Amʋ tɩɩna wʋ Wɛ tee nɩ
Davidi dɛɛn panɩ ləŋə kantʋ.
16
A Tu Wɛ, ta n cʋ amʋsɩ cam yɩ yi-nɩ!
A tu nmʋ te sɩ a səgi
n woro kʋm wʋnɩ mʋ.
2 Amʋ taga dɩ Baŋa-Wɛ a wɩ:
«Nmʋ yɩ amʋ Yuutu.
Wo-laarʋ tɩlʋ maama amʋ na jɩgɩ tɩn nuŋi nmʋ tee nɩ mʋ.»
3 Kʋ na yɩ cɩga tiinə balʋ
na zʋʋrɩ tɩga kam nɩ tɩn,
ba yɩ nɔn-yum mʋ cɩga cɩga.
Amʋ maa tiini a jɩgɩ wʋpolo
ba ŋwaanɩ.
4 Kʋ nan na yɩ balʋ na duri
ba tɔgɩ jwǝnǝ kwaga tɩn,
bantʋ wʋ-cɔgɔ kʋm
wʋ́ tiini kʋ gaalɩ mʋ.
Amʋ nan bá tɔgɩ a lo ba na bam.
A bá bəŋi ba jwǝnǝ yam yɩra
sɩ a kaanɩ a pa-ya.
5 Baŋa-Wɛ, nmʋ mʋ yɩ wʋlʋ na maŋɩ dɩ amʋ tɩn,
nmʋ yɩ a ŋwɩa ywəəni.
A ŋwɩa kam wʋ nmʋ jɩŋa nɩ.
6 Ŋwɩa kalʋ n na pɛ-nɩ tɩn
jɩgɩ ywəəni lanyɩranɩ.a
Cɩga ŋwaanɩ tɩn, wǝǝnu tɩlʋ
nmʋ na tiŋi sɩ a ba a joŋi tɩn
tiini tɩ lana.
7 Amʋ wʋ́ tee Baŋa-Wɛ
DƖ na pa-nɩ kwiə sɩ a wanɩ
a tɔgɩ cwǝŋǝ tɩn ŋwaanɩ.
Tɩtɩ nɩ nmʋ ta wǝli-nɩ a wʋbʋŋa nɩ mʋ sɩ a yɩ cɔgɩ.
8 Amʋ yɔɔrɩ a ye nɩ Baŋa-Wɛ mʋ
wʋ a tee nɩ maŋa maama.b
DƖ na wʋ a jazɩm seeni tɩn ŋwaanɩ,
DƖ zəni-nɩ mʋ sɩ a zɩgɩ cɛpɩ.
9 Kʋntʋ ŋwaanɩ a jɩgɩ wʋpolo lanyɩranɩ.
A ŋwɩa maama maa jɩgɩ ywəəni.
Amʋ yɩra dɩ daa bá taa saɩ.
10 Bɛŋwaanɩ, amʋ na tɩga,
n bá yagɩ-nɩ
sɩ a taa wʋ curu nɩ.
Nmʋ bá sɛ sɩ n tɩtɩ wʋ-poŋo tu wʋm yɩra pɔ.c
11 Nmʋ pɛ a lwarɩ cwe sɩlʋ
na paɩ ŋwɩa tɩn sɩ a taa tɔgɩ-sɩ.
Amʋ na yi nmʋ te,
nmʋ wʋ́ pa a na ywəəni zanzan.
A na tu a jǝni nmʋ jazɩm seeni,
amʋ laan wʋ́ su dɩ wʋpolo daanɩ
sɩ kʋ taa ve maŋa kalʋ na ba ti tɩn.