Baŋa-Wɛ goni ni dɩdaanɩ Davidi
7
Pɛ Davidi dɛɛn laan zʋʋrɩ o sɔ-fɔrɔ kʋm nɩ mʋ dɩ yazurə. Baŋa-Wɛ ma pa o dʋna maama daa ba daanɩ‑o. 2 Dɛ dɩdwɩ Davidi ma ta dɩ Wɛ nijoŋnu Natan o wɩ: «Nii amʋ mʋ tɩntʋ! A zʋʋrɩ sɔ-fɔrɔ kʋlʋ ba na kwe Sɛdrɩ da-ŋʋnnʋ ba ma lɔ-kʋ tɩn, yɩ kʋ daarɩ Wɛ ni-gonim daka kam laan wʋ vwe kuri nɩ.» 3 Natan ma ləri o wɩ: «Kɩ n wʋbʋŋa na jaanɩ te maama tɩn, sɩ Baŋa-Wɛ wʋ n tee nɩ.»4 Dɛ dɩm kʋntʋ tɩtɩɩ nɩ, Baŋa-Wɛ ma ŋɔɔnɩ dɩdaanɩ Natan DƖ wɩ:
5 «Ve n ta dɩ amʋ tɩntʋŋnʋ Davidi nɩ: ‹Baŋa-Wɛ na tagɩ kʋlʋ tɩn mʋ tɩntʋ: N bʋŋɩ nɩ nmʋ mʋ wʋ́ lɔ sɔŋɔ n pa-nɩ sɩ a taa zʋʋrɩ da na? 6 Kʋ nan na yɩ te tɩn, kʋ na zɩgɩ maŋa kalʋ a na jaanɩ Yisɩrayɛlɩ tiinə bam a nuŋi Ezipi nɩ tɩn, sɩ kʋ ba kʋ yi zɩm, amʋ ta wʋ fɔgɩ a zʋ sɔŋɔ wʋnɩ. Mɛ maama a na jaanɩ-ba a ja a vu, a yǝni a zʋʋrɩ vwe wʋnɩ mʋ. 7 Je sɩlʋ maama amʋ dɩdaanɩ Yisɩrayɛlɩ tiinə bam na beeri dɩ́ vu tɩn, amʋ ta wʋ fɔgɩ a ta dɩ yigǝ tiinǝ balʋ a na kuri sɩ ba taa nii a nɔɔna Yisɩrayɛlɩ tiinə bam tɩn nɩ: «Bɛɛ mʋ kɩ yɩ á wʋ kwe Sɛdrɩ da-ŋʋnnʋ á ma á lɔ sɔŋɔ á pa-nɩ?» ›
8 Kʋntʋ tɩn, ta dɩ a tɩntʋŋnʋ Davidi nɩ: ‹Paŋwa Tu Baŋa-Wɛ na tagɩ kʋlʋ tɩn mʋ tɩntʋ: Amʋ na lɩ nmʋ tɩn, dɩdaanɩ n dɛɛn yɩ nayɩrʋ mʋ gaa nɩ n nii peeni baŋa nɩ.a A ma daarɩ a pa n di paarɩ amʋ nɔɔna Yisɩrayɛlɩ tiinə bam baŋa nɩ. 9 Mɛ maama nmʋ na yǝni n ve tɩn, a dɛɛn tɔgɩ n kwaga kʋntʋ mʋ, yɩ a pa n dʋna dwi maama saarɩ tɩga baŋa nɩ. Lele kʋntʋ, amʋ wʋ́ pa n yɩrɩ tiini dɩ zaŋɩ, sɩ n ta n tɔgɩ n yɩ lʋgʋ baŋa nɔn-kamunə bam wʋnɩ dɩdʋa. 10 Amʋ laan nan kwe tɩga kalʋ a nɔɔna bam na wʋ́ taa zʋʋrɩ ka wʋnɩ tɩn mʋ a pa-ba. Kʋ lagɩ kʋ taa yɩ ba tɩtɩ kugu je nɔɔn-nɔɔnʋ na bá wanɩ o yaarɩ-ba ka wʋnɩ tɩn mʋ. Nɔn-balwaarʋ daa bá bɛɛsɩ-ba nɩnɛɛnɩ kʋ dɛɛn na kɩ te, 11 kʋ zɩgɩ maŋa kalʋ a na pɛ sarɩya-dirə nii a nɔɔna Yisɩrayɛlɩ tiinə bam baŋa nɩ tɩn. Amʋ ta lagɩ a pa á sin mʋ á dʋna maama daanɩm baŋa nɩ.
