Davidi dɩdaanɩ Bat-Seba taanɩ
11
Kʋ dɛɛn ma yi tweeru punnu kǝm maŋa. Kʋ maa yɩ maŋa kalʋ pwa na yǝni ba nuŋi sɩ ba kɩ najara tɩn mʋ. Davidi ma tʋŋɩ Zoabɩ dɩ o dɩdɛɛra badonnǝ, dɩdaanɩ Yisɩrayɛlɩ jar-kərə bam maama, sɩ ba vu ba zaŋɩ najara dɩ Amɔn tiinə bam. Ba ma cɔgɩ-ba yɩ ba daarɩ ba li Raba tɩʋ kʋm sɩ ba ja. Kʋ daarɩ Davidi tɩtɩ ma maŋɩ Zeruzalɛm nɩ.2 Dɛ dɩdwɩ: Davidi ma pəni wɩa tɩtarɩ nɩ o dɔ. O na pɛ o zaŋɩ dɩdaan-ni maŋa nɩ tɩn, mʋ o kaagɩ o sɔŋɔ kʋm nayuu nɩ o kɩkara. O ma dʋlɩ o yiǝ o na kaanɩ na wʋ o sɔŋɔ nɩ o swɛ yɩra. Kaanɩ wʋm dɛɛn tiini o lamma zanzan. 3 Davidi ma tʋŋɩ nɔɔnʋ sɩ o vu o bwe o lwarɩ kaanɩ wʋm laŋa maama. Nɔɔnʋ wʋm ma ta o wɩ: «Kʋʋ́ taa yɩ Bat-Seba mʋ. O yɩ Eliam bukɔ mʋ. O barʋ maa yɩ Hɛtɩ tu Yuri.»
4 Davidi ma tʋŋɩ nɔɔna pa ba vu ba ja kaanɩ wʋm ba ba. Kaanɩ wʋm na tu tɩn, o ma pəni dɩd-o. Yantʋ da yam nɩ kaanɩ wʋm ya kɩ o wʋʋ zarɩm mʋ, yɩ o daarɩ o kwɛ o tɩtɩ sɩ kʋ maŋɩ dɩ cullu tɩm. O ma zaŋɩ o joori o sɔŋɔ. 5 Bat-Seba ma ja pugə, yɩ o tʋŋɩ o ta dɩ Davidi o wɩ: «Amʋ jɩgɩ pugə mʋ.»
6 Davidi na lwarɩ kʋntʋ tɩn, o ma tʋŋɩ kwǝrǝ o pa Zoabɩ o wɩ: «Ta dɩ Hɛtɩ tu Yuri sɩ o ba amʋ te yo seeni.» Zoabɩ ma tʋŋɩ Yuri Davidi tee nɩ. 7 Yuri na yi Davidi te tɩn, mʋ Davidi bwe o kwaga sɩ o lwarɩ Zoabɩ, dɩ jar-kərə bam laŋa na yɩ te tɩn. O ta ma bwe sɩ o lwarɩ najara yam na ve te tɩn. 8 O laan ma ta dɩ Yuri o wɩ: «Nan ve sɔŋɔ n sin fɩɩn.»
Yuri na nuŋi Pɛ sɔŋɔ nɩ tɩn, mʋ Davidi tʋŋɩ nɔɔna sɩ ba ja pɛɛrɩ ba saŋɩ o kwaga ba vu ba pa‑o sɔŋɔ nɩ. 9 Yuri nan wʋ ve o tɩtɩ sɔŋɔ. O ma maŋɩ dɩ pɛ tɩntʋŋna bam, o pəni pɛ sɔŋɔ manchoŋo kʋm ni nɩ. 10 Davidi ma maanɩ nɩ Yuri wʋ ve sɔŋɔ, yɩ o bwe‑o o wɩ: «Nmʋ nuŋi cwə-dɔrɔ n ba n yi yo seeni. Bɛɛ mʋ te yɩ n wʋ ve sɔŋɔ?» 11 Yuri ma lǝr-o o wɩ: «Yisɩrayɛlɩ tiinə dɩ Zuda tiinə bam maama nuŋi mʋ sɩ ba kɩ najara. Wɛ ni-gonim daka kam dɩ wʋ ba tee nɩ. Amʋ yigə tu Zoabɩ dɩ o dɩdɛɛra bam maama dɩ tigi pwələ nɩ. Kʋ laan nan wʋ́ kɩ tɛ mʋ sɩ a vu sɔŋɔ a taa di yɩ a nyɔa, sɩ a daarɩ a pəni dɩ a kaanɩ? Pɛ, a dugi n ŋwɩa kam ŋwaanɩ dɩ n tɩtɩ yɩrɩ dɩm ŋwaanɩ nɩ: a bá fɔgɩ a kɩ kʋntʋ!» 12 Davidi ma ta dɩd-o o wɩ: «Nan pəni yo zɩm, sɩ jwa nɩ a laan wʋ́ yagɩ‑m sɩ n joori najara je sɩm nɩ.»
