Davidi na leeni o zuli Wɛ te tɩn
22
Baŋa-Wɛ dɛɛn na yɔɔrɩ DƖ joŋi Davidi DƖ yagɩ DƖ dʋna maama jɩŋa nɩ dɩdaanɩ Sooli jɩŋa nɩ tɩn, mʋ Davidi dɛ kʋ ŋwaanɩ o panɩ ləŋə kantʋ sɩ o ma o zuli Baŋa-Wɛ. 2 O ma leeni o wɩ:Baŋa-Wɛ mʋ yɩ amʋ dam jǝgǝ,
dɩ amʋ joŋnu.
DƖ nyɩ dɩ piu mʋ DƖ pa-nɩ.
3 Amʋ Tu Wɛ nyɩ dɩ piu gugoro,
a na dalɩ da tɩn mʋ.
DƖ maa yǝni DƖ kwəli-nɩ
nɩ najara cɩ-kwaŋa na kwǝli nɔɔna najara wʋnɩ te tɩn.
DƖ maa jɩgɩ dam sɩ DƖ ma
DƖ vrɩ-nɩ cam wʋnɩ.
DƖ maa kwǝri DƖ yɩ amʋ dalɩm je,
dɩ amʋ vɩrnʋ.
DƖ joŋi-nɩ vuvugə maama wʋnɩ mʋ DƖ yaga.
4 Amʋ yǝni a bəŋi Baŋa-Wɛ yɩrɩ mʋ.
DƖ dɩ maa joŋi-nɩ DƖ yagɩ
a dʋna jɩŋa nɩ.
Dɩntʋ maŋɩ sɩ nabiinǝ taa tee‑DƖ mʋ.
5 Tʋʋnɩ dɛɛn kɩkarɩ-nɩ dɩ vɔ,
nɩnɛɛnɩ na-fara na lagɩ
kʋ pu nɔɔnʋ kʋ ja te tɩn.
Kʋ nan ya gɛ fɩɩn mʋ
sɩ cɔgɩm yi-nɩ.
6 Kʋ nyɩ dɩ curu cwǝŋǝ ŋʋgɩ ŋʋnɩ mʋ ka vɔ amʋ ka tiŋi.
Tʋʋnɩ dɩ ma cɩ cɩkʋ
a cwǝŋǝ nɩ dɩ cəgi-nɩ.
7 Lɛɛrʋ na tiini tɩ jɩgɩ-nɩ tɩn,
mʋ a bəŋi Baŋa-Wɛ yɩrɩ.
A ma keeri a loori a Tu Wɛ
sɩ DƖ zəni-nɩ.
DƖ maa zɩgɩ DƖ sɔŋɔ kʋm nɩ
DƖ ni amʋ kwǝrǝ.
Amʋ kərə kam ma tʋ DƖ zwa nɩ,
yɩ DƖ wǝli-nɩ.
8 Tɩga baŋa maama maa sisiŋi
yɩ ka yɩra saɩ.
Pweeru tɩm dɩ maa sisiŋi,
Wɛ ban-zɔŋɔ kʋm ŋwaanɩ.
9 Nyʋa maa tɔgɩ o mʋmwa
ka nuŋǝ.
O ta ma daarɩ o twɩ min-vʋgʋ
dɩ min-cala,
yɩ ya tɔgɩ o ni nɩ ya nuŋi
ya di wǝǝnu bugi-bugi.
10 O ma kɔɔrɩ wɛyuu kʋm
nɩnɛɛnɩ digə ni gɔrɔ tɩn,
yɩ o laan daarɩ o tu tɩga kam baŋa nɩ.
O na maa tu tɩn,
mʋ kunkwən-luluru wʋ
o nɛ kuri nɩ.
11 O diini Serubɛn mʋ
o jaanɩ o maa kɛa.
Viu kʋm vwana baŋa nɩ mʋ
o tɔgɩ da o veǝ.
12 Lim mʋ o kwe o ma pu o tɩtɩ.
Kunkwən-luluru tɩlʋ na paɩ dʋ-fara tɩn ma kwǝl‑o.
13 Pooni maa wʋ o yigə nɩ dɩ nyɩɩna,
yɩ min-cala yam jaanɩ ya di min-vʋgʋ.
14 Yuutu Baŋa-Wɛ ma zɩgɩ wɛyuu nɩ DƖ bagɩ dɩ dam.
DƖ kwǝrǝ kam ma dwanɩ ka tʋ nɔɔna zwa nɩ.
15 DƖ ma ta DƖ cɩna yam,
pa DƖ dʋna bam jagɩ.
DƖ ma pa dʋa pɩpɩlɩ ka zəli-ba
yɩ ba duri ba je.
16 Baŋa-Wɛ banɩ na zaŋɩ
yɩ DƖ bagɩ DƖ dʋna tɩn,
mʋ nɩnɩʋ kʋm na bam pɔgɩlɩ
pa kʋ kuri naɩ jaja.
Wɛ na fin DƖ mʋmwa tɩn,
tɩga kam gugwəəru maama ma sisiŋi
pa tɩ tigi ja.