Amʋ Baŋa-Wɛ nan tɛ nɩ: amʋ tɩtɩ wʋ́ pa n dwi dɩm puli mʋ pa n sɔŋɔ kʋm jǝni dɩ dam. 12 Nmʋ ŋwɩa kam na ba ka ti yɩ ba kwe‑m ba kɩ mɛ ba dɛɛn na kɩ nmʋ kwə bam tɩn, a ta wʋ́ pa n dwi dɩm wʋnɩ nɔɔnʋ dɩdʋa zaŋɩ sɩ wʋntʋ ləri nmʋ yuu nɩ o ji pɛ. A maa wʋ́ pa o paarɩ dɩm jǝni dɩ dam.b 13 Kʋ yɩ wʋntʋ mʋ wʋ́ lɔ sɔŋɔ amʋ yɩrɩ dɩm zulim ŋwaanɩ.c Amʋ ta wʋ́ pa wʋntʋ dwi dɩm taa di paarɩ dɩm maŋa maama. 14 Amʋ wʋ́ taa yɩ o ko, sɩ o dɩ taa yɩ amʋ bu.d O na kɩ o sa cwǝŋǝ, a lagɩ a ma da-lɔŋɔ mʋ a ma a dɩ‑o cwǝŋǝ nɩ, yɩ a kʋrɩs‑o nɩnɛɛnɩ nabiinǝ na kɩ ba biə te tɩn. 15 Amʋ nan bá fɔgɩ a dwanɩ a sono kʋm o baŋa nɩ, nɩnɛɛnɩ a dɛɛn na kɩ te dɩdaanɩ Sooli yɩ a lɩ-o paarɩ dɩm wʋnɩ sɩ nmʋ laan ji pɛ tɩn. 16 Amʋ wʋ́ pa n paarɩ dɩm taa wʋra taan. Kʋ daa bá je amʋ yigə nɩ. Maŋa maama sɩ kʋ taa ve maŋa maama, nmʋ sɔŋɔ kʋm wʋ́ na dwi sɩ n paarɩ dɩm fɔgɩ dɩ ja dam.› »
17 Natan ma ta kʋlʋ maama Baŋa-Wɛ na lɩ DƖ brɩ-o tɩn dɩ Davidi.
Davidi na warɩ Wɛ te tɩn
18 Davidi ma vu o zʋ Baŋa-Wɛ jero-tantɩ-vwe dɩm o jǝni da, yɩ o warɩ Wɛ o wɩ:
«Yuutu Baŋa-Wɛ, amʋ yɩ wɔɔ mʋ, amʋ dwi dɩm dɩ yɩ bɛɛ mʋ, yɩ n zǝni amʋ tɩntʋ sɩ kʋ yi zɩm? 19 Dɩ kʋntʋ maama dɩ, n ta bʋŋɩ sɩ n kɩ-nɩ lanyɩranɩ n wǝli da! Yuutu Baŋa-Wɛ, nmʋ laan nan tiŋi ni mʋ a jwa dwi dɩm ŋwaanɩ. Kʋ maa yɩ wo-kɩnkagɩlɩ kʋ pa-nɩ! 20 Amʋ nan daa jɩgɩ bɛɛ mʋ sɩ a ta? Yuutu Baŋa-Wɛ, amʋ yɩ n tɩntʋŋnʋ mʋ yɩ n ye a maama n tiə. 21 Kʋ yɩ nmʋ tɩtɩ ni-gonim dɩm ŋwaanɩ dɩ n wʋbʋŋa yam ŋwaanɩ mʋ n kɩ wo-kamunnu tɩntʋ maama, yɩ n daarɩ n lɩ-tɩ n brɩ-nɩ.
