Yaara wʋnɩ wɛ-loro
Davidi dɛɛn panɩ ləŋə kantʋ.
22
A Wɛ, a Wɛ,bɛɛ mʋ kɩ yɩ n yagɩ a yɩra?a
Nmʋ yɩ yigə yigə amʋ tee nɩ.
Bɛɛ mʋ yɩ n wʋ tu sɩ n zəni-nɩ
a cam wʋnɩ,
dɩ a na tiini a loori‑m tɩte tɩn?
2 A Tu Wɛ, dɛ maama a yǝni
a keeri a lagɩ zənə yɩ n cɩm.
Tɩtɩɩ nɩ dɩ a yǝni a loori‑m
yɩ siun tǝrǝ.b
3 Dɩ kʋntʋ maama dɩ,
n ta yɩ wʋ-poŋo tu mʋ.
N ma n je n paarɩ jǝŋǝ je nɩ,
yɩ n nɔɔna Yisɩrayɛlɩ tiinə
dɩ maa pa‑m tiə.
4 Dɩbam nabaara bam dɛɛn kɩ
ba wʋ-dɩdʋa dɩ nmʋ mʋ.
N ma n joŋi-ba n yagɩ.
5 Cam na jegɩ-ba tɩn
mʋ ba keeri ba loori‑m.
Nmʋ ma n pa ba lu dɩ wʋnɩ.
Ba na kɩ ba wʋ-dɩdʋa dɩ nmʋ tɩn,
nmʋ wʋ yagɩ-ba laŋa tɩtarɩ nɩ.
6 Nɔɔna maama na yaalɩ-nɩ
yɩ ba gooni-nɩ te tɩn
nyɩ dɩ a yɩ kanzwɛ mʋ,
sɩ a daɩ nabiinu.
7 Nɔɔna balʋ maama yi na nɛ amʋ tɩn mwanɩ mʋ.
Ba maa dʋlɩ ba yum ba twɩ-nɩ.
8 Ba ta ba wɩ:
«Pa n tɩɩna taa wʋ Baŋa-Wɛ wʋnɩ
sɩ DƖ lɩ‑m cam wʋnɩ.
Nmʋ kənə na su Baŋa-Wɛ yi,
sɩ DƖ joŋi‑m DƖ yagɩ!»c
9 Nmʋ nan mʋ jaanɩ-nɩ n nuŋi
a nu pugə nɩ dɩ yazurə.
Amʋ ta na yɩ bu-sɩsɩŋa
yɩ a ŋɔgɩ a nu yɩlɩ tɩn mʋ
nmʋ nii amʋ baŋa nɩ.
10 Kʋ zɩgɩ a lʋra maŋa nɩ mʋ
a tɩɩna maŋɩ ya wʋ nmʋ wʋnɩ.
Nmʋ ta ma n yɩ amʋ Tu Wɛ.
11 Canɛɛrɩ tiini dɩ bwələ sɩ dɩ ja-nɩ.
Yɩ ve yigə yigə n daarɩ-nɩ,
sɩ nɔɔn-nɔɔnʋ tǝrǝ
o na wʋ́ wǝli-nɩ.
12 Amʋ dʋna bam daga
yɩ ba gilimi-nɩ nɩ nabɛ mʋ te.
Ba nyɩ dɩ nabɛ kamunnu
na nuŋi Basan laŋa nɩ
yɩ sɩ beeri najara tɩn mʋ.
13 Amʋ dʋna bam kəŋi ba niə mʋ
ba bɩɩnɩ a baŋa,
nɩnɛɛnɩ nywəənu na lagɩ
tɩ ja tɩ nwana tɩ tʋrɩ tɩ di,
yɩ tɩ tiini tɩ kaasɩ tɩte tɩn.
14 A ŋwɩa kam logi ka yagɩ mʋ
nɩ ba na logi na
ba yagɩ tɩga nɩ te tɩn.
Amʋ kwi sɩm maama ywəri mʋ.
A bɩcarɩ dɩm dɩ maa nyɩ
dɩ nugə kalʋ na nyɩɩnɩ tɩn.
15 A ni dɩm kʋgɩ mʋ nɩ kacuə te.
A dindǝlimi dɩ maa məəli
dɩ maŋɩ a ni dɩm wʋnɩ.
Wɛ, nmʋ yagɩ-nɩ sɩ a tʋ tɩga nɩ mʋ
sɩ a daarɩ a tɩ.
