Davidi kweelim bɩtarɩ
23
Davidi bɩtarɩ sɩlʋ o na pʋpʋnɩ o kweeli tɩn mʋ tɩntʋ:«Cəgi-na Zese bu Davidi kwǝrǝ.
Zakɔbɩ Tu Baŋa-Wɛ pɛ o joŋi yɩrɩ,
DƖ daarɩ DƖ kur‑o sɩ o di paarɩ.
O maa yɩ lən-leenu wʋlʋ Yisɩrayɛlɩ tiinə na soe tɩn.
2 Baŋa-Wɛ Joro mʋ brɩ-nɩ kʋlʋ a na wʋ́ ta tɩn.
Cɩga ŋwaanɩ tɩn, o tɔgɩ amʋ ni baŋa nɩ mʋ o ŋɔɔnɩ.
3 Yisɩrayɛlɩ tiinə Wɛ dɩm tɩtɩ mʋ ŋɔɔnɩ,
Wɛ dɩlʋ na yɩ Yisɩrayɛlɩ tiinə dalɩm je tɩn
ma ta dɩ amʋ DƖ wɩ:
‹Pɛ wʋlʋ na tɔgɩ cɩga o te o nɔɔna
yɩ o kwarɩ Wɛ,
4 kʋ tu nyɩ dɩ wɛ mʋ puli tɩ-pʋra nɩ
yɩ kunkwǝǝnu tǝri wɛɛnɩ te.
O ta maa nyɩ dɩ wɩa na pa gaarʋ nyɩɩnɩ
dʋa nɩnɩm kwaga nɩ te tɩn.›
5 Wɛ nan wʋ́ sɩɩnɩ DƖ kɩ yu-yoŋo amʋ dwi dɩm baŋa nɩ kʋntʋ doŋ mʋ.
Dɩntʋ goni ni dɩ amʋ sɩ DƖ zəni-nɩ.
Ni-gonim dɩm kʋntʋ wʋ́ taa wʋra maŋa maama.
Maŋa maama dɩ bá fɔgɩ dɩ ləni,
dɩ nan daa bá gɔ.
Baŋa-Wɛ lagɩ DƖ yɔɔrɩ DƖ joŋi-nɩ mʋ DƖ yagɩ.
Kʋlʋ maama amʋ wʋbʋŋa na lagɩ tɩn mʋ,
Wɛ wʋ́ sɩɩnɩ DƖ kɩ DƖ pa-nɩ.
6 Kʋ nan na yɩ nɔn-wo-kʋrrʋ maama,
bantʋ nyɩ dɩ sabarɩ sɩlʋ nɔɔna na dʋlɩ ba yagɩ tɩn mʋ.
N bá wanɩ n ma n jɩŋa n ja sabarɩ sɩntʋ doŋ.
7 Wʋlʋ na lagɩ o dwe sabarɩ sɩm kʋntʋ,
kʋ tu maŋɩ sɩ o kwe luu,
naa cicwe mʋ o ma o tʋŋɩ,
yɩ o laan daarɩ o zwɛ-sɩ kulə!»
Pamaŋ-bɩbɛ sɩlʋ na wǝli Davidi tɩn
1 Wǝǝnu Kɩbarɩ tɔnɔ 11:10-41
8 Pamaŋ-bɩbɛ sɩlʋ dɛɛn na wʋ Davidi tee nɩ ba zən‑o dɩ jara-kǝm tɩn yɩra mʋ tɩntʋ:
Yosɛb-Basebɛtɩ dɛɛn mʋ yɩ ‹Pamaŋ-bɩbɛ sɩtɔ sɩm› yigə tu wʋm.a Wʋntʋ nuŋi Takemoni mʋ. O dɛɛn jeeri nɔɔna biə-nana (800) mʋ dɩ najara. O ma kwe o cicwe o ma gʋ ba maama jara-kǝm dɩdʋa baŋa nɩ.
