Dɩ́ wʋ́ salɩ Baŋa-Wɛ yɩra nɩ
Davidi dɛɛn panɩ ləŋə kantʋ.
20
Cam na yi nmʋ,Baŋa-Wɛ wʋ́ ba DƖ zǝni-m.
O maa yɩ dɩ́ nabaarʋ Zakɔbɩ
Wɛ dɩm mʋ.
DƖ wʋ́ taa cʋ-m dɩ n dʋna bam.
2 DƖ wʋ́ zɩgɩ DƖ digə kam nɩ
DƖ tʋŋɩ DƖ zǝni nmʋ.
Siyɔn piu kʋm nɩ mʋ kʋntʋ,
DƖ lagɩ DƖ zɩgɩ da DƖ ba
DƖ zɩgɩ n kwaga nɩ.
3 DƖ ta wʋ́ guli
n pɛɛra yam maama gulə.
Kaanɩm dɩlʋ maama nmʋ na zwɛ
n pa‑DƖ tɩn wʋ su DƖ yi.
4 Wɛ wʋ́ pa n na n wʋbʋŋa
na lagɩ kʋlʋ tɩn,
sɩ n na jeeli kʋlʋ maama tɩn
sɩɩnɩ kʋ kɩ kʋ pa‑m.
5 Pɛ, nmʋ laan na wanɩ
dɩ́ dʋna bam n di,
dɩ́ wʋ́ taa caka mʋ.
Dɩ́ wʋ́ zǝŋi dɩ́ drapoo wɛɛnɩ
dɩ wʋpolo
dɩ́ Tu Wɛ dɩm yɩrɩ ŋwaanɩ.
Baŋa-Wɛ wʋ́ kɩ DƖ su n wɛ-loro kʋm maama DƖ pa‑m.
6 Amʋ laan tu a lwarɩ nɩ
Baŋa-Wɛ zǝni pɛ wʋlʋ DƖ na kuri tɩn
sɩ o wanɩ o dʋna bam.
DƖ zɩgɩ DƖ tɩtɩ sɔŋɔ mʋ
DƖ ləri pɛ wʋm na loori‑o
te maama tɩn.
DƖ maa tɔgɩ DƖ dam-fɔrɔ jazɩm dɩm baŋa nɩ
DƖ joŋ-o DƖ yagɩ.
7 Nɔɔna badonnǝ jɩgɩ tɩɩra
ba jara-kǝm tərikooru ŋwaanɩ.
Badonnǝ dɩ maa jɩgɩ tɩɩra
ba siseŋ-nɔɔna ŋwaanɩ.
Dɩbam nan jɩgɩ tɩɩra dɩ́ Tu
Baŋa-Wɛ yɩrɩ dɩm ŋwaanɩ mʋ.a
8 Bantʋ maa cɔɔlɩ ba tʋ tɩga nɩ.
Dɩbam nan wʋ́ zaŋɩ wɛɛnɩ
dɩ́ taa zɩgɩ mʋ cɛpɩ.
9 Baŋa-Wɛ, nan pa dɩ́ pɛ wʋm
wanɩ o dʋna bam o di.
Dɩ́ na loori zǝnǝ n tee nɩ,
sɩ n ləri dɩ́ wɛ-loro kʋm!