Ba jaanɩ Wɛ ni-gonim daka kam ba vu Zeruzalɛm
6
Davidi dɛɛn kuri Yisɩrayɛlɩ jar-kərə balʋ na ye najara laŋa lanyɩranɩ tɩn mʋrrʋ fiintɔ mʋ sɩ ba la daanɩ. 2 O ma da ba yigə sɩ ba vu Zuda tɩʋ Baala,a sɩ ba daarɩ ba ja Wɛ ni-gonim daka kam ba joori Zeruzalɛm. Daka kam kʋntʋ nan wʋra Paŋwa Tu Baŋa-Wɛ yɩrɩ ŋwaanɩ mʋ. Dɩntʋ di paarɩ Serubɛn sɩm tɩtarɩ laŋa nɩ, sɩ na zɩgɩ daka kam baŋa nɩ tɩn.b 3 Daka kam nan ya wʋ Abinadabɩ sɔŋɔ nɩ mʋ. O sɔŋɔ kʋm dɩ dɛɛn maa wʋ zoŋo yuu nɩ. Ba ma vu ba kwe-ka ba daŋɩ nabɛ təriko-dʋŋʋ baŋa nɩ. Ba laan ma tu zoŋo kʋm kuri nɩ. Abinadabɩ biə bale Yuza dɩ Ayo maa tɔgɩ təriko kʋm yɩ ba yɩrɩ-kʋ. 4 Ayo maa wʋ kʋ yigə nɩ o veǝ. 5 Davidi dɩ Yisɩrayɛlɩ dwi tiinə bam maama ma leeni le ba zuli Baŋa-Wɛ dɩ ba dam maama. Ba ta maa jɩgɩ kwaanʋ, dɩ sɩnyɛ, dɩ gungwe, dɩdaanɩ kwɛɛra zɩla dwi dwi ba kwɛɛrɩ yɩ ba daarɩ ba saɩ ba tɔgɩ kwaga.6 Ba ma vu ba yi Nakɔn na yǝni o frɩ o mɩna mɛ tɩn. Na-bɛ sɩm ma garɩ sɩ tɩtɩ sɩ lagɩ sɩ tʋ. Yuza ma zi Wɛ ni-gonim daka kam sɩ o pa ka fɔgɩ ka zɩgɩ. 7 Baŋa-Wɛ banɩ ma tiini dɩ zaŋɩ Yuza baŋa nɩ, o na wʋ sɛ sɩ o tɔgɩ daka kam cullu tɩm tɩn ŋwaanɩ. Nɛ sɩm kʋntʋ ni nɩ, DƖ ma magɩ Yuza daka kam təŋə nɩ DƖ gʋ. 8 Davidi wʋʋ ma fuli zanzan dɩ Baŋa-Wɛ na tɔgɩ DƖ ban-zɔŋɔ kʋm baŋa DƖ gʋ Yuza tɩn ŋwaanɩ. Kʋntʋ ma pa o bəŋi je sɩm kʋntʋ yɩrɩ nɩ: ‹Pɛrɩzi Yuza.›c Mʋ je sɩm yɩrɩ dɩ zɩm maama.
9 Kǝm dɩm kʋntʋ ma pa Davidi kwarɩ Baŋa-Wɛ. O ma bwɛ o wɩ: «Amʋ wʋ́ kɩ tɛ mʋ a na cwǝŋǝ sɩ a wanɩ a ja Baŋa-Wɛ ni-gonim daka kam a ba a te?» 10 O daa maa wʋ sɛ sɩ o ja-ka o ja o vu o zʋ Zeruzalɛm tɩʋ wʋnɩ. O ma lɛɛrɩ o pa ba ywəri ba ja-ka ba vu Gatɩ tu Obɛd-Edɔmi sɔŋɔ. 11 Baŋa-Wɛ ni-gonim daka kam ma maŋɩ Obɛd-Edɔmi sɔŋɔ nɩ canɩ sɩtɔ. Ka na wʋ dáanɩ tɩn, Baŋa-Wɛ ma kɩ wʋntʋ dɩ o sɔŋɔ tiinə maama yu-yoŋo.
