Davidi di Amɔn tiinə bam
10
Kʋntʋ kwaga nɩ, Amɔn tiinə pɛ Nahasɩ ma tɩ. O bu Hanun ma ləri o yuu nɩ o ji pɛ. 2 Davidi ma ta o wɩ: «Amʋ lagɩ a kɩ Nahasɩ bu Hanun lanyɩranɩ mʋ nɩnɛɛnɩ o ko dɩ dɛɛn na kɩ amʋ lanyɩranɩ te tɩn.» O ma tʋŋɩ nɔɔna sɩ ba vu ba kɩ Hanun le dɩ o ko luə kam.Davidi nɔɔna bam na yi Amɔn tiinə laŋa kam tɩn, 3 Amɔn tiinə dɩdɛɛra bam ma ta dɩ ba pɛ Hanun ba wɩ: «Nmʋ pɛ cɩga nɩ Davidi bʋŋɩ lanyɩranɩ mʋ yɩ o tʋŋɩ nɔɔna sɩ ba ba ba kɩ n ko luə kam le na? Lwarɩ nɩ o tʋŋɩ-ba sɩ ba ŋɔ ba nii dɩ́ tɩʋ kʋm mʋ, sɩ o wanɩ o ba o di dɩbam.» 4 Hanun ma pa ba ja Davidi tɩntʋŋna bam ba ceeri ba twana yam ba daarɩ cicwə-cwəəru. Ba ta ma ja ba gwaarʋ tɩm tɩtarɩ nɩ ba goni ba yagɩ sɩ kʋ yi ba təkərə seeni. Ba laan ma yagɩ-ba sɩ ba viiri dɩ cavɩɩra. 5 Davidi tɩntʋŋna bam ma kwarɩ sɩ ba joori sɔŋɔ, cavɩɩra na jɩgɩ-ba tɩn ŋwaanɩ. Davidi na ni kʋ na kɩ-ba te tɩn, o ma tʋŋɩ nɔɔna sɩ ba jeeri-ba cwǝŋǝ nɩ. O ma pa-ba kwǝrǝ o wɩ: «Maŋɩ-na Zeriko nɩ sɩ á twana yam na nuŋi maama sɩ á laan joori sɔŋɔ.»
6 Amɔn tiinə bam ma maanɩ nɩ ba kikiə maama laan lwe Davidi mʋmwa nɩ. Ba ma vu ba kɩ ni-mɔrɔ dɩ Siiri tiinə balʋ na wʋ Bɛtɩ-Rehobɩ nɩ, dɩ Zoba nɩ tɩn, ba joŋi ba jar-kərə mʋrrʋ fiinle (20,000). Ba ta ma joŋi jar-kərə mʋrʋ (1,000) Maaka tɩʋ pɛ tee nɩ, yɩ ba daarɩ ba joŋi jar-kərə mʋrrʋ fugǝ-bale (12,000) Tɔbɩ tiinə tee nɩ.
7 Davidi na lwarɩ kʋ ni nɩ tɩn, o ma tʋŋɩ Zoabɩ sɩ o ja o pamaŋna bam kɔgɔ kʋm maama o vu o jeeri-ba dɩ najara. 8 Amɔn tiinə bam ma gwɛ ba nuŋi ba toŋi ba zɩgɩ ba tʋ-fɔrɔ kʋm manchoŋo ni nɩ sɩ ba kɩ najara yam. Kʋ daarɩ Siiri tiinə balʋ na nuŋi Zoba dɩ Rehɔbɩ tɩn, dɩ Tɔbɩ tiinə bam, dɩdaanɩ Maaka tiinə bam dɩ laan ma toŋi ba zɩgɩ tɩʋ kʋm pwələ nɩ yɩ ba cǝgǝ.
