Davidi ləŋə
Wɛ tɩntʋŋnʋ Davidi dɛɛn panɩ ləŋə kantʋ maŋa kalʋ Baŋa-Wɛ na joŋ-o o yagɩ Pɛ Sooli dɩ o dʋna bam maama jɩŋa nɩ tɩn.
18
Amʋ Tu Baŋa-Wɛ,a soe nmʋ.
Nmʋ mʋ yɩ amʋ dam.
2 Baŋa Wɛ nyɩ dɩ piu kʋlʋ
amʋ na dalɩ da tɩn mʋ.a
DƖ maa yɩ amʋ dam je
dɩdaanɩ amʋ vrɩnʋ.
Amʋ Tu Wɛ nyɩ dɩ piu gugoro,
a na səgi a tɩtɩ mɛ tɩn.
O maa yeini o cho-ne
ne jara nantana na kwoli nɔɔna
jara wone tei to.
O maa jege dam se o ma
o vere-ne cham wone.
O maa kwori o ye amo dalem jei.
3 Amʋ yǝni a bəŋi Baŋa-Wɛ yɩrɩ mʋ.
DƖ dɩ maa joŋi-nɩ DƖ yagɩ
a dʋna jɩŋa nɩ.
Dɩntʋ maŋɩ sɩ nabiinǝ taa tee‑DƖ mʋ.
4 Tʋʋnɩ dɛɛn kɩkarɩ amʋ dɩ vɔ.
Kʋ nan ya gɛ fɩɩn mʋ sɩ cɔgɩm pu amʋ kwaga dɩ ja
nɩnɛɛnɩ na-fara doŋ tɩn.
5 Kʋ nyɩ dɩ curu cwǝŋǝ ŋʋgɩ ŋʋnɩ mʋ ka vɔ amʋ ka tiŋi.
Tʋʋnɩ dɩ ma cɩ cɩkʋ
a cwǝŋǝ nɩ dɩ cəgi-nɩ.
6 Lɛɛrʋ na tiini tɩ yi-nɩ tɩn,
mʋ a bəŋi Baŋa-Wɛ yɩrɩ.
A ma keeri a loori a Tu Wɛ
sɩ DƖ zəni-nɩ.
DƖ maa zɩgɩ DƖ sɔŋɔ kʋm nɩ
DƖ ni amʋ kwǝrǝ.
Amʋ kərə kam ma yi DƖ te,
ka vu ka tʋ DƖ zwa nɩ.
7 Tɩga kam baŋa maa ziziŋi
yɩ ka yɩra saɩ.
Pweeru tɩm kurə maama dɩ ziziŋi mʋ yɩ ya dwana,
Wɛ ban-zɔŋɔ kʋm ŋwaanɩ.
8 Nyʋa maa tɔgɩ DƖ mʋmwa ka nuŋǝ.
DƖ ta ma daarɩ DƖ twɩ min-vʋgʋ
dɩ min-cala,
yɩ ya tɔgɩ DƖ ni ya nuŋi
ya di wǝǝnu bugi-bugi.
9 DƖ ma kɔɔrɩ wɛyuu kʋm
nɩnɛɛnɩ digə ni gɔrɔ tɩn,
DƖ daarɩ DƖ tu tɩga kam baŋa.
DƖ na maa tu tɩn,
kunkwən-luluru wʋ o nɛ kuri nɩ mʋ.
10 DƖ diini Serubɛn mʋ DƖ jaanɩ
DƖ maa kɛa.
Viu kʋm vwana baŋa nɩ mʋ
DƖ tɔgɩ da DƖ veǝ.
11 Lim mʋ DƖ kwe DƖ ma pu o tɩtɩ
sɩ kʋ ji woro kʋ pa‑DƖ.
Kunkwən-luluru tɩlʋ na paɩ
dʋ-fara tɩn ma kwǝli‑DƖ.