17 Baŋa-Wɛ ma zɩgɩ wɛyuu nɩ DƖ twɩ DƖ jɩŋa DƖ ja amʋ.
DƖ ma liiri-nɩ DƖ ja DƖ nuŋi na-luŋə wʋnɩ.
18 DƖ yɔɔrɩ DƖ joŋi-nɩ mʋ DƖ yagɩ a dʋna jɩŋa nɩ,
Bɛŋwaanɩ, balʋ na culi-nɩ tɩn tiini ba dana ba dwe-nɩ.
19 Amʋ ya wʋ lɛɛrʋ wʋnɩ mʋ
yɩ a dʋna bam sʋgɩ-nɩ.
Baŋa-Wɛ nan tu DƖ təli-nɩ
pa a zɩgɩ cɛpɩ.
20 DƖ wǝli-nɩ mʋ DƖ pa a nuŋi cam wʋnɩ.
DƖ ma yɔɔrɩ DƖ joŋi-nɩ DƖ yagɩ,
sɩ a taa wʋ pooni yigə nɩ,
DƖ wʋʋ na dɛ amʋ tɩn ŋwaanɩ.
21 Baŋa-Wɛ kɩ-nɩ lanyɩranɩ
a na tɔgɩ cɩga cwǝŋǝ tɩn ŋwaanɩ.
Amʋ na tʋŋɩ cɩga tɩn,
mʋ DƖ joori DƖ ŋwɩ-nɩ kʋntʋ doŋ.
22 Amʋ yɔɔrɩ a tɔgɩ Baŋa-Wɛ cwe sɩm mʋ.
A wʋ ywəri a Tu Wɛ kwaga nɩ
sɩ a daarɩ a tʋŋɩ lwarɩm.
23 DƖ niə yam maama mʋ amʋ tɔga.
A maa wʋ vɩn cullu tɩlʋ DƖ na pɛ tɩn.
24 A jɩgɩ cɩga mʋ DƖ yigə nɩ,
a na cʋ a tɩtɩ dɩdaanɩ lwarɩm tɩn ŋwaanɩ.
25 Kʋ ma pa DƖ joori DƖ kɩ-nɩ lanyɩranɩ,
dɩ a na tɔgɩ cɩga cwǝŋǝ
yɩ a kwǝri a tʋŋɩ dɩ cɩga tɩn ŋwaanɩ.
26 Amʋ Tu Baŋa-Wɛ!
Nmʋ yǝni n jɩgɩ cɩga mʋ
dɩ balʋ na jɩgɩ cɩga ba pa‑m tɩn.
Balʋ na jɩgɩ bʋra n yigə nɩ tɩn mʋ,
nmʋ yɔɔrɩ n tʋŋɩ lanyɩranɩ n pa-ba.
27 Kʋ na yɩ balʋ na jɩgɩ wʋ-poŋo tɩn,
nmʋ dɩ yɩ wʋ-poŋo tu mʋ n pa-ba.
Kʋ daarɩ nɔɔnʋ wʋlʋ na jɩgɩ bʋbʋŋ-balɔrɔ tɩn,
nmʋ mwanɩ kʋ tu mʋ.
28 Nmʋ yǝni n joŋi nabwənə mʋ n yaga.
Yɩ kʋ daarɩ n pa kamun-nyɩna joori ba tu tɩga.
29 Baŋa-Wɛ, nmʋ mʋ yɩ amʋ pooni.
Cɩga tɩn, n paɩ lim dɩlʋ na li amʋ tɩn
joori dɩ ji pooni mʋ.
30 Amʋ Tu Wɛ, nmʋ mʋ yǝni n pa amʋ dam,
sɩ a wanɩ a zəli a dʋna bam kɔgɔ maama.
N dam dɩm kʋntʋ ta ma wǝli-nɩ,
sɩ a wanɩ a faŋɩ a gaalɩ a dʋna bam tɩʋ kəbrə,
yɩ a daarɩ a di-ba.
31 Amʋ Tu Wɛ cwǝŋǝ kam lamma fasɩ mʋ!
DƖ ni-taanɩ dɩm yɔɔrɩ dɩ yɩ cɩga mʋ.
DƖ waɩ DƖ cʋ balʋ na səgi DƖ woro kʋm wʋnɩ tɩn,
nɩ najara cɩ-kwaŋa na kwǝli nɔɔna najara wʋnɩ te tɩn.
32 Wɛ dɩdoŋ daa tǝrǝ kʋ na daɩ Baŋa-Wɛ.
Dɩntʋ yɩranɩ mʋ yɩ piu kʋlʋ na yɩ dɩ́ dalɩm je tɩn.
33 DƖ maa jɩgɩ dam yɩ DƖ kwəli-nɩ.
DƖ ma pa a cwǝŋǝ tigi jasɩ sɩ a taa ve ka wʋnɩ.
34 DƖ ma pa a nɛ kwaarɩ tɩga,
nɩnɛɛnɩ wəŋə nɛ na yɩ te tɩn.
DƖ maa cʋ-nɩ sɩ a yɩ tʋ pweeru tɩm yuu nɩ.
