Natan na bwɛ Davidi te tɩn
12
Baŋa-Wɛ dɛɛn ma tʋŋɩ Natan Davidi tee nɩ.a Natan ma ta o wɩ:«Nɔɔna bale mʋ zʋʋrɩ tɩʋ dɩdʋa wʋnɩ. Ba dɩdʋa yɩ nadum, wʋdoŋ wʋm maa yɩ yinigə tu. 2 Nadum wʋm vara bam gaalɩ zanzan, naanɩ dɩ peeni dɩ bʋnɩ. 3 Yinigə tu wʋm nan ba jɩgɩ kʋlʋkʋlʋ, kʋ na daɩ pi-cwɛn dɩdʋa yɩranɩ mʋ o na yəgi. O ma kɔnɩ-ka, yɩ ka bɩ dɩ o biə. O maa yǝni o paɩ-ka o tɩtɩ wʋdiu pa ka di, yɩ ka nyɔ o tɩtɩ na. Piə kam maŋɩ ka tigi o nɛ baŋa nɩ mʋ. Cɩga tɩn, o piə kam yɔɔrɩ ka nyɩ dɩ o tɩtɩ bukɔ mʋ. 4 Dɛ dɩdwɩ mʋ vəru tu nadum wʋm sɔŋɔ. Nadum wʋm maa wʋ sɛ sɩ o lɩ o vara bam wʋnɩ sɩ ba ma ba kɩ na ba pa o vəru wʋm. O ma vu o vrɩ yinigə tu wʋm piə kam sɩ ba ma ba kɩ o vəru wʋm na bam.»
5 Davidi na ni sɩnswala kam tɩn, o banɩ ma tiini dɩ zaŋɩ dɩdaanɩ nadum wʋm yɩ o ta dɩ Natan o wɩ: «Amʋ dugi dɩ Ŋwɩa Tu Baŋa-Wɛ nɩ nɔɔnʋ wʋm kʋntʋ maŋɩ sɩ o tɩ mʋ! 6 O ta wʋ́ ŋwɩ kʋlʋ o na vrɩ yinigə tu wʋm tee nɩ tɩn kuni bɩna mʋ o pa‑o, o na ba jɩgɩ o ŋwaŋa tɩn ŋwaanɩ.»
7 Natan laan ma ta dɩ Davidi o wɩ: «Nmʋ mʋ yɩ nɔɔnʋ wʋm kʋntʋ! Yisɩrayɛlɩ tiinə Baŋa-Wɛ dɩm kwǝrǝ mʋ tɩntʋ:
Amʋ mʋ kuri‑m sɩ n ta n yɩ Yisɩrayɛlɩ tiinə pɛ, yɩ a joŋi‑m a yagɩ Sooli jɩŋa nɩ. 8 A ma kwe Sooli paarɩ dɩm a pa‑m, yɩ a ta pa o kaana bam ji nmʋ nyɩm. A ma pa n di paarɩ Yisɩrayɛlɩ dɩ Zuda tiinə bam maama baŋa nɩ. Kʋntʋ ya na ba daga mʋ dɩ, a ya ta wʋ́ wanɩ a wǝli kʋ wʋnɩ kuni bɩle a pa‑m. 9 Bɛŋwaanɩ mʋ nmʋ nan tiini n gooni amʋ Baŋa-Wɛ taanɩ dɩm, yɩ n daarɩ n kɩ wo-balɔrɔ kʋntʋ? Nmʋ pɛ Amɔn tiinə gʋ Hɛtɩ tu Yuri najara nɩ. Nmʋ na gʋ-o tɩn, n laan ma n daarɩ n di o kaanɩ! 10 Nan lwarɩ nɩ n digə tiinə laan wʋ́ taa tɔgɩ najara baŋa nɩ mʋ ba tʋa. Bɛŋwaanɩ, n vɩn amʋ mʋ yɩ n vrɩ Yuri kaanɩ sɩ o ji nmʋ nyɩm.