12 Nɔɔna ma ta ba brɩ Pɛ Davidi ba wɩ: «Wɛ ni-gonim daka kam na wʋ Obɛd-Edɔmi sɔŋɔ nɩ tɩn, Baŋa-Wɛ kɩ o yu-yoŋo lanyɩranɩ. O wǝǝnu maama dɩ ma vu yigə.» Davidi laan ma vu Obɛd-Edɔmi sɔŋɔ o vu o ja daka kam o ja o ba Zeruzalɛm tɩʋ wʋnɩ dɩ wʋpolo zanzan. 13 Nɔɔna balʋ na zɩŋɩ daka kam tɩn na gɔgɩ naga ni bɩrdʋ tɩn, Davidi ma pa ba zɩgɩ. O ma gʋ na-bɩa dɩdaanɩ na-paalɩ o kɩ kaanɩm o zuli Baŋa-Wɛ. 14 Davidi nan ya zʋ gɔrɔ kʋlʋ ba na mɛ gar-fɩfalɩ ba sɔ tɩn mʋ. O maa tiini o saɩ dɩ o dam maama sɩ o zuli Baŋa-Wɛ. 15 Wʋntʋ dɩ Yisɩrayɛlɩ tiinə bam maama ma ja Baŋa-Wɛ ni-gonim daka kam ba jɩgɩ ba zʋʋrɩ Zeruzalɛm wʋnɩ. Ba na tiini ba jɩgɩ wʋpolo tɩn, ba maama ma kɩ sɔɔ yɩ ba wui nabwaanʋ.d
16 Ba na yɔɔrɩ ba jɩgɩ Baŋa-Wɛ ni-gonim daka kam ba zʋʋrɩ Zeruzalɛm tɩʋ wʋnɩ te tɩn mʋ, Sooli bukɔ Mikalɩ tɔgɩ o takoro seeni o nii o na kɔgɔ kʋm. O maa na nɛ Pɛ Davidi na faŋɩ yɩ o saɩ o zuli Baŋa-Wɛ te tɩn, o ma goon-o o bɩcarɩ nɩ.
17 Davidi dɛɛn ya maŋɩ o cwi vwe dɩdoŋ Baŋa-Wɛ daka kam ŋwaanɩ. Ba laan ma kwe daka kam ba zɩgɩ vwe dɩm wʋnɩ. Davidi ma gʋ vara o kɩ kaanɩm o zwɛ o pa Baŋa-Wɛ, yɩ o daarɩ o ja yazurə pɛɛra o ba sɩ o ma o zuli‑DƖ. 18 O na kɩ kaanɩm dɩm o ti tɩn, o laan ma kwe Paŋwa Tu Baŋa-Wɛ yɩrɩ dɩm o ma o loori Wɛ sɩ DƖ kɩ nɔɔna bam lanyɩranɩ. 19 O ta ma pa ba cɛ wʋdiiru tɩm ba pa Yisɩrayɛlɩ tiinə kɔgɔ kʋm maama, baara dɩ kaana. Nɔɔnʋ maama ma joŋi dɩpɛ dɩdʋa, dɩ nwam-wɔɔrɩ, dɩ kacɩnnʋ maasa bwaŋa dɩdʋa. Ba laan ma jagɩ ba vu ba sam.
20 Kʋntʋ maama na ti tɩn, Davidi ma joori o tɩtɩ sɔŋɔ sɩ o loori Wɛ sɩ DƖ kɩ o sɔŋɔ tiinə bam lanyɩranɩ. Sooli bukɔ Mikalɩ ma jeer-o cwǝŋǝ nɩ yɩ o wɩ: «Israyɛlɩ pɛ wʋm zɩm cɩga sɩɩnɩ o na o zulə yam. O kwanɩ o gwaarʋ mʋ o daarɩ o jarɩ o tɩtɩ o brɩ o tɩtɩ, o tɩntʋŋna dɩ o tɩntʋŋ-kaana yigə nɩ, nɩ nɔn-kafɛ tɩte!»
21 Davidi ma lǝr-o o wɩ: «Amʋ zɩm sagɩ sɩ a zuli Baŋa-Wɛ mʋ. Dɩntʋ mʋ yagɩ nmʋ ko dɩ n ko sɔŋɔ tiinə DƖ daarɩ DƖ kuri amʋ sɩ a taa nii DƖ nɔɔna Yisɩrayɛlɩ tiinə bam baŋa nɩ. A nan ta wʋ́ fɔgɩ a brɩ a wʋpolo dɩ DƖ. 22 Amʋ nan ta lagɩ a yáalɩ a tɩtɩ a dwǝni a na kɩ te tɩn mʋ. Amʋ nii a tɩtɩ sɩ a ta daɩ kʋlʋkʋlʋ mʋ, sɩ kʋ na yɩ tɩntʋŋ-kaana balʋ n na tɛ ba taanɩ tɩn, bantʋ wʋ́ yɔɔrɩ ba tiini ba zuli-nɩ mʋ.»
23 Sooli bukɔ Mikalɩ dɛɛn nan wʋ fɔgɩ o lʋ bu sɩ o vu o tɩ.