2 Samowɛlɩ 8

Davidi na di najara yalʋ maama tɩn

Kʋntʋ kwaga nɩ, Davidi dɛɛn ma vu o jeeri Filisi tiinə bam dɩ najara. O ma di-ba pa ba na ba cavɩɩra. O ma cɔgɩ ba dam ba tɩʋ kʋm maama wʋnɩ.

2 Davidi dɛɛn ma zaŋɩ najara o di Moabɩ tiinə bam dɩ. O ma pa ba pəni tɩga nɩ ba toŋi daanɩ, yɩ o laan kwe ŋʋna o maŋɩ-ba kuni bɩtɔ bɩtɔ o vu o ti. Ŋʋna kam dɩdwarɩm kuni bɩle na yi mɛ, baá gʋ nɔɔna bam kʋntʋ mʋ. Ka dɩdwarɩm yi dɩdʋa na daarɩ ka yi mɛ, baá yagɩ sɩ bantʋ taa ŋwɩ mʋ. Moabɩ tiinə bam dɛɛn ma lɛɛrɩ ba zʋ Davidi dam kuri nɩ, yɩ ba tui ba ŋwɩ lampoo ba pa‑o.

3 Rehɔbɩ bu Hadadezerɩ dɛɛn yɩ Zoba tɩʋ pɛ mʋ. O nan ya maa ve sɩ o joori o joŋi Efratɩ bugə laŋa kam tɩɩnɩ dɩm mʋ o taa te. Davidi ma jeeri Hadadezerɩ dɩ najara o di. 4 Davidi dɩ o nɔɔna bam ma ja Hadadezerɩ jar-kərə balʋ na dɔgɩ siseŋ-nɔɔna yuu nɩ tɩn mʋrʋ dɩ biə yarpɛ (1,700), kʋ wǝli dɩ o jar-kərə balʋ na ve tɩga nɩ tɩn mʋrrʋ fiinle (20,000). Davidi ma lɩ ba siseŋ-nɔɔna bi (100) sɩ o taa jɩgɩ o vaŋa o jara-kǝm tərikooru, yɩ o daarɩ o bwəri sɩlʋ na daarɩ tɩn nɛ pa gwarɩgɩ.

5 Siiri tiinə balʋ dɛɛn na zʋʋrɩ Damasɩ laŋa kam nɩ tɩn ma nuŋi ba vu sɩ ba wǝli Hadadezerɩ. Davidi ma jeeri-ba dɩ najara yɩ o gʋ ba nɔɔna mʋrrʋ fiinle-tɩle (22,000). 6 Davidi ma daarɩ o ja o jar-kərə badonnǝ o vu cɩ Siiri tiinə bam laŋa kam maama. Damasɩ nɩ mʋ kʋntʋ. Siiri tiinə bam dɛɛn ma zʋ Davidi dam kuri nɩ, yɩ ba ŋwɩ lampoo ba pa‑o. Mɛ maama Davidi na veǝ, Baŋa-Wɛ yǝni DƖ pa o di o dʋna mʋ najara wʋnɩ. 7 Davidi ma vrɩ səbu-sɩŋa najara zɩla yalʋ Hadadezerɩ dɩdɛɛra bam ya na jɩgɩ tɩn o ja o joori o vu Zeruzalɛm. 8 Kʋ ta na yɩ Teba dɩdaanɩ Berotayi tɩɩnɩ dɩm Hadadezerɩ na te tɩn, Pɛ Davidi ma zʋ dɩ wʋnɩ o vrɩ canna wǝǝnu zanzan o ja o viiri.

9 Hamatɩ tɩʋ Pɛ Toyi dɛɛn ma ni nɩ Davidi di Hadadezerɩ jar-kərə bam maama. 10 Toyi tɩtɩ dɛɛn ya kɩ najara kuni zanzan mʋ dɩ Hadadezerɩ. O ma tʋŋɩ o bu Zʋram sɩ o vu o jɔɔnɩ Davidi o kɩ-o yu-yoŋo le dɩ o na wanɩ Hadadezerɩ o di tɩn ŋwaanɩ. Zʋram ma ja səbu-poŋo pɛɛra, dɩ səbu-sɩŋa pɛɛra, dɩ canna pɛɛra o vu o pa Davidi. 11 Davidi ma kwe pɛɛra yam kʋntʋ o pa ba taa maɩ ba zuli Baŋa-Wɛ. O dɛɛn ya maŋɩ o kɩ kʋntʋ doŋ dɩ səbu-poŋo dɩ səbu-sɩŋa wǝǝnu tɩlʋ o na vrɩ o dʋna bam tee nɩ tɩn mʋ. 12 O dʋna balʋ o na di tɩn tɩɩnɩ dɩm maa yɩ: Edɔm, dɩ Moabɩ, dɩ Amɔn, dɩ Filisi, dɩ Amalɛkɩ. O ta ma kwe jɩjɩgɩrʋ tɩlʋ o na vrɩ Zoba tɩʋ Pɛ Hadadezerɩ tee nɩ tɩn o pa Baŋa-Wɛ.

13 Davidi dɛɛn ma vu Yɛ bolo kʋm o zaŋɩ najara dɩ Edɔm tiinə bam o gʋ ba nɔɔna mʋrrʋ fugə-nana (18,000). O na joori najara yam wʋnɩ tɩn, o yɩrɩ dɛɛn ma tiini dɩ zaŋɩ. 14 O ma ja o jar-kərə bam o vu o cɩ Edɔm laŋa kam maama. Edɔm tiinə bam maama laan ma zʋ Davidi dam kuri nɩ. Mɛ maama Davidi na veǝ, Baŋa-Wɛ yǝni DƖ pa o di o dʋna mʋ najara maama wʋnɩ.

15 Davidi dɛɛn ma di paarɩ Yisɩrayɛlɩ tiinə bam maama baŋa nɩ. O ma tɔgɩ cwǝŋǝ dɩ o na kɩ o nɔɔna bam te tɩn, sɩ kʋ taa lana kʋ pa-ba. 16 Zeruya bu Zoabɩ mʋ yɩ Davidi jar-kərə bam yigə tu. Ayiludi bu Zʋzafatɩ dɩ ma nii woŋo maama sɩ o pʋpʋnɩ-tɩ o tiŋi. 17 Asituba bu Sadoki dɩdaanɩ Abɩatarɩ bu Ayimelɛkɩ dɛɛn yɩ Wɛ kaanɩm tiinə mʋ. Seraya maa yɩ Davidi tɔn-pʋpʋnnʋ. 18 Yehoyada bu Benaya mʋ nii Kereti tiinə bam dɩdaanɩ Peleti tiinə bam. Davidi biə bam ma tʋŋɩ kaanɩm tiinə tɩtʋŋa ba pa‑o.