16 A dʋna bam gilimi amʋ
nɩ kakuri kɔgɔ te tɩn mʋ.
Ba ma ja a jɩa dɩdaanɩ a nɛ maama sɩ ba vuuri-sɩ.
17 Amʋ yɩra yam bugi
pa a kwi sɩm naɩ jaja,
yɩ a ga sɩ maama a vu a ti.
A dʋna bam maa yɔɔrɩ ba nii-nɩ
yɩ ba mwana.
18 Ba ma kwe amʋ gwaarʋ tɩm
sɩ ba pɔɔrɩ-tɩ ba pa daanɩ,
yɩ ba daarɩ ba ta jɔrɔ
amʋ gar-bu wʋm ŋwaanɩ.
19 Amʋ Tu Baŋa-Wɛ,
yɩ ta n yɩ yigə yigə dɩ amʋ.
Amʋ zənnu, ba lɩla n wǝli-nɩ!
20 Cʋ-nɩ sɩ a dʋna bam sʋ-lwaanʋ
yɩ cɔge-nɩ.
Joŋi a ŋwɩa kakuri sɩntʋ niə nɩ
n yagɩ.
21 Cʋ-nɩ sɩ nywəənu yɩ ja-nɩ.
Nan cəŋi nabɛ sɩntʋ
sɩ sɩ yɩ cu-nɩ dɩ sɩ nyɩa.
Nmʋ laan cəgi a wɛ-loro kʋm!
22 Amʋ wʋ́ ta n taanɩ
a nu-biə bam yigə nɩ
pa n yɩrɩ zaŋɩ.
A maa wʋ́ zɩgɩ ba nɔn-kɔgɔ kʋm tɩtarɩ nɩ
a tee n yɩrɩ dɩm.
23 Abam balʋ na kwarɩ Baŋa-Wɛ tɩn,
laan tee‑DƖ na!
Sɩ abam, Zakɔbɩ dwi dɩm maama,
zuli-na DƖ yɩrɩ dɩm!
Yisɩrayɛlɩ tiinə maama,
kuni-na doonə o yigə nɩ!
24 Bɛŋwaanɩ Baŋa-Wɛ ba culi nabwənə,
DƖ nan ba gooni-ba.
DƖ wʋ pipiri DƖ kwaga DƖ ya amʋ.
Amʋ na kaasɩ a loori-DƖ,
DƖ yigə wʋra dɩ amʋ mʋ.
25 Amʋ na zɩgɩ nmʋ nɔn-kɔgɔ kʋm
tɩtarɩ nɩ,
a wʋ́ tee‑m n kənə maama ŋwaanɩ.
Amʋ wʋ́ sɩɩnɩ a kɩ kʋlʋ a na goni ni nmʋ yigə nɩ sɩ a kɩ tɩn,
sɩ balʋ maama na kwarɩ nmʋ tɩn taa naɩ.
26 Nabwənə wʋ́ di ba su.
Balʋ na tu Baŋa-Wɛ te tɩn
wʋ́ tee‑DƖ taa.
Yazurə taa wʋ ba tee nɩ
sɩ kʋ taa ve wuu!
27 Lʋgʋ baŋa je maama nɩ
nɔɔna wʋ́ guli Baŋa-Wɛ gulə
yɩ ba pipiri ba ba DƖ te.
Nabiinǝ dwi maama wʋ́ ba
ba cɔɔlɩ DƖ yigə nɩ yɩ ba zuli‑DƖ.
28 Baŋa-Wɛ mʋ yɩ Pɛ
lʋgʋ kʋm maama wʋnɩ.
DƖ di paarɩ mʋ tɩɩnɩ dɩm maama baŋa nɩ.
29 Lʋgʋ baŋa nadunə maama
wʋ́ ba ba cɔɔlɩ DƖ yigə nɩ
ba zuli‑DƖ.
Balʋ ŋwɩa na lagɩ ka je tɩn maama
wʋ́ ba ba tiiri DƖ yigə nɩ.
30 Dɩbam dwi dɩlʋ ta na wʋ kwaga nɩ tɩn wʋ́ zuli‑DƖ.
Ba jwa wʋ́ ni dɩ́ Yuutu Wɛ ŋwa.
31 Nɔɔna balʋ ba ta na wʋ lʋgɩ tɩn
wʋ́ ba ba lwarɩ Wɛ cɩga kam
dɩ DƖ na joŋi DƖ nɔɔna DƖ yagɩ te tɩn.