Sooli na gɛ o ŋwɩa te tɩn
1 Wǝǝnu Kɩbarɩ tɔnɔ 10:1-14
31
Kʋntʋ maama na jɩgɩ kʋ kɩ tɩn, dɩdaanɩ Filisi tiinə bam zaŋɩ najara mʋ dɩdaanɩ Yisɩrayɛlɩ tiinə bam. Yisɩrayɛlɩ jar-kərə bam ma jagɩ saɩ yɩ Filisi tiinə bam zəli-ba. Ba ma gʋ Yisɩrayɛlɩ tiinə bam zanzan Giliboa piu kʋm yuu nɩ. 2 Sooli dɩ o biə bam ma duri, yɩ Filisi tiinə bam pɛ ba kwaga ba pu. Ba ma gʋ Sooli biə Zonatan, dɩ Abinadabɩ, dɩ Malikisua. 3 Najara yam ma tiini ya pɩɩnɩ Sooli zanzan. O dʋna bam ma na‑o yɩ ba ta ba cɩna ba tɔ‑o pa kʋ tiini kʋ kɩ-o zʋnnɩ.4 Sooli ma ta dɩ nɔn-dʋŋʋ wʋlʋ na ze o najara zɩla yam tɩn o wɩ: «Lɩ n sʋ-lɔŋɔ kʋm n ma n zɔ-nɩ n gʋ. Amʋ ba lagɩ sɩ Filisi nɔn-yɔɔrʋ tɩntʋ yi amʋ yɩra ba dɩ zɔ-nɩ sɩ ba mwanɩ-nɩ ba kɩ cavɩɩra» Nɔn-dʋŋʋ kʋm maa wʋ sɛ sɩ o gʋ-o, fʋʋnɩ na tiini dɩ jɩg-o tɩn ŋwaanɩ. Kʋntʋ baŋa nɩ tɩn, Sooli ma vaŋɩ o tɩtɩ sʋ-lɔŋɔ o lɩ. O ma kwe-kʋ o mʋʋrɩ o pugə nɩ, yɩ o daarɩ o tʋ kʋ baŋa nɩ o tɩ. 5 Nɔn-dʋŋʋ kʋm na maanɩ nɩ Sooli tɩgɩ tɩn, o dɩ ma lɩ o sʋ-lɔŋɔ kʋm o tʋ kʋ baŋa nɩ yɩ o dɩ tɩ o tigi o tu wʋm tikəri nɩ. 6 Kʋ dɛɛn kɩ kʋntʋ mʋ yɩ Sooli dɩ o biə batɔ bam maama tɔgɩ daanɩ ba tɩ, kʋ wǝli dɩ nɔn-dʋŋʋ wʋlʋ na ze o najara zɩla yam tɩn, dɩ o kwaga nɔɔna bam maama. Ba maama dɛɛn tɩga dɛ dɩm kʋntʋ nɩ mʋ.a
7 Yisɩrayɛlɩ tiinə balʋ dɛɛn na zʋʋrɩ Zizreyɛlɩ bolo kʋm seeni tɩn, dɩ balʋ na wʋ Zʋrdɛn bugə kam wa-puli seeni tɩn ma lwarɩ nɩ Sooli dɩ o biə bam tɩgɩ mʋ, yɩ Yisɩrayɛlɩ jar-kərə bam maama duri ba jagɩ. Ba na ni kʋntʋ tɩn mʋ ba duri ba lagɩ je ba daarɩ ba tɩɩnɩ dɩm. Filisi tiinə bam ma vu ba zʋʋrɩ dɩ wʋnɩ.
8 Tɩga na pʋʋrɩ tɩn, Filisi tiinə bam ma joori najara kaporo kʋm nɩ sɩ ba za ba lɩ jɩjɩgɩrʋ twa bam yɩra nɩ. Ba ma na nɩ Sooli dɩ o biə batɔ bam tɩgɩ mʋ ba tigi Giliboa piu kʋm yuu nɩ. 9 Ba na nɛ tɩn, ba ma goni Sooli yuu ba lɩ. Ba ma daarɩ ba lɩ o najara zɩla yam na wʋ o yɩra nɩ tɩn. Ba laan ma tʋŋɩ kwǝrǝ sɩ ka yi Filisi tiinə tɩɩnɩ dɩm maama nɩ ba di Sooli. Ba ma tɔɔlɩ taanɩ dɩm ba jwǝnǝ di sɩm wʋnɩ, dɩ ba dwi tiinə bam na wʋ mɛ tɩn. 10 Kʋ na yɩ Sooli najara zɩla yam, ba kwe-ya ba ja zʋ ba tiŋi ba jwəm Asetarɩ digə kam nɩ mʋ. Ba ma daarɩ ba kwe o yɩra yam ba vu ba palɩ Bɛtɩ-San tɩʋ kəbrə kam yɩra nɩ.
11 Nɔɔna balʋ dɛɛn na zʋʋrɩ Yabɛsɩ Galadɩ nɩ tɩn ma ni Filisi tiinə bam na kɩ Sooli te maama tɩn. 12 Balʋ na tiini ba yɩ pamaŋ-bɩbɛ ba wʋnɩ tɩn ma zaŋɩ tɩtɩɩ nɩ ba vu ba yi Bɛtɩ-San sɩ tɩga laan pʋʋrɩ. Ba ma parɩ Sooli dɩ o biə bam yɩra yam tɩʋ kʋm kəbrə yɩra nɩ. Ba laan ma ja-ya ba joori Yabɛsɩ, yɩ ba daarɩ ba zwɛ-ya. 13 Kʋ kwaga nɩ mʋ ba lagɩ ba kwi sɩm ba kɩ daanɩ, yɩ ba kwe-sɩ ba kɩ sana wʋdoŋ kuri nɩ, Yabɛsɩ tɩʋ wʋnɩ. Ba ta ma di ba lwi yɩ ba vɔ ba niə da yarpɛ.b