Dɛ dɩm kʋntʋ nɩ, Yuri ma maŋɩ Zeruzalɛm nɩ o pəni o pʋʋrɩ tɩga. 13 Davidi ma bǝŋ-o pa ba di daanɩ. O ma pa ba nyɩ Yuri dɩdaanɩ sana, yɩ o tiini o bugi. Dɩ kʋntʋ maama dɩ, Yuri wʋ ve sɔŋɔ sɩ o pəni. O maŋɩ pɛ sɔŋɔ ni nɩ dɩ pɛ tɩntʋŋna bam mʋ o pəni o sara kam nɩ.
14 Tɩga na pʋʋrɩ tɩtɩɩtɩ tɩn, Davidi ma pʋpʋnɩ tɔnɔ o tʋŋɩ Yuri sɩ o ja o vu o pa Zoabɩ. 15 Tɔnɔ kʋm pʋpʋnɩ kʋ wɩ: «Kwe Yuri n zɩgɩ jar-kərə bam yigə nɩ, mɛ najara yam na tiini ya cana tɩn, sɩ á daarɩ á titwəni á joori kwaga á daarɩ‑o o yɩranɩ sɩ dɩ́ dʋna bam gʋ-o.»
16 Zoabɩ dɛɛn li Raba tɩʋ kʋm mʋ yɩ o nii kʋ maama. O ma kwe Yuri o zɩgɩ je sɩlʋ ba dʋna bam pamaŋna bam na daga tɩn. 17 Tɩʋ kʋm nɔɔna ma nuŋi ba jeeri Zoabɩ jar-kərə bam dɩ najara. Ba ma gʋ Davidi nɔɔna bam badonnǝ kʋ wǝli dɩ Yuri tɩtɩ.
18 Zoabɩ ma tʋŋɩ kwǝrǝ Davidi tee nɩ sɩ o brɩ-o najara yam na kɩ te tɩn. 19 O ma ta tɩntʋŋnʋ wʋm o wɩ: «Nmʋ na tʋlɩ najara yam na kɩ te maama tɩn n pa pɛ wʋm n ti, 20 o banɩ wʋ́ wanɩ dɩ zaŋɩ yɩ o ta wɩ: ‹Bɛɛ mʋ yɩ á tiini á yi tɩʋ kʋm sɩ á kɩ najara dɩ ba? Abam ya yǝri nɩ nɔɔna bam wʋ́ dalɩ ba tɩʋ kabri sɩm nɩ ba ta cɩna na? 21 Á swe Zidɩɔn bu Abimelɛkɩ swiə na? Kʋ dɛɛn yɩ kaanɩ mʋ zɩgɩ Tebezɩ tɩʋ kʋm kəbrə yuu nɩ o dʋlɩ nɔŋɔ namim o dɩ o yuu nɩ o gʋ. Abam tiini á yi ba kəbrə kam təŋə wʋ bɛɛ mʋ?› Tɔ. Pɛ wʋm na bwe‑m kʋntʋ, sɩ n ta dɩd-o wɩ: ‹Nmʋ tɩntʋŋnʋ Yuri dɩ tɔgɩ o tɩ mʋ.› »
22 Tɩntʋŋnʋ wʋm ma sɩɩnɩ o vu o yi Davidi te, yɩ o tʋlɩ kʋlʋ maama Zoabɩ na brɩ-o sɩ o ta tɩn. 23 O ma wǝli da o wɩ: «Dɩ́ dʋna bam ya tiini ba dana ba dwe dɩbam mʋ. Ba ma nuŋi ba tɩʋ kʋm ba jeeri dɩbam dɩ najara pwələ kam nɩ. Dɩ́ ma kwaanɩ dɩ́ zəli-ba dɩ́ joori ba tɩʋ kʋm ni nɩ. 24 Dáanɩ mʋ ba cɩ-tara bam zɩgɩ ba tɩʋ kabri sɩm yuu nɩ ba ta dɩbam. Nmʋ nɔɔna bam badonnǝ tɩga, yɩ n tɩntʋŋnʋ Yuri na yɩ Hɛtɩ tu tɩn dɩ tɔgɩ o tɩ mʋ.»
25 Davidi ma ta dɩ tɩntʋŋnʋ wʋm o wɩ: «Nmʋ na joori, sɩ n ta dɩ Zoabɩ nɩ: ‹Yɩ pa n wʋʋ cɔgɩ dɩ kʋlʋ na kɩ tɩn. Wʋlʋ maama na loori o vu najara wʋnɩ tɩn waɩ o tʋa. Fɔgɩ n ja baarɩ. Tiini á kwaarɩ-na najara yam dɩ ba sɩ á di tɩʋ kʋm.› »
26 Bat-Seba na ni nɩ o barʋ wʋm tɩga najara yam nɩ tɩn, o ma keeri zanzan o ŋwaanɩ. 27 Luə kam ni na kɛ tɩn, mʋ Davidi tʋŋɩ o pa ba vu ba ja-o ba ba pɛ sɔŋɔ pa o ji o kaanɩ. O dɛɛn ma lʋ bəkərə o pa Davidi.
Kʋlʋ Davidi nan na kɩ tɩn dɛɛn cɔgɩ Baŋa-Wɛ wʋʋ mʋ.