12 Pooni maa wʋ DƖ yigə nɩ
dɩ kalɩ kunkwǝǝnu tɩm.
Dʋ-kambana maa tɔgɩ da
ya tʋɩ tɩga nɩ,
yɩ dʋa kam pepelɩ
ka ta min-cala.
13 Yuutu Tu Baŋa-Wɛ dɩm mʋ zɩgɩ
wɛyuu nɩ DƖ bagɩ dɩ dam.
DƖ kwǝrǝ kam ma dwanɩ
ka tʋ nɔɔna zwa nɩ.
14 DƖ ma ta DƖ cɩna yam,
pa DƖ dʋna bam jagɩ.
DƖ mɛ dʋa pɩpɩlɩm mʋ DƖ zəli-ba
yɩ ba duri ba je.
15 Amʋ Tu Baŋa-Wɛ,
nmʋ banɩ na zaŋɩ
yɩ n bagɩ n dʋna bam tɩn,
mʋ nɩnɩʋ kʋm na bam pɔgɩlɩ
pa kʋ kuri naɩ jaja.
Nmʋ na fin n mʋmwa tɩn,
tɩga kam gugwəəru maama
ma ziziŋi pa tɩ tigi ja.
16 Baŋa-Wɛ ma zɩgɩ wɛyuu nɩ
DƖ twɩ DƖ jɩŋa DƖ ja amʋ.
DƖ ma liiri-nɩ DƖ ja DƖ nuŋi
na-luŋə wʋnɩ.
17 DƖ yɔɔrɩ DƖ joŋi-nɩ mʋ DƖ yagɩ
a dʋna bam jɩŋa nɩ,
Bɛŋwaanɩ, balʋ na culi amʋ tɩn
tiini ba dana ba dwe-nɩ.
18 Amʋ ya wʋ lɛɛrʋ wʋnɩ mʋ
yɩ a dʋna bam ma ja dɩ amʋ.
Baŋa-Wɛ nan tu o təli-nɩ
pa a zɩgɩ cɛpɩ.
19 DƖ wǝli-nɩ mʋ DƖ pa
a nuŋi cam wʋnɩ.
DƖ ma yɔɔrɩ DƖ joŋi-nɩ DƖ yagɩ
sɩ a taa wʋ pooni yigə nɩ,
DƖ wʋ na dɛ amʋ tɩn ŋwaanɩ.
20 Baŋa-Wɛ kɩ-nɩ lanyɩranɩ
a na tɔgɩ cɩga cwǝŋǝ tɩn ŋwaanɩ.
Amʋ jɩn sɩm na tʋŋɩ cɩga tɩn,
mʋ DƖ joori DƖ ŋwɩ-nɩ kʋntʋ.
21 Amʋ yɔɔrɩ a tɔgɩ Baŋa-Wɛ
cwe sɩm mʋ.
A wʋ ywəri a Tu Wɛ kwaga nɩ
sɩ a daarɩ a tʋŋɩ lwarɩm.
22 DƖ niə yam maama mʋ amʋ tɔga.
A maa wʋ vɩn cullu tɩlʋ DƖ na pɛ tɩn.
23 A jɩgɩ cɩga mʋ DƖ yigə nɩ,
a na yǝni a cʋ a tɩtɩ
dɩdaanɩ lwarɩm tɩn ŋwaanɩ.
24 Kʋ ma pa Baŋa-Wɛ joori
DƖ kɩ-nɩ lanyɩranɩ,
dɩ a na tɔgɩ cɩga cwǝŋǝ
yɩ a jɩn sɩm tʋŋɩ cɩga tɩn ŋwaanɩ.
25 Amʋ Tu Baŋa-Wɛ,
Nmʋ yǝni n jɩgɩ cɩga mʋ
dɩ balʋ na jɩgɩ cɩga ba pa‑m tɩn.
Balʋ na jɩgɩ bʋra n yigə nɩ tɩn mʋ,
nmʋ yɔɔrɩ n tʋŋɩ lanyɩranɩ
n pa-ba.