11 Cɩga ŋwaanɩ tɩn, a lagɩ a pa n tɩtɩ yɩra nɔɔnʋ mʋ kɩ-m sɩ kʋ yi. Nmʋ wʋ́ ta n niə sɩ a kwe n kaana a pa nɔn-gaa sɩ kʋ tu pəni dɩ ba pooni yigə nɩ.b 12 Nmʋ na kɩ lwarɩm tɩn, n səgi mʋ n kɩ. Amʋ nan wʋ́ pa kǝm dɩntʋ kɩ pooni yigə nɩ sɩ Yisɩrayɛlɩ tiinə bam maama na.»
13 Davidi ma ləri Natan o wɩ: «Amʋ tiini a kɩ lwarɩm a cɔgɩ Baŋa-Wɛ yigə.»c Natan ma lǝr-o o wɩ: «Baŋa-Wɛ kwe n lwarɩm dɩm DƖ ma DƖ cɛ‑m. N daa n bá tɩ. 14 Kʋ nan na yɩ te tɩn, n na tiini n nii Baŋa-Wɛ n gooni dɩ n kǝm dɩm tɩn ŋwaanɩ, n bu wʋm mʋ wʋ́ tɩ.»d
15 Kʋntʋ kwaga nɩ, Natan laan ma viiri.
Davidi bu wʋm tʋʋnɩ
Baŋa-Wɛ dɛɛn ma pa bu wʋlʋ Yuri kaanɩ Bat-Seba dɩ Davidi na lʋgɩ daanɩ tɩn ba jɩgɩ yazurə yɩ kʋ tiini kʋ cɛ. 16 Davidi ma loori Wɛ o pa bu wʋm sɩ o na yazurə, yɩ o vɔ ni. Tɩtɩ maama nɩ, o na yǝni o zʋ digə sɩ o pəni, o ta tigi tɩga nɩ mʋ. 17 O sɔŋɔ kʋm nakwa bam ma vu o te ba kwaanɩ ba loori‑o sɩ o zaŋɩ tɩga kam nɩ yɩ ba ga. O ma vɩn sɩ o da dɩ ba o di wʋdiu.
18 Bu wʋm ba jɩgɩ yazurə da yarpɛ mʋ yɩ o tɩ. Davidi dɩdɛɛra bam ma kwarɩ sɩ ba pa o lwarɩ kʋ ni nɩ. Ba dɛɛn bwɛ ba tɩtɩ nɩ mʋ ba wɩ: «Bu wʋm ya ta na ŋwɩ yɩ dɩ́ ŋɔɔnɩ taanɩ dɩ Davidi tɩn, o vɩn sɩ o ləri dɩ́ taanɩ dɩm. Bu wʋm laan nan na tɩgɩ tɩntʋ tɩn, dɩ wʋ́ kɩ tɛ mʋ dɩ́ ta dɩ́ brɩ-o? Dɩ́ na wʋ lwarɩ, oó wanɩ o kɩ zʋnnɩ o tɩtɩ yɩra nɩ!»
19 Davidi na tʋlɩ o na nɩ o tɩntʋŋna bam jɩgɩ woŋo mʋ ba waasɩ ba brɩ daanɩ tɩn, o ma maanɩ nɩ bu wʋm mʋ tɩga. O ma bwe-ba o wɩ: «Bu wʋm tɩgɩ mʋ na?» Ba ma lǝr-o ba wɩ: «Ɛɛn, Wɛ joŋ-o mʋ DƖ daarɩ dɩbam.»
20 Davidi na ni kʋntʋ tɩn, o ma pɛ o zaŋɩ tɩga kam nɩ. O ma vu o swɛ o yɩra, o daarɩ o turi nugə. O ma ləni o gwaarʋ o zʋ, yɩ o laan vu o zʋ Wɛ digə kam nɩ o zuli Baŋa-Wɛ. O na zuli Wɛ o ti tɩn, mʋ o joori o tɩtɩ sɔŋɔ yɩ o wɩ: ba kɩ wʋdiu ba pa‑o. O ma joŋi wʋdiu kʋm o di. 21 O dɩdɛɛra bam ma bwe‑o ba wɩ: «Nmʋ kǝm dɩm kɩ dɩbam yǝǝu zanzan. Bu wʋm ta na ŋwɩ tɩn, nmʋ keeri mʋ o ŋwaanɩ, yɩ n vɔ ni. O laan nan na tɩgɩ tɩn, n zaŋɩ mʋ n wʋra n di wʋdiu. Bɛɛ mʋ kʋntʋ?»
