Gabawɔn tiinə bam bɩcara zuri
21
Maŋa kalʋ Davidi dɛɛn na di paarɩ tɩn, mʋ kana tu ka zʋ tɩga kam bɩna yatɔ ya saŋɩ daanɩ. Davidi ma ja Baŋa-Wɛ təŋə ka ŋwaanɩ. Baŋa-Wɛ ma ta DƖ brɩ-o DƖ wɩ: «Kʋ yɩ Sooli dɩ o digə tiinə bam na yɩ nɔn-gʋra yɩ ba gʋ Gabawɔn tiinə bam tɩn ŋwaanɩ mʋ te kʋntʋ.»2 Bantʋ dɛɛn daɩ Yisɩrayɛlɩ dwi tiinə. Ba maa yɩ Amɔɔrɩ tiinə balʋ na daarɩ ba dwi dɩm wʋnɩ tɩn. Yisɩrayɛlɩ tiinə bam dɛɛn ya dugi nɩ ba bá cɔgɩ-ba.a Dɩ kʋ dɩ, Sooli dɛɛn tiini o kwaanɩ sɩ o ti ba dwi dɩm mʋ, o na jɩgɩ wʋbʋbʋŋ-dɛɛra sɩ o wǝli Yisɩrayɛlɩ tiinə dɩ Zuda tiinə tɩn ŋwaanɩ.
Davidi ma bəŋi Gabawɔn tiinə bam, 3 yɩ o bwe-ba o wɩ: «Abam lagɩ sɩ a kɩ tɛ mʋ sɩ kʋ pa á wʋʋ tʋ? Dɩ́ lagɩ sɩ dɩ́ fɔgɩ dɩ́ kwɛ tusim dɩm, sɩ Baŋa-Wɛ da abam ŋwaanɩ DƖ kɩ DƖ nɔɔna bam yu-yoŋo.» 4 Gabawɔn tiinə bam ma ləri ba wɩ: «Səbu-sɩŋa dɩ səbu-poŋo bá wanɩ tɩ kwɛ tigurə kalʋ na tigi dɩbam dɩ Sooli dwi dɩm laŋa nɩ tɩn. Dɩ́ nan ba jɩgɩ cwǝŋǝ sɩ dɩ́ pa nɔɔn-nɔɔnʋ tɩ Yisɩrayɛlɩ tiinə bam wʋnɩ sɩ kʋ ma fɔgɩ kǝm dɩm.»
Pɛ wʋm laan ma ta o wɩ: «Nan ta-na kʋlʋ abam na lagɩ tɩn, sɩ amʋ wʋ́ kɩ-kʋ a pa abam.» 5 Ba ma lǝr-o ba wɩ: «Sooli dɛɛn yɔɔrɩ o bʋŋɩ sɩ o ti dɩ́ dwi dɩm mʋ, sɩ dɩ́ yɩ daarɩ Yisɩrayɛlɩ tɩga kam baŋa nɩ. Kʋntʋ mʋ pɛ o kwaanɩ o gʋ dɩbam zanzan. 6 Nan lɩ baara barpɛ o dwi dɩm wʋnɩ n ja n ba n pa dɩbam. Dɩbam dɩ maa wʋ́ ja-ba dɩ́ vu Sooli tɩtɩ tɩʋ Gibea, o na yɩ pɛ wʋlʋ Baŋa-Wɛ dɛɛn na kuri tɩn. Tɩʋ kʋm kʋntʋ nɩ mʋ dɩ́ wʋ́ gʋ-ba dɩ́ yagɩ Baŋa-Wɛ yigə nɩ.» Pɛ wʋm ma ta dɩ ba o wɩ: «Amʋ wʋ́ ja-ba a ba a pa abam.»
7 Kʋ daarɩ, Pɛ Davidi guli ni-gonim dɩlʋ o dɩ Sooli bu Zonatan dɛɛn na kɩ ba pa daanɩ Baŋa-Wɛ yigə nɩ tɩn. O ma yagɩ Zonatan bu Mefibosɛtɩ sɩ ba yɩ gʋ-o. 8 O ma daarɩ o ja Aramoni dɩ Mefibosɛtɩ wʋdoŋ. Bantʋ dɛɛn yɩ bəkəri sɩle sɩlʋ Aya bukɔ Risipa na lʋgɩ dɩ Sooli tɩn mʋ. O daa ta ma ja bəkəri sɩnu sɩlʋ Sooli bukɔ Merabɩ na lʋgɩ dɩ o barʋ Adriyɛlɩ tɩn. Adriyɛlɩ maa yɩ Mehola tu Bazilayi bu. 9 Davidi ma kwe baara barpɛ bam kʋntʋ o kɩ Gabawɔn tiinə bam jɩŋa nɩ. Ba dɩ ma joŋi-ba ba ja ba vu piu yuu nɩ yɩ ba gʋ-ba ba yagɩ Baŋa-Wɛ yigə nɩ. Ba maama barpɛ bam tɔgɩ daanɩ ba tɩ mʋ. Kʋ dɛɛn kɩ kʋ maŋɩ dɩ caarab zagɩm maŋa mʋ.