35 Dɩntʋ ta brɩ-nɩ najara kǝm laŋa mʋ,
sɩ a taa waɩ a saŋɩ taŋa kalʋ na vaŋɩ dɩ dam tɩn a taɩ.
36 Baŋa-Wɛ,
nmʋ pɛ-nɩ jara-kǝm cɩ-kwaŋa sɩ ka taa kwəli-nɩ,
yɩ n joŋi-nɩ n yagɩ cam wʋnɩ.
Nmʋ na sɛ sɩ n wǝli-nɩ te tɩn pɛ a ji babɩa.
37 Nmʋ kwɛ cwǝŋǝ kalʋ na yalma tɩn mʋ
n tiŋi amʋ yigə nɩ,
sɩ a yɩ seeri a tʋ tɩga nɩ.
38 Amʋ zəli a dʋna bam mʋ a ja.
A ma yɔɔrɩ a magɩ ba maama a gʋ,
sɩ ba wʋlʋwʋlʋ yɩ daarɩ.
39 A cɩcʋgɩ-ba mʋ a dɩ tɩga nɩ
pa ba daa warɩ ba zaŋɩ wɛɛnɩ,
a na nɔnɩ-ba dɩ a naga tɩn ŋwaanɩ.
40 Baŋa-Wɛ, nmʋ mʋ pa-nɩ dam sɩ a taa ma a kɩ najara.
N paɩ a dʋna bam ba ba kuni doonǝ amʋ yigə nɩ.
41 N ta paɩ fʋʋnɩ ja a dʋna bam maama
yɩ ba pipiri mʋ ba duri ba daarɩ-nɩ.
Amʋ ma yɔɔrɩ a cɔgɩ balʋ na culi-nɩ tɩn.
42 Ba maa beeri zǝnǝ.
Nɔɔn-nɔɔnʋ nan tǝrǝ sɩ o joŋi-ba o yagɩ.
Ba ma keeri ba loori Baŋa-Wɛ,
DƖ nan wʋ ləri-ba!
43 Amʋ maa cʋ-ba a mumugi
sɩ ba ji nɩ tɩga fogo te.
A ta maa nɔnɩ-ba yɩ a cɩcʋgɩ-ba
nɩnɛɛnɩ ba yɩ cwǝŋǝ ni bwəru mʋ te.
44 Kʋ na yɩ vɩnvɩɩna na wʋ a dwi tiinə bam wʋnɩ tɩn,
nmʋ vrɩ-nɩ n yagɩ ba jɩŋa nɩ mʋ.
Nmʋ ta ma n pa a di paarɩ tɩɩnɩ zanzan baŋa nɩ,
sɩ a taa te dwi tiinə balʋ a ya na yǝri tɩn.
45 Dwi-gɛ tiinə mʋ tui ba gwanɩ amʋ yigə nɩ dɩ fʋʋnɩ.
Ba na yɔɔrɩ ba ni a taanɩ,
ba yǝni ba sɛ a ni mʋ.
46 Vərə bam kʋntʋ vwana yǝni ya da ya parɩ mʋ.
Ba ma zaŋɩ ba nuŋi ba dalɩm je sɩm wʋnɩ,
yɩ ba yɩra saɩ dɩ fʋʋnɩ.
47 Baŋa-Wɛ sɩɩnɩ DƖ ŋwɩ!
DƖ maa yɩ piu kʋlʋ na yɩ amʋ dalɩm je tɩn.
Kʋ maŋɩ mʋ sɩ dɩ́ taa tee‑DƖ.
Pa-na dɩ́ tee Dam-fɔrɔ Tu Baŋa-Wɛ!
Dɩntʋ nan mʋ joŋi amʋ DƖ yagɩ!
48 Dɩntʋ mʋ joori DƖ ŋwɩ jɩnɩ a dʋna baŋa nɩ.
DƖ maa kɩ dwi-gɛ tiinə amʋ dam kuri nɩ.
49 DƖ ta vrɩ-nɩ mʋ a dʋna jɩŋa nɩ DƖ yagɩ.
Amʋ Tu Baŋa-Wɛ!
Nmʋ mʋ pa-nɩ dam sɩ a di balʋ na culi-nɩ tɩn.
N ta ma n joŋi-nɩ wʋ-lʋn-nyɩna jɩŋa nɩ.
50 Kʋntʋ ŋwaanɩ nan mʋ, amʋ wʋ́ tee nmʋ yɩrɩ,
sɩ dwi-gɛ tiinə taa ye n ni nɩ.
Cɩga ŋwaanɩ tɩn, Baŋa-Wɛ,
amʋ wʋ́ leeni a tee nmʋ yɩrɩ.
51 Baŋa-Wɛ yǝni DƖ pa DƖ pɛ wʋm di wɔnɔ mʋ maŋa maama.
DƖ maa tɔgɩ DƖ sono kʋm baŋa
DƖ kɩ wʋlʋ DƖ na kuri tɩn lanyɩranɩ sɩ kʋ taa ve maŋa maama.
Kʋ maa yɩ amʋ Davidi dɩ a dwi dɩm mʋ kʋntʋ.