Wɛ paarɩ-zulǝ kʋm taanɩ
Davidi dɛɛn panɩ ləŋə kantʋ.
19
Wɛyuu kʋm brɩ Wɛ nɩnwaŋa kam na yɩ te tɩn mʋ.Kunkwǝǝnu tɩm dɩ maa paalɩ
kʋlʋ maama o jɩa na naanɩ tɩn.a
2 Dɛ maama yǝni dɩ kwe
kwǝrǝ kam kʋntʋ mʋ
dɩ paɩ dɛ dɩlʋ na saŋɩ-dɩ tɩn.
Tɩtɩɩ maama dɩ maa paɩ
sɩ kwǝrǝ kam jaga.
3 Wɛyuu wǝǝnu tɩntʋ ba ŋɔɔnɩ
bɩtarbiǝ sɩ ba taa zaŋa.
Tɩ kwǝri sɩm maa yɩ cɩmm mʋ.
4 Dɩ kʋ dɩ, tɩ ni-taanɩ dɩm
yi tɩga baŋa je maama mʋ.
Tɩ kwǝrǝ ma jagɩ ka yi
tɩga baŋa ni maama.b
Wɛ cwi vwe mʋ wɛyuu kʋm nɩ
DƖ pa wɩa kam
sɩ ka taa zʋʋrɩ da.
5 Ka laan maa yǝni ka puli,
nɩnɛɛnɩ ka-dʋʋrʋ barʋ na nuŋi digə nɩ dɩ wʋpolo te tɩn,
naa babɩa na duri dɩ dam
sɩ o di yigə te tɩn.
6 Ka maa yǝni ka zaŋɩ wɛyuu kʋm
daa dɩdʋa nɩ mʋ,
yɩ ka tʋlɩ ka cwǝŋǝ kam ka vu
ka yi daa wʋdoŋ kam nɩ.
Kʋlʋkʋlʋ bá səgi ka fʋnyʋgʋ dɩm yigə nɩ.
7 Baŋa-Wɛ niə yam yɔɔrɩ
ya yɩ cɩga cɩga mʋ.
Ya maa paɩ nɔɔna joori
ba na dam.
Baŋa-Wɛ zaasɩm yam jɩgɩ kuri.
Ya maa paɩ nayəri-nyɩna swan mʋ.
8 Baŋa-Wɛ kwǝrǝ kam tɔgɩ cwǝŋǝ.
Ka maa paɩ wʋpolo zanzan.
Baŋa-Wɛ ni-kaana yam
brɩ cɩga mʋ jaja.
Ya maa paɩ nɔɔna yi-pʋrʋ.
9 Nɔɔna na kwarɩ Baŋa-Wɛ, kʋ lana.
Kʋntʋ jɩgɩ kuri maŋa maama mʋ.
Baŋa-Wɛ wʋbʋŋa yam jɩgɩ cɩga.
Ya ba kɩ lwarɩm dɩ fɩnfɩɩn dɩ.
10 Wɛ niə yam jɩgɩ kuri
ya dwe səbu-sɩŋa zanzan,
ka na maŋɩ ka lana te maama dɩ.c
Ya ywəmmə ya dwe tʋʋrʋ,
dɩ tʋʋrʋ nugə maama.
11 Baŋa-Wɛ, nmʋ niə yam kaanɩ
n tɔgɩna mʋ.
Wʋlʋ maama na sɛ-ya,
kʋ tu naɩ nyɔɔrɩ zanzan mʋ
ya ŋwaanɩ.
12 Nɔɔnʋ wʋ́ wanɩ o lwarɩ
o na cɔgɩ te tɩn na?
Amʋ na cɔgɩ yɩ a yǝri kʋ ni nɩ,
sɩ n saarɩ a kəm-balwaarʋ dɩm kʋntʋ
n yagɩ n ma n cɛ-nɩ.d
13 Ta n cʋ-nɩ sɩ a yɩ paalɩ
a kɩ wo-lwaanʋ.
Yɩ pa lwarɩm taa jɩgɩ dam
amʋ baŋa nɩ.
Kʋntʋ mʋ a wʋ́ wanɩ a taa jɩgɩ bʋra dɩ a kənə maama,
yɩ a bá ywəri nmʋ kwaga nɩ.
14 Baŋa-Wɛ, pa a ni-taanɩ dɩm
dɩ a wʋbʋŋa maama
taa yɩ kʋlʋ na wʋ́ poli nmʋ wʋ tɩn.
Nmʋ nyɩ dɩ piu kʋlʋ amʋ na salɩ
kʋ yɩra nɩ tɩn mʋ.
N ta ma n yɩ amʋ vrɩnʋ.