22 Yuutu Baŋa-Wɛ, kʋntʋ ŋwaanɩ mʋ nmʋ tiini n yɩ kamunu! Nmʋ doŋ tǝrǝ! Nmʋ yɩranɩ mʋ yɩ Wɛ. Dɩ́ yɔɔrɩ dɩ́ ye kʋntʋ mʋ cɩga cɩga. 23 Dɩbam Yisɩrayɛlɩ tiinə bam mʋ yɩ dwi dɩdwɩ lʋgʋ baŋa nɩ. Dwi dɩdoŋ tǝrǝ dɩ na ma dɩ Yisɩrayɛlɩ tiinə bam. Nmʋ dɛɛn joŋi-ba gabɛɛm wʋnɩ mʋ pa ba ji nmʋ tɩtɩ nɔɔna, sɩ n daarɩ n pa n yɩrɩ zaŋɩ wɛɛnɩ. Nmʋ na vrɩ-ba Ezipi tiinə jɩŋa nɩ tɩn, n dɛɛn kɩ wo-kɩnkagɩla na jɩgɩ fʋʋnɩ tɩn mʋ ba tɩtarɩ nɩ. Kʋ ta na yɩ dwi tiinə balʋ na kwaanɩ sɩ ba cɩ-ba tɩn, n zəli bantʋ mʋ dɩ ba wa maama. 24 Nmʋ ma n kuri Yisɩrayɛlɩ dwi tiinə bam sɩ ba taa yɩ nmʋ tɩtɩ nɔɔna sɩ kʋ taa ve maŋa maama. Kʋ daarɩ nmʋ Baŋa-Wɛ dɩ ma ji bantʋ Wɛ dɩm.
25 Amʋ Tu Baŋa-Wɛ, laan pa n ni-gonim dɩm, n na kɩ amʋ dɩ a dwi dɩm ŋwaanɩ tɩn taa jɩgɩ kuri sɩ kʋ taa ve maŋa maama. Sɩɩnɩ n kɩ kʋlʋ nmʋ na tagɩ tɩn, 26 sɩ n yɩrɩ dɩm taa yɩ kamunu maŋa maama. Nɔɔna laan wʋ́ taa tɛ ba wɩ: ‹Paŋwa Tu Baŋa-Wɛ mʋ nii Yisɩrayɛlɩ tiinə bam baŋa nɩ.› Kʋ ta wʋ́ pa amʋ wʋlʋ na yɩ n tɩntʋŋnʋ Davidi tɩn sɔŋɔ kʋm na dwi sɩ kʋ taa ve maŋa maama.
27 Paŋwa Tu Baŋa-Wɛ, nmʋ mʋ yɩ Yisɩrayɛlɩ dwi tiinə Wɛ dɩm. Nmʋ nan lɩ wǝǝnu tɩntʋ maama n brɩ-nɩ nɩ a dwi dɩm wʋ́ puli pa a sɔŋɔ kʋm jǝni dɩ dam. Kʋntʋ ŋwaanɩ mʋ pɛ a na baarɩ a loori‑m kʋntʋ doŋ. 28 Yuutu Baŋa-Wɛ, nmʋ sɩɩnɩ n yɩ Baŋa-Wɛ cɩga cɩga mʋ! Nmʋ ni-taanɩ dɩm yɩ cɩga mʋ. Nmʋ nan pooli wo-laarʋ tɩntʋ n pa amʋ wʋlʋ na yɩ n tɩntʋŋnʋ tɩn mʋ. 29 Amʋ loori‑m sɩ n kɩ a kwaga kam yu-yoŋo mʋ, sɩ n ta n kɩ-ba yu-yoŋo maŋa maama. Yuutu Baŋa-Wɛ, nmʋ na goni n ni kʋntʋ tɩn, n yu-yoŋo wʋ́ yɔɔrɩ dɩ taa tɔgɩ a dwi dɩm mʋ sɩ kʋ taa ve maŋa maama!»