10 Aya bukɔ Rizipa dɛɛn ma kwe gwar-zɩnzwara o ja o din piu kʋlʋ yuu twa bam na tigi tɩn. O ma lwarɩ gɔrɔ kʋm o je pulɔrɔ kʋm baŋa nɩ. O ma maŋɩ da o jǝni, kʋ na zɩgɩ faa ni nɩ sɩ kʋ joori kʋ vu kʋ yi dʋa nɩnɩm maŋa tɩn. Wɩa maama, o maa yǝni o zəli zunə, sɩ ba yɩ jǝni twa bam baŋa nɩ. Tɩtɩɩ nɩ dɩ, o ta zəli ga-vara mʋ sɩ ba yɩ di-ba. 11 Davidi na ni kʋlʋ Sooli ka-biə Rizipa na kɩ tɩn, 12 o ma zaŋɩ o vu Yabɛsɩ Galadɩ sɩ o joŋi Sooli dɩdaanɩ o bu Zonatan kwi sɩm nɔɔna bam kʋntʋ tee nɩ. Maŋa kalʋ Filisi tiinə bam ya na gʋ Sooli dɩ Zonatan Giliboa piu kʋm yuu nɩ yɩ ba daarɩ ba palɩ ba yɩra yam Bɛtɩ-San tɩʋ kʋm pooni nɩ tɩn, kʋ yɩ Yabɛsɩ Galadɩ tiinə bam mʋ dɛɛn ve ba ŋɔ kwi sɩm ba ja joori ba tɩʋ kʋm.c 13 Davidi ma joŋi Sooli dɩdaanɩ Zonatan kwi sɩm ba tee nɩ yɩ o daarɩ o vu o pɛ nɔɔna barpɛ bam Gabawɔn tiinə bam na gʋ ba yagɩ tɩn dɩ kwi sɩm o wǝli da. 14 Ba ma kwe Sooli dɩ Zonatan kwi sɩm maama ba ja ba vu ba kɩ Sooli ko Kisi yibeeli dɩm wʋnɩ. Bɛnzamɛn laŋa kam tɩʋ Zɩla nɩ mʋ kʋntʋ. Ba ta ma kɩ kʋlʋ maama Pɛ Davidi na pɛ ni sɩ ba kɩ tɩn. Ba na kɩ kʋntʋ maama ba ti tɩn, Baŋa-Wɛ laan ma sɛ ba tɩʋ kʋm wɛ-loro.
Davidi zaŋɩ najara dɩ Filisi tiinə
15 Filisi tiinə bam dɛɛn daa jaanɩ najara mʋ ba jeeri Yisɩrayɛlɩ tiinə bam. Davidi ma zaŋɩ o tɔgɩ dɩ o jar-kərə bam sɩ ba vu ba ja najara dɩ ba. Najara yam wʋnɩ mʋ Davidi tiini o bwəni zanzan. 16 Nɔɔnʋ wʋdoŋ dɛɛn tɔgɩ o wʋra, o yɩrɩ mʋ Yisibi-Bɩnodɩ. O nuŋi nɔn-sawaarʋ dwi dɩm wʋnɩ mʋ. O cicwe dɩm duuni dɛɛn tiini dɩ gaalɩ dɩ dwe canna kilo tɩtɔ (3), yɩ o vɔ sʋ-lɔŋɔ nadʋŋʋ o yɩra nɩ. O wʋbʋŋa ma ja sɩ o gʋ Davidi. 17 Zeruya bu Abisayi ma vu Davidi te o joŋ-o o yagɩ. O ma magɩ Filisi tu wʋm o gʋ. Pɛ Davidi nɔɔna bam ma da kʋ ŋwaanɩ ba goni ni dɩd-o ba wɩ: «Dɩ́ daa bá sɛ sɩ n da dɩbam n vu najara wʋnɩ. Bɛŋwaanɩ, Yisɩrayɛlɩ tiinə bam maama tɩɩna daŋɩ nmʋ baŋa nɩ mʋ. Dɩ́ tɩɩna yam kʋntʋ ba maŋɩ sɩ ya je.»
18 Kʋ kwaga nɩ, Filisi tiinə bam daa ma kɩ najara dɩ Yisɩrayɛlɩ tiinə bam Goba tɩʋ nɩ. Usati tɩʋ nɔɔnʋ Sibekayi ma gʋ nɔn-sawaarʋ dwi tu wʋdoŋ, o yɩrɩ mʋ Safɩ.
19 Yisɩrayɛlɩ tiinə bam daa ta ma zaŋɩ najara dɩ Filisi tiinə bam Goba nɩ. Betelɩhɛm tu Yayiri bu Elanan dɛɛn gʋ Gatɩ tu Goliatɩ cʋrʋ wʋdoŋ.de Wʋntʋ cicwe dɩm daga dɩ dwe garyi sɔɔna daa na maɩ te tɩn.
20 Najara yadonnə daa ma kɩ Gatɩ tɩʋ nɩ. Filisi tiinə bam babɩa wʋdoŋ maa wʋra o dɩ na yɩ nɔn-sawɔrɔ. O jɩŋa maama dɛɛn jɩgɩ nwa bardʋ bardʋ mʋ. O namimbiə dɩ maa yɩ bardʋ bardʋ. O nwa dɩ o namim-biə maama dɛɛn kɩ daanɩ ba yɩ 24 mʋ. O dɩ dɛɛn nan nuŋi Rafa dwi dɩm wʋnɩ mʋ. 21 O maa jɩgɩ Yisɩrayɛlɩ tiinə bam o twɩa. Davidi zɩmbaarʋ Shama bu Zonatan ma zaŋɩ o gʋ-o.
22 Filisi tiinə bana bam kʋntʋ dɛɛn mʋ yɩ nɔn-sawaarʋ dwi dɩm tiinə na nuŋi Gatɩ nɩ tɩn. Davidi dɩ o nɔɔna bam nan mʋ gʋ-ba.