Baŋa-Wɛ na zǝni pɛ wʋm te tɩn
Davidi dɛɛn panɩ ləŋə kantʋ.
21
Dɩbam Tu Baŋa-Wɛ,pɛ wʋm wʋ mʋ poli,
nmʋ dam-fɔrɔ kʋm ŋwaanɩ.
O tiini o jɩgɩ ywəəni mʋ o di,
nmʋ na pɛ o wanɩ o dʋna bam
o di tɩn ŋwaanɩ.
2 Nmʋ pɛ‑o kʋlʋ o wʋbʋŋa na lagɩ tɩn.
Nmʋ ta wʋ van‑o kʋlʋ maama
o na loori n tee nɩ tɩn.
3 Nmʋ jeer-o dɩ wo-laarʋ,
yɩ n yɔɔrɩ n kɩ o yu-yoŋo.
N ma n kwe səbu-sɩŋa paarɩ yupugə n pu o yuu nɩ.
4 O loori nmʋ tee nɩ
sɩ n ta n nii o ŋwɩa kam baŋa nɩ.
Nmʋ ma n sɩɩnɩ n pa
sɩ o na mʋmwɛ-dɛɛrɩ,
sɩ o taa ŋwɩ taan wuu.
5 O tiini o na zulə zanzan,
nmʋ na zǝn-o tɩn ŋwaanɩ.
Nmʋ ta daarɩ n pa o na nɩnwaŋa
dɩ paarɩ lanyɩranɩ.
6 Cɩga tɩn, nmʋ yǝni n kɩ
o yu-yoŋo mʋ maŋa maama.
Nmʋ ta pɛ o wʋ poli zanzan,
dɩ n na wʋ o tee nɩ tɩn ŋwaanɩ.
7 Bɛŋwaanɩ, pɛ wʋm salɩ
Baŋa-Wɛ yɩra nɩ mʋ.a
O daa bá fɔgɩ o tʋ,
Yuutu Baŋa-Wɛ wʋm na jɩgɩ
o sono maŋa maama tɩn ŋwaanɩ.
8 Nmʋ lagɩ n kwe n jɩŋa mʋ
n ma n ja n dʋna bam maama.
N jazɩm dɩm wʋ́ zi-ba dɩ cɔgɩ.
9 Nmʋ na nuŋi yɩ n zaŋɩ ba baŋa nɩ,
n lagɩ n di-ba mʋ
dɩdaanɩ min-vʋgʋ.
Kʋ yɩ Baŋa-Wɛ mʋ wʋ́ di-ba
DƖ ban-lʋm dɩm ŋwaanɩ.
DƖ lagɩ DƖ pa DƖ mim mʋ di-ba kulə.
10 Nmʋ wʋ́ pa n dʋna bam biə
je mʋ lʋgʋ kʋm baŋa nɩ.
Ba daa bá na dwi sɩ dɩ daarɩ.
11 Ba bá wanɩ ba vu yigə,
dɩ ba na maŋɩ ba jeeli tɩtʋŋ-lwaannʋ
sɩ ba kɩ ba ma cɔgɩ nmʋ yigə
te maama dɩ.
12 Nmʋ nan wʋ́ saŋɩ n taŋa
sɩ n ta-ba,
pa ba pipiri ba duri ba kɛ.
13 Dɩ́ Tu Baŋa-Wɛ, zaŋɩ wɛɛnɩ
sɩ n yɔɔrɩ n brɩ n dam-fɔrɔ kʋm!
Dɩ́ wʋ́ leeni mʋ dɩ́ səni-m
dɩ n na tʋŋɩ tɩtʋŋ-kamunə yalʋ tɩn.