9 Wʋlʋ na saŋɩ wʋntʋ kwaga pamaŋ-bɩbɛ sɩtɔ sɩm wʋnɩ tɩn dɛɛn yɩ Dodo bu Eleyazaarɩ mʋ. Ba maa yɩ Awoyi sɔ-yuu tiinə. Dɛ dɩdwɩ Filisi tiinə bam na gilimi najara ŋwaanɩ tɩn, wʋntʋ dɩ Davidi ma yiŋi-ba dɩ najara. Yisɩrayɛlɩ jar-kərə bam maama ma titwəni ba joori kwaga, 10 sɩ Kʋ daarɩ Eleyazaarɩ, wʋntʋ pɛ o zaŋɩ mʋ o jeeri Filisi tiinə bam. O ma kwe o sʋ-lɔŋɔ o jɩgɩ-ba o zɔ o gʋɩ taan yɩ o daa warɩ sɩ o dɩ-kʋ tɩga nɩ o yɩra na cɛ tɩn ŋwaanɩ. Dɩntʋ dɛ dɩm nɩ Baŋa-Wɛ dɛɛn ma pa Yisɩrayɛlɩ tiinə bam di wɔnɔ zanzan. Kʋ kwaga nɩ Yisɩrayɛlɩ tiinə bam ma joori ba ba ba pu Eleyazaarɩ kwaga. Kʋlʋ yɩranɩ na daarɩ sɩ ba kɩ tɩn maa maŋɩ sɩ ba buŋi twa bam yɩra ba nii sɩ ba daarɩ ba vrɩ ba zɩla yam.
11 Wʋlʋ na saŋɩ o kɩ batɔ tu tɩn yɩ Age bu Shama mʋ. Ba maa yɩ Ararɩ sɔ-yuu tiinə. Filisi tiinə bam dɛɛn tu ba gilimi Lehi nɩ mʋ mɛ soonə kara na wʋra tɩn. Yisɩrayɛlɩ tiinə bam ma duri sɩ ba lu Filisi tiinə bam jɩŋa nɩ. 12 Shama ma zɩgɩ soonə kara kam tɩtarɩ nɩ o kwaanɩ o kɩ najara yam ka ŋwaanɩ. O ma gʋ Filisi tiinə bam zanzan. Baŋa-Wɛ dɛɛn ma pa Yisɩrayɛlɩ tiinə bam di wɔnɔ zanzan.
13 Bɩnɩ dɩdwɩ: kʋ na maŋɩ dɩ mɩna zagɩm tɩn, mʋ pamaŋ-bɩbɛ fiintɔ sɩm wʋnɩ sɩtɔ dɛɛn ve Davidi te, o na səgi Adulamɩ piu bɔɔnɩ wʋnɩ tɩn. Filisi tiinə jar-kərə kɔgɔ kʋdoŋ ya tu ba kikili Refayim bolo kʋm nɩ. 14 Ba kɔgɔ kʋdoŋ dɩ ya joŋi Betelɩhɛm tɩʋ kʋm mʋ ba wʋra. Kʋntʋ maama dɩdaanɩ Davidi ya wʋ o piu kʋm dalɩm je sɩm nɩ mʋ. 15 Davidi wʋbʋŋa ma tiini ya ja o tɩtɩ tɩʋ kʋm yɩ o ta o wɩ: «Wɔɔ mʋ wʋ́ zaŋɩ o vu Betelɩhɛm sɩ o mɔ na vʋlɩ dɩlʋ na tigi tɩʋ kʋm manchoŋo ni nɩ tɩn wʋnɩ o ja o ba o pa-nɩ sɩ a nyɔ?» 16 Pamaŋ-bɩbɛ sɩtɔ sɩm kʋntʋ ma lɔɔrɩ ba tɔgɩ Filisi tiinə kɔgɔ kʋm wʋnɩ ba vu ba yi vʋlɩ dɩm ba mɔ na bam, yɩ ba joori ba ja-ba ba ba ba pa Davidi. Ba na joori tɩn, o ma vɩn sɩ o nyɔ na bam kʋntʋ. O ma lo-ba o yagɩ tɩga nɩ sɩ ba taa yɩ pɛɛrɩ ba pa Baŋa-Wɛ. 17 O ma ta o wɩ: «Amʋ Tu Baŋa-Wɛ, amʋ bá wanɩ a nyɔ na bantʋ! A na nyɔgɩ-ba, kʋ nyɩ dɩ a nyɔgɩ nɔɔna bantʋ jana mʋ, ba na sɛ sɩ ba ga ba ŋwɩa sɩ ba ma ba mɔ na bantʋ tɩn ŋwaanɩ.» O ma vɩn sɩ o nyɔ-ba.
Pamaŋ-bɩbɛ sɩtɔ sɩntʋ dɛɛn na tʋŋɩ te tɩn mʋ kʋntʋ.
