŋa,
o dʋna wʋ́ siiri mʋ barɩ-barɩ,
ba zɩ na maŋɩ ba yɩ nɔn-babɛ te dɩ.
Sooli dɩ na lɩ o sʋ-lɔŋɔ,
wʋntʋ wʋ́ magɩ o dʋna mʋ o dɩ,
yɩ kʋ bá joori kafɛ.
23 Sooli dɩ Zonatan,
nɔɔna dɛɛn jɩgɩ ba sono zanzan!
Ba ŋwɩa wʋnɩ, ba yɩ daanɩ mʋ,
ba ta ma tɔgɩ daanɩ ba tɩ.
Ba tiini ba warɩma ba dwe maarʋ,
yɩ ba ta dana ba dwe nywəənu.
24 Yisɩrayɛlɩ tiinə kaana bam,
taá keeri-na Sooli tʋʋnɩ dɩm ŋwaanɩ!
Sɩ o dɛɛn pɛ á zʋ gwar-laarʋ tɩlʋ na kɩ səbu zanzan tɩn mʋ.
O ta ma kwɛ á gwaarʋ tɩm dɩdaanɩ səbu-sɩŋa wǝǝnu.
25 Nii-na jar-kərə pamaŋ-babɛ sɩm na tʋ najara tɩtarɩ te!
Zonatan ma tɩ o tigi pweeru tɩm yuu nɩ.
26 Amʋ cʋrʋ Zonatan,
a wʋʋ tiini kʋ cɔgɩ nmʋ ŋwaanɩ.
Nmʋ tiini n jɩgɩ lʋnnɩ n pa-nɩ!
Sono kʋlʋ nmʋ na jɩgɩ n pa amʋ tɩn
dwe nɔɔnʋ dɩ o kaanɩ sono na yɩ te tɩn.b
27 Nii-na jar-kərə pamaŋ-babɛ sɩm na tʋ najara wʋnɩ te!
Ba najara zɩla yam daa ba jɩgɩ kuri!»