26 Kʋ na yɩ balʋ na jɩgɩ wʋ-poŋo tɩn,
nmʋ dɩ yɩ wʋ-poŋo tu mʋ
n pa-ba.
Kʋ daarɩ balʋ na tʋŋɩ kəm-balwaarʋ tɩn,
n kɩ swan mʋ pa kʋ cɛ ba yɩra nɩ.
27 Nmʋ yǝni n joŋi nabwənə mʋ
n yaga.
Kʋ nan na yɩ balʋ na brɩ ba tɩtɩ kamunni tɩn,
n yǝni n vaŋɩ-ba mʋ n dɩ tɩga nɩ.
28 Baŋa-Wɛ, nmʋ mʋ jaanɩ pooni
n ba n pa-nɩ.
Cɩga tɩn, amʋ Tu Wɛ, n paɩ
lim dɩlʋ na kwǝli amʋ tɩn
joori dɩ ji pooni.
29 Nmʋ mʋ yǝni n pa amʋ dam,
sɩ a wanɩ a zəli
a dʋna bam kɔgɔ maama.
N dam dɩm kʋntʋ ta ma wǝli-nɩ,
sɩ a wanɩ a faŋɩ a gaalɩ
a dʋna bam tɩʋ kəbrə,
yɩ a daarɩ a di-ba.
30 Amʋ Tu Wɛ cwǝŋǝ kam
lamma fasɩ mʋ!
DƖ ni-taanɩ dɩm yɔɔrɩ dɩ yɩ cɩga mʋ.
DƖ waɩ DƖ cʋ balʋ na səgi
DƖ woro kʋm wʋnɩ tɩn,
nɩ najara cɩ-kwaŋa na kwǝli nɔɔna
najara wʋnɩ te tɩn.
31 Wɛ dɩdoŋ daa tǝrǝ
kʋ na daɩ Baŋa-Wɛ.
Dɩntʋ yɩranɩ mʋ nyɩ dɩ piu kʋlʋ
dɩbam na wʋ́ dalɩ da tɩn.
32 DƖ maa jɩgɩ dam DƖ kwəli-nɩ,
yɩ DƖ pa a cwǝŋǝ tigi jasɩ
sɩ a taa ve ka wʋnɩ.
33 DƖ ta paɩ a nɛ warɩma,
nɩnɛɛnɩ wəŋə nɛ na yɩ te tɩn mʋ.
O maa cʋ-nɩ sɩ a yɩ tɩn
pweeru tɩm yuu nɩ.
34 Dɩntʋ ta brɩ-nɩ najara kǝm laŋa mʋ,
sɩ a taa waɩ a saŋɩ taŋa kalʋ
na vaŋɩ dɩ dam tɩn a taɩ.
35 Amʋ Tu Baŋa-Wɛ,
nmʋ pɛ-nɩ jara-kǝm cɩ-kwaŋa
sɩ ka taa kwəli-nɩ,
yɩ n joŋi-nɩ n yagɩ cam wʋnɩ.
Nmʋ jazɩm dɩm təli-nɩ mʋ
sɩ a zɩgɩ cɛpɩ.
Nmʋ na sɛ sɩ n wǝli-nɩ te tɩn
pɛ a ji babɩa.
36 Nmʋ kwɛ cwǝŋǝ kalʋ na yalma tɩn mʋ
n tiŋi amʋ yigə nɩ,
sɩ a yɩ seeri a tʋ tɩga nɩ.
37 Amʋ zəli a dʋna bam mʋ a ja.
A ma magɩ ba maama a gʋ
pa ba wʋlʋwʋlʋ wʋ daarɩ.
38 A cɩcʋgɩ-ba mʋ a dɩ tɩga nɩ
pa ba daa warɩ wɛɛnɩ sɩ ba zaŋɩ,
a na nɔnɩ-ba dɩ a naga tɩn ŋwaanɩ.
