Sooli na gɛ o ŋwɩa te tɩn
10
Filisi tiinə bam dɛɛn zaŋɩ najara dɩdaanɩ Yisɩrayɛlɩ tiinə bam. Yisɩrayɛlɩ jar-kərə bam ma jagɩ saɩ yɩ Filisi tiinə bam zəli-ba. Ba ma gʋ Yisɩrayɛlɩ tiinə bam zanzan Giliboa piu kʋm yuu nɩ. 2 Sooli dɩ o biə bam ma duri, yɩ Filisi tiinə bam pɛ ba kwaga ba pu. Ba ma gʋ Sooli biə Zonatan, dɩ Abinadabɩ, dɩ Malikisua. 3 Jara yam ma tiini ya pɩɩnɩ Sooli zanzan. O dʋna bam ma na‑o yɩ ba ta ba cɩna ba tɔ‑o pa kʋ kɩ-o zʋnnɩ. 4 Sooli ma ta dɩ nɔn-dʋŋʋ wʋlʋ na ze o jara zɩla yam tɩn o wɩ: «Lɩ n sʋ-lɔŋɔ kʋm n ma n zɔ-nɩ n gʋ. Amʋ ba lagɩ sɩ Filisi nɔn-yɔɔrʋ tɩntʋ yi amʋ yɩra ba zɔ-nɩ sɩ ba mwanɩ-nɩ ba kɩ-nɩ cavɩɩra.»Nɔn-dʋŋʋ kʋm maa wʋ sɛ sɩ o gʋ-o, fʋʋnɩ na tiini dɩ jɩg-o tɩn ŋwaanɩ. Kʋntʋ baŋa nɩ, Sooli ma vaŋɩ o tɩtɩ sʋ-lɔŋɔ kʋm o lɩ. O ma kwe-kʋ o mʋʋrɩ o pugə nɩ, yɩ o daarɩ o tʋ kʋ baŋa nɩ o tɩ. 5 Nɔn-dʋŋʋ kʋm na maanɩ nɩ Sooli tɩgɩ tɩn, o dɩ ma lɩ o sʋ-lɔŋɔ kʋm yɩ o tʋ kʋ baŋa nɩ o tɩ. 6 Kʋ dɛɛn kɩ kʋntʋ mʋ yɩ Sooli dɩ o biə batɔ bam, dɩ o dwi tiinə bam maama tɔgɩ daanɩ ba tɩ.
7 Yisɩrayɛlɩ tiinə balʋ dɛɛn na zʋʋrɩ Zizreyɛlɩ bolo kʋm nɩ tɩn ma lwarɩ nɩ Sooli dɩ o biə bam tɩgɩ mʋ, yɩ Yisɩrayɛlɩ jar-kərə bam maama duri ba jagɩ. Ba na ni kʋntʋ tɩn mʋ ba duri ba lagɩ je ba daarɩ ba tɩɩnɩ dɩm. Filisi tiinə bam ma vu ba zʋʋrɩ dɩ wʋnɩ. 8 Tɩga na pʋʋrɩ tɩn, Filisi tiinə bam ma joori najara kaporo kʋm nɩ sɩ ba za ba lɩ jɩjɩgɩrʋ twa bam yɩra nɩ. Ba ma na nɩ Sooli dɩ o biə bam tɩgɩ mʋ ba tigi Giliboa piu kʋm yuu nɩ. 9 Ba na nɛ tɩn, ba ma goni Sooli yuu ba lɩ, yɩ ba lɔɔrɩ o jara zɩla yam na wʋ o yɩra nɩ tɩn. Ba laan ma tʋŋɩ kwǝrǝ sɩ ka yi Filisi tiinə tɩɩnɩ dɩm maama nɩ: ba di Sooli. Ba ma tɔɔlɩ sɩ ba dwi tiinə maama ni-taanɩ dɩm kʋntʋ, yɩ ba daarɩ ba jɩgɩ-dɩ ba bʋrɩ ba jwǝnǝ yigə nɩ. 10 Kʋ na yɩ Sooli jara zɩla yam, ba kwe-ya ba ja zʋ ba tiŋi ba jwǝnǝ digə kam nɩ mʋ. Ba ma daarɩ ba kwe o yuu kʋm ba vu ba palɩ ba jwəm Dagɔn digə kam nɩ.
11 Nɔɔna balʋ maama dɛɛn na zʋʋrɩ Yabɛsɩ Galadɩ nɩ tɩn ma ni Filisi tiinə bam na kɩ Sooli te maama tɩn. 12 Balʋ na tiini ba yɩ pamaŋ-bɩbɛ ba wʋnɩ tɩn ma zaŋɩ ba vu ba parɩ Sooli dɩ o biə bam yɩra yam. Ba ma ja-ya ba joori Yabɛsɩ, yɩ ba daarɩ ba kwe ba kwi sɩm ba kɩ tiu kamunua kʋdoŋ kuri nɩ, Yabɛsɩ tɩʋ wʋnɩ. Ba ta ma di ba lwi yɩ ba vɔ ba niə da yarpɛ.
13 Sooli dɛɛn tɩga o na nuŋi Baŋa-Wɛ kwaga nɩ tɩn ŋwaanɩ mʋ. O wʋ sɛ sɩ o tʋŋɩ o tɔgɩ Baŋa-Wɛ niə yam. O dɛɛn ve kaanɩ wʋlʋ na waɩ o bwe cirǝ tɩn sɩ o wanɩ o nii o yigə.b 14 O nan wʋ sɛ sɩ o bwe Baŋa-Wɛ sɩ DƖ brɩ-o cwǝŋǝ. Kʋntʋ ŋwaanɩ Baŋa-Wɛ pɛ Sooli tɩ. DƖ ma daarɩ DƖ joŋi Yisɩrayɛlɩ tɩʋ paarɩ dɩm o jɩŋa nɩ DƖ kwe DƖ pa Zese bu Davidi.