22 Davidi ma lǝri-ba o wɩ: «Bu wʋm ya ta na ŋwɩ tɩn, amʋ ya vɔ ni mʋ yɩ a keerǝ. A ya bʋŋɩ nɩ Baŋa-Wɛ wʋ́ wanɩ DƖ duri amʋ yibwənə mʋ yɩ DƖ pa bu wʋm wəri. 23 Amʋ nan gɛ‑o. Bɛŋwaanɩ mʋ a daa wʋ́ taa vɔ ni? Amʋ wʋ́ wanɩ a pa bu wʋm joori o taa ŋwɩ na? Dɛ wʋra amʋ na wʋ́ vu bu wʋm te, sɩ wʋntʋ daa ba lagɩ o joori o ba amʋ te.»
24 Davidi dɛɛn ma ganɩ o kaanɩ Bat-Seba sɩ o pa o bɩcarɩ pəni tɩga nɩ. Ba daa ma pəni daanɩ yɩ o ja pugə o lʋ bəkərə. Ba ma pa bu wʋm kʋntʋ yɩrɩ wɩ: ‹Solɔmɔn›. Baŋa-Wɛ ma soe bu wʋm. 25 Kʋ ma pa o tʋŋɩ o nijoŋnu Natan sɩ o vu o pa bu wʋm yɩrɩ nɩ ‹Yedidia›e, Baŋa-Wɛ na soe‑o tɩn ŋwaanɩ.
Davidi di Raba tɩʋ kʋm
26 Kʋ daarɩ Zoabɩ dɛɛn daa ta jeeri Amɔn tiinə balʋ na zʋʋrɩ Raba tɩʋ wʋnɩ tɩn dɩ najara. O ma di tɩʋ kʋm paarɩ je sɩm. 27 O laan ma tʋŋɩ kwǝrǝ o pa Davidi yɩ o wɩ: «Amʋ kɩ najara dɩ Raba tɩʋ kʋm yɩ a wanɩ mɛ ba tɩʋ kʋm na bam na zɩgɩ da ba tui tɩn a ja. 28 Nan kwaanɩ n la dɩ́ jar-kərə balʋ na daarɩ tɩn n kɩ daanɩ, sɩ n ba n jeeri tɩʋ kʋm dɩ najara n daarɩ n di-ba. Nmʋ na wʋ kɩ kʋntʋ, yɩ amʋ tɩtɩ na di tɩʋ kʋm, amʋ laan wʋ́ joŋi yɩrɩ nmʋ yigə nɩ.»
29 Davidi ma sɩɩnɩ o la o jar-kərə bam o kɩ daanɩ o vu o jeeri Raba tiinə bam dɩ najara. O ma wanɩ tɩʋ kʋm o joŋi o te. 30 Davidi ma dwanɩ səbu-sɩŋa paarɩ yipugə kam ba pɛ wʋmf yuu nɩ. Ka duuni daga zanzan, nɩnɛɛnɩ kilo fiintɔ-tɩnu (35), yɩ kandwɛ-nyɩɩnɩ mʋ məəli ka yɩra nɩ. Ba ma kwe kandwɛ dɩm ba kɩ Davidi yipugə kam nɩ. O dɩ o nɔɔna bam dɛɛn ta ma pɛ tɩʋ kʋm jɩjɩgɩrʋ zanzan ba ja ba viiri. 31 Kʋ nan na yɩ tɩʋ kʋm nɔn-biə bam, o jaanɩ-ba o vu o pa babam tʋŋɩ gabɛ-tɩtʋŋa mʋ, o pa babam goni dɛ dɩ sʋm, badaara maa cɩrɩ kandwa, badonnə maa goni tweeru dɩ doorə, babam maa magɩ wara. Davidi dɛɛn kɩ Amɔn tiinə tɩɩnɩ dɩm maama kʋntʋ doŋ mʋ.
Kʋntʋ kwaga nɩ, Davidi dɩdaanɩ o jar-kərə bam maama ma joori ba vu Zeruzalɛm.