39 Baŋa-Wɛ, nmʋ mʋ pa-nɩ dam
sɩ a taa ma a kɩ najara.
N ta ma n paɩ a dʋna bam ba
ba kuni doonǝ amʋ yigə nɩ.
40 N ta pa fʋʋnɩ ja
a dʋna bam maama
yɩ ba pipiri mʋ ba duri
ba daarɩ-nɩ.
Amʋ ma yɔɔrɩ a cɔgɩ
balʋ na culi-nɩ tɩn.
41 Ba maa beeri zǝnǝ.
Nɔɔn-nɔɔnʋ nan tǝrǝ
sɩ o joŋi-ba o yagɩ.
Ba ma keeri ba loori Baŋa-Wɛ,
yɩ DƖ wʋ sɛ ba loro kʋm.
42 Amʋ maa cʋ-ba a mumugi
pa ba ji nɩnɛɛnɩ fogo viu
na kalɩ te tɩn.
A ma lo-ba a yagɩ
nɩnɛɛnɩ ba yɩ cwǝŋǝ ni bworu tɩn.
43 Kʋ na yɩ vɩɩna balʋ
na culi amʋ tɩn,
nmʋ vrɩ-nɩ n yagɩ ba jɩŋa nɩ mʋ.
Nmʋ ta ma n pa a di paarɩ
tɩɩnɩ zanzan baŋa nɩ,
sɩ a taa te dwi tiinə balʋ
a ya na yǝri tɩn.
44 Dwi-gɛ tiinə na yɔɔrɩ
ba ni amʋ taanɩ,
ba yǝni ba sɛ a ni mʋ.
Ba ta ma gwanɩ amʋ yigə nɩ
dɩ fʋʋnɩ.
45 Vərə bam gɛ baarɩ,
ba ma zaŋɩ ba nuŋi
ba dalɩm je sɩm wʋnɩ,
yɩ ba yɩra saɩ dɩ fʋʋnɩ.
46 Baŋa-Wɛ sɩɩnɩ DƖ ŋwɩ!
DƖ maa yɩ piu kʋlʋ
amʋ na dalɩ da tɩn.
Kʋ maŋɩ mʋ sɩ dɩ́ taa tee‑DƖ.
Pa-na dɩ́ tee Baŋa-Wɛ!
Dɩntʋ nan mʋ joŋi-nɩ DƖ yagɩ!
47 Dɩntʋ mʋ joori o ŋwɩ jɩnɩ
a dʋna baŋa nɩ.
DƖ maa jaanɩ dwi-gɛ tiinə DƖ tui
DƖ kɩ amʋ dam kuri nɩ.
48 DƖ ta joŋi-nɩ mʋ a dʋna jɩŋa nɩ DƖ yagɩ.
Amʋ Tu Baŋa-Wɛ,
nmʋ mʋ pa-nɩ dam
sɩ a di balʋ na culi-nɩ tɩn.
N ta ma n joŋi-nɩ
bɩbarɩ-nyɩna jɩŋa nɩ.
49 Kʋntʋ ŋwaanɩ nan mʋ,
amʋ wʋ́ tee nmʋ yɩrɩ,
sɩ dwi-gɛ tiinə taa ye n ni nɩ.
Cɩga ŋwaanɩ tɩn, Baŋa-Wɛ,
amʋ wʋ́ leeni a tee nmʋ yɩrɩ.b
50 Baŋa-Wɛ yǝni DƖ pa DƖ pɛ wʋm
di wɔnɔ mʋ maŋa maama.
DƖ maa tɔgɩ DƖ sono kʋm baŋa nɩ
DƖ kɩ pɛ wʋlʋ DƖ na kuri tɩn lanyɩranɩ sɩ kʋ taa ve maŋa kalʋ na ba ti tɩn.
Kʋ maa yɩ amʋ Davidi
dɩ a dwi dɩm mʋ kʋntʋ.