Davidi wɛ-loro
17
Baŋa-Wɛ,cəgi amʋ wɛ-loro kʋm
dɩ a na jɩgɩ bʋra te tɩn.
Pʋrɩ n zwa n cəgi a na keeri
a loori‑m te tɩn,
sɩ kʋ daɩ vwan mʋ a fɔɩ.
2 Nan zɩgɩ amʋ kwaga nɩ
sɩ a na a bʋra.
Pa n yiǝ taa naɩ
kʋlʋ na yɩ cɩga tɩn.
3 Nmʋ maanɩ n nii
amʋ wʋbʋŋa na yɩ te.
Nmʋ ma n fʋfɔ n yi amʋ te
tɩtɩ nɩ dɩ.
Nmʋ nan na makɩ-nɩ n nii
te maama tɩn, kʋlʋkʋlʋ tǝrǝ.
A wʋbʋŋa maŋɩ ya ja wɩ:
amʋ bá cɔgɩ dɩ a ŋwaŋa kam.
4 A ma cɩ a tɩtɩ sɩ a yɩ zʋ
bɩbarɩ-nyɩna cwe sɩm nɩ,
a na tɔgɩ n ni-taanɩ na brɩ te tɩn ŋwaanɩ.
5 A nan yɔɔrɩ a tɔgɩ
nmʋ cwe sɩm mʋ.
A brɩ a wʋ ywəri sɩ wʋnɩ.
6 Amʋ Tu Wɛ, a loori‑m mʋ,
bɛŋwaanɩ nmʋ mʋ wʋ́ ləri-nɩ.
Pʋrɩ n zwa sɩ n cəgi
a wɛ-loro kʋm.
7 Pa nmʋ na yɔɔrɩ n soe nɔɔna te tɩn taa brɩ jaja.
Nmʋ yǝni n kwe n jazɩm n ma
n vrɩ balʋ na salɩ nmʋ yɩra nɩ tɩn
n yagɩ ba dʋna jɩŋa nɩ.
8 Ta n yɩrɩ amʋ
nɩnɛɛnɩ n tɩtɩ yicilbu tɩn.
Pa a səgi n woro kʋm wʋnɩ,
nɩ nmʋ na yarɩgɩ n vɔna
n kwəli-nɩ te tɩn.a
9 Joŋi-nɩ pusɩŋ-nyɩna bam jɩŋa nɩ
dɩ ba na jɩgɩ dɩ amʋ te tɩn.
Vrɩ-nɩ a dʋna balʋ na culi-nɩ
yɩ ba gilimi-nɩ sɩ ba ja tɩn jɩŋa nɩ.
10 Ŋwaŋa tǝrǝ ba bɩcara nɩ.
Ba ni-taanɩ maa yɩ kamunni ŋwɛ yɩranɩ.
11 Ba pɛ amʋ kwaga mʋ ba pu.
Ba laan tu ba gilimi-nɩ.
Ba dʋlɩ ba yiə mʋ ba beeri pwələ kalʋ ba na wʋ́ da da,
yɩ ba nii sɩ ba dʋlɩ-nɩ
ba dɩ tɩga nɩ.
12 Ba maa nyɩ dɩ nywəənu tɩlʋ
wʋdiiru fra na jɩgɩ-tɩ tɩn mʋ.
Ba dalɩ mʋ sɩ ba laan nuŋi
ba ja-nɩ,
nɩnɛɛnɩ nyoŋ-pwalɩ na kɩ te tɩn.b
13 Baŋa-Wɛ, zaŋɩ wɛɛnɩ
n zaŋɩ najara dɩ ba,
sɩ n daarɩ n dɩ ba tɩga nɩ.
Kwe n sʋ-lɔŋɔ n ma n joŋi-nɩ
pusɩŋ-nyɩna bam jɩŋa nɩ n yagɩ.
14 Baŋa-Wɛ, ma n jɩŋa n vrɩ-nɩ
nɔɔna bam kʋntʋ dwi jɩŋa nɩ
n yagɩ.
Ba maa yɩ balʋ yigə na wʋ
lʋgʋ kʋntʋ yɩranɩ wʋnɩ
yɩ ba nyɔɔrɩ wʋ ŋwɩa kantʋ nɩ tɩn mʋ.
Nan pa ba na cam dɩlʋ
n na tiŋi ba ŋwaanɩ tɩn.
Pa ba di ba su ba daarɩ
ba pa ba biə,
sɩ bantʋ dɩ tiŋi cam
sɩ ba biə jwa taa di.
15 Kʋ nan na yɩ amʋ,
a wʋ́ ba a na nmʋ yibiyə,
a na jɩgɩ bʋra tɩn ŋwaanɩ.
A na dɔ a zaŋɩ,
a wʋ́ su mʋ dɩ ywəəni,
a na naɩ nmʋ nyɩnyʋgʋ
na yɩ te tɩn ŋwaanɩ.