Pɛ Davidi dɩdaanɩ Mefibosɛtɩ taanɩa
9
Dɛ dɩdwɩ mʋ Davidi bwe o wɩ: «Sooli dwi dɩm nɔɔnʋ wʋ daarɩ sɩ amʋ da Zonatan ŋwaanɩ a kɩ kʋ tu lanyɩranɩ na?»b2 Sooli digə kam dɛɛn nan jɩgɩ ba tɩntʋŋnʋ dɩdʋa o yɩrɩ na yɩ Ziba. Ba ma bǝŋ-o ba pa Davidi. O na yi pɛ wʋm te tɩn, mʋ Davidi bwe‑o o wɩ: «Nmʋ mʋ yɩ Ziba tɩn na?» O dɩ ma ləri o wɩ: «Ɛɛn, amʋ yɩ n tɩntʋŋnʋ Ziba mʋ.»
3 Pɛ Davidi ma bwe‑o o wɩ: «Sooli dwi dɩm nɔɔnʋ daa wʋ daarɩ sɩ a kɩ kʋ tu lanyɩranɩ Wɛ yu-yoŋo dɩm ŋwaanɩ na?» Ziba ma ləri o wɩ: «Zonatan ta daarɩ bu dɩdʋa. O nɛ maama sɩle nan mʋ tɩga.»
4 Pɛ Davidi daa ma bwe o wɩ: «O nan wʋ yən mʋ?» Ziba ma ləri o wɩ: «O wʋ Lodebarɩ nɩ mʋ, Amiyɛlɩ bu Makira sɔŋɔ nɩ.»
5 Pɛ Davidi ma tʋŋɩ pa ba vu Lodebarɩ ba ja-o ba ba o te. 6 Zonatan bu wʋm kʋntʋ yɩrɩ mʋ yɩ Mefibosɛtɩ. O ko-nakwɩ maa yɩ Sooli. O na tu o yi Davidi te tɩn, o ma vin o yibiyə tɩga nɩ o jɔɔn‑o. Davidi ma bǝŋ-o o wɩ: «Mefibosɛtɩ!» O dɩ ma ləri o wɩ: «Amʋ wʋlʋ na yɩ n tɩntʋŋnʋ tɩn mʋ tɩntʋ.»
7 Davidi ma ta dɩd-o o wɩ: «Yɩ ta n fʋna. Amʋ wʋbʋŋa maŋɩ ya ja sɩ a kɩ-m lanyɩranɩ mʋ n ko Zonatan ŋwaanɩ. A wʋ́ kwe tɩga kalʋ maama ya na yɩ n ko-nakwɩ Sooli nyɩm tɩn a joori a pa‑m. A ta pɛ‑m cwǝŋǝ sɩ n ta n zʋʋrɩ amʋ sɔŋɔ kʋm nɩ n di wʋdiu kʋlʋ amʋ na wʋ́ di tɩn.» 8 Mefibosɛtɩ daa ma vin o yibiyə tɩga nɩ yɩ o wɩ: «Amʋ yɩ n tɩntʋŋnʋ mʋ, a dɩ kakur-tɩka ba garɩ daanɩ. Bɛŋwaanɩ mʋ yɩ n bʋŋɩ sɩ n kɩ-nɩ lanyɩranɩ kʋntʋ?»
9 Pɛ Davidi ma bəŋi Sooli tɩntʋŋnʋ Ziba o ta dɩd-o o wɩ: «Amʋ kwe woŋo kʋlʋ maama ya na yɩ nmʋ tu Sooli dɩ o digə kam nyɩm tɩn mʋ a joori a pa o naa Mefibosɛtɩ. 10 Nmʋ dɩdaanɩ n biə, dɩ n tɩntʋŋna bam maama maŋɩ sɩ á taá varɩ karɩ sɩm mʋ á pa Mefibosɛtɩ. Sɩ na kɩ wʋdiu, á wʋ́ ja á ba á pa o digə kam sɩ ba yɩ ga. Kʋ nan na yɩ Mefibosɛtɩ, wʋntʋ lagɩ o taa di wʋdiu kʋlʋ amʋ na wʋ́ di a sɔŋɔ kʋm nɩ tɩn mʋ.»
Ziba dɛɛn nan jɩgɩ bəkəri fugə-banu dɩ tɩntʋŋna fiinle mʋ. 11 O ma ləri Pɛ Davidi o wɩ: «A yɩ n tɩntʋŋnʋ mʋ. A nan wʋ́ kɩ te maama n na brɩ sɩ a kɩ tɩn.»
Mefibosɛtɩ laan ma lɛɛrɩ o tɔgɩ o di kʋlʋ maama Davidi na yǝni o di tɩn, nɩnɛɛnɩ pɛ biə bam na di te tɩn. 12 O maa jɩgɩ bəkər-pwələ mʋ o yɩrɩ na yɩ Mika. Ziba sɔŋɔ tiinə bam maama dɛɛn ma ji Mefibosɛtɩ tɩntʋŋna. 13 Mefibosɛtɩ na gwarɩgɩ o nɛ sɩm maama nɩ tɩn laan ma ba o zʋʋrɩ Zeruzalɛm nɩ. Maŋa maama o maa tɔgɩ o di kʋlʋ maama Pɛ wʋm na yǝni o di tɩn.