9 Zoabɩ ma lwarɩ nɩ ba dʋna bam lagɩ ba jeeri-ba yigə dɩ kwaga maama mʋ. O ma kuri Yisɩrayɛlɩ jar-kərə bam wʋnɩ balʋ na tiini ba ye najara laŋa lanyɩranɩ tɩn, sɩ bantʋ yɔɔrɩ ba jeeri Siiri tiinə bam. 10 Jar-kərə balʋ na daarɩ tɩn, o ma kɩ-ba o nyaanɩ Abisayi jɩŋa nɩ sɩ bantʋ maama vu ba jeeri Amɔn tiinə bam. 11 Zoabɩ laan ma ta Abisayi o wɩ: «Nmʋ na nɛ nɩ Siiri tiinə bam tiini ba dana ba dwe amʋ, sɩ n ba n wǝli-nɩ. Amɔn tiinə bam dɩ nan na dana ba dwe nmʋ, amʋ dɩ wʋ́ ba a wəli‑m. 12 Kɩ dam n tɩtɩ kuri nɩ sɩ n ta ta n jɩgɩ baarɩ! Pa-na dɩ́ jaŋɩ dɩ́ pa dɩ́ nɔɔna bam dɩdaanɩ dɩ́ Tu Wɛ dɩm tɩɩnɩ dɩm ŋwaanɩ. Baŋa-Wɛ wʋ́ kɩ kʋlʋ na su DƖ yi tɩn!»
13 Zoabɩ dɩ o jar-kərə bam ma ja najara yam ba jeeri Siiri tiinə bam, yɩ ba duri ba jagɩ. 14 Amɔn tiinə bam na nɛ nɩ Siiri tiinə bam duri ba jagɩ tɩn, mʋ ba dɩ duri ba joori ba zʋ ba tɩʋ kʋm wʋnɩ, yɩ ba daarɩ Abisayi dɩ o jar-kərə kɔgɔ kʋm. Najara yam ma ti pa Zoabɩ joori o vu Zeruzalɛm.
15 Siiri tiinə bam na maanɩ nɩ Yisɩrayɛlɩ tiinə bam wanɩ-ba ba di tɩn, mʋ ba joori ba la ba jar-kərə bam ba kɩ daanɩ. 16 Zoba tɩʋ Pɛ Hadadezerɩ ma bəŋi Siiri tiinə balʋ na wʋ Efratɩ bugə kam wa-puli seeni tɩn sɩ ba vu ba jeeri Elam nɩ. Hadadezerɩ jar-kərə yigə tu Sobakɩ dɛɛn wʋ ba yigə nɩ mʋ. 17 Davidi ma maanɩ ba na kɩ te tɩn. O dɩ ma la Yisɩrayɛlɩ jar-kərə bam maama o kɩ daanɩ. Ba ma vu ba bɛ Zʋrdɛn bugə kam ba lɛɛnɩ ba vu ba yi Elam. Siiri tiinə bam ma toŋi ba fɔgɩ ba zɩgɩ yɩ ba jeeri Davidi dɩ najara. 18 Yisɩrayɛlɩ tiinə bam ma fɩn Siiri tiinə bam ba zəli pa ba duri ba jagɩ. Davidi dɩ o nɔɔna bam ma gʋ ba dʋna balʋ na dɔgɩ sise-tərikooru yuu tɩn biə yarpɛ (700). Ba ta ma gʋ balʋ na dɔgɩ siseŋ-nɔɔna tɩn mʋrrʋ fiinna (40,000). Kʋ na yɩ ba jar-kərə bam yigə tu Sobakɩ, ba ma tiini ba kɩ zʋnnɩ o yɩra nɩ, pa o tɩ najara kaporo kʋm nɩ. 19 Hadadezerɩ kwaga pwa bam maama ma maanɩ nɩ Yisɩrayɛlɩ tiinə bam yɔɔrɩ ba di-ba mʋ najara wʋnɩ. Ba ma loori yibwənə Yisɩrayɛlɩ tiinə bam tee nɩ yɩ ba daarɩ ba sɛ ba pa-ba.
Siiri tiinə bam laan ma kwarɩ sɩ ba daa wǝli Amɔɔrɩ tiinə bam najara kǝm baŋa nɩ.