18 Abisayi dɩ dɛɛn mʋ yɩ ‹Pamaŋ-bɩbɛ kɔgɔ kʋm›b wʋnɩ jar-kəru dɩdʋa. O maa yɩ Zoabɩ nyaanɩ yɩ ba nu yɩ Zeruya. O ma kwe o cicwe o jeeri nɔɔna biə-yatɔ (300) najara wʋnɩ o gʋ. Kʋntʋ ŋwaanɩ o ma na yɩrɩ pamaŋ-bɩbɛ sɩtɔ sɩm yigə nɩ. 19 Wʋntʋ dɛɛn mʋ nɛ yɩrɩ o dwǝni pamaŋ-bɩbɛ fiintɔ sɩm maama, yɩ o ji ba yigə tu. O nan wʋ wǝli pamaŋ-bɩbɛ sɩtɔ sɩm wʋnɩ.
20 Yehoyada bu Benaya dɩ dɛɛn yɩ jar-kəru mʋ na yɩ nɔn-babɩa. O nuŋi Kabezɩlɩ mʋ, yɩ o tʋŋɩ baarɩ zanzan. Benaya dɛɛn gʋ Moabɩ pamaŋ-bɩbɛ sɩle. O ta ma tu goŋo wʋnɩ o gʋ nyoŋo dɛ dɩdwɩ dʋ-kambanac na tʋɩ yɩ waarʋ tiini tɩ wʋra tɩn. 21 Benaya ta gʋ Ezipi nɔn-wagɩlɩ dɩdoŋ mʋ. Nɔɔnʋ wʋm dɛɛn ze cicwe mʋ. Yɩ kʋ daarɩ Benaya jɩgɩ da-lɔŋɔ. O ma vu o vrɩ cicwe dɩm Ezipi tu wʋm jɩŋa nɩ, o joori o ma-dɩ o zɔ‑o o gʋ. 22 Yehoyada bu Benaya dɛɛn na tʋŋɩ te tɩn mʋ kʋntʋ. O dɩ ma na yɩrɩ nɩnɛɛnɩ pamaŋ-bɩbɛ sɩtɔ sɩm te. 23 O ma tiini o na yɩrɩ pamaŋ-bɩbɛ fiintɔ sɩm wʋnɩ, sɩ o wʋ tɔgɩ o wǝli pamaŋ-bɩbɛ sɩtɔ sɩm wʋnɩ mʋ. Davidi ma pa Benaya ji balʋ na yɩr-o tɩn yigə tu.d
24 Balʋ dɩ na tɔgɩ ba wʋ ‹Pamaŋ-bɩbɛ fiintɔ sɩm› wʋnɩ tɩn mʋ tɩntʋ:
Zoabɩ nyaanɩ Azayɛlɩ.
Dodo bu Elanan, na nuŋi Betelɩhɛm tɩn.
25 Shama dɩ Elika, na yɩ Harodɩ tiinə tɩn.
26 Pelɛtɩ tu Helezɩ.
Ikɛsɩ bu Yirǝ, na nuŋi Tekoa tɩn.
27 Anatɔtɩ tu Abizeri.
Usati tu Mebunayi.
28 Awoyi tu Salɩmon.
Netofa tu Maharayi.
29 Baana bu Elɛbɩ, dɩ na yɩ Netofa tu tɩn.
Ribayi bu Itayi, na nuŋi Gibea tɩʋ Bɛnzamɛn laŋa kam nɩ tɩn.
30 Piratɔnɩ tu Benaya.
Hidayi, na nuŋi Gaasa bu-tʋlɩ sɩm seeni tɩn.
31 Araba tu Abi-Albɔn.
Barum tu Azɩmavɛtɩ.
32 Saalebon tu Eliaba.
Yasen biə bam.
Sararɩ bu Ahiyam, dɩ na yɩ Ararɩ tu tɩn.
34 Ahasabayi bu Elifelɛtɩ, na yɩ Maaka tu tɩn.
Ayitofɛlɩ bu Eliam, na yɩ Giloo tu tɩn.
35 Karmɛlɩ tu Esirayi.
Aribi tu Parayi.
36 Natan bu Igalɩ, na nuŋi Zoba tɩn.
Gadɩ tu Bani.
37 Amɔn tu Selɛkɩ.
Beerotɩ tu Narayi. Wʋntʋ dɛɛn ze Zeruya bu Zoabɩ najara zɩla yam mʋ.
38 Yetɛrɩ tu Yirǝ.
Yetɛrɩ tu Garɛbɩ.
39 Hɛtɩ tu Yuri.e
Pamaŋ-babɛ sɩm maama dɛɛn kɩ daanɩ sɩ yɩ fiintɔ-sɩrpɛ (37) mʋ.