Davidi cɔgɩ Amalɛkɩ tiinə bam
30
Davidi dɩ o nɔɔna bam na zɩgɩ najara kaporo nɩ tɩn, da yatɔ dɛ nɩ mʋ ba ve ba yi Zikalagɩ. Ba ma maanɩ wɩ Amalɛkɩ tiinə bam mʋ tu ba di Zuda jagwiə seeni kagʋa kam maama. Ba ya tu ba ja najara dɩdaanɩ Zikalagɩ tɩʋ kʋm, yɩ ba daarɩ ba zwɛ-kʋ. 2 Kʋ na yɩ tɩʋ kʋm kaana bam dɩ biə bam maama, Amalɛkɩ tiinə bam wʋ gʋ-ba. Ba pɛ-ba mʋ ba ja viiri, kʋ wǝli dɩdaanɩ balʋ maama na zʋʋrɩ tɩʋ kʋm wʋnɩ tɩn.3 Davidi dɩ o nɔɔna bam na joori tɩn, ba ma na nɩ ba tɩʋ kʋm maama zwɛ Kʋ daarɩ di-dwəənu mʋ kʋ zɩgɩ. Ba ta ma na nɩ dʋna mʋ tu ba pɛ ba kaana bam dɩ ba biə, bəkəri sɩm dɩ bɩsankam sɩm, ba ja ba kɛ. 4 Davidi dɩ o kwaga kɔgɔ kʋm ma tiini ba kaasɩ ŋɔɔ! Ba ma keeri taan yɩ dam daa tǝri ba tee nɩ sɩ ba keeri. 5 Ba dʋna bam nan ya jaanɩ Davidi kaana bale bam dɩ mʋ ba wǝli da ba ja ba kɛ. Bantʋ yɩ Zizreyɛlɩ tiinə bukɔ Ahinoam, dɩdaanɩ Na-balɩ kadəm Abigayɛlɩ mʋ. 6 Davidi wʋbʋŋa maama ma je. Bɛŋwaanɩ, nɔɔna bam maama wʋʋ dɛɛn cɔgɩ mʋ dɩ ba na gɛ ba biə bam tɩn. Ba ma kɩ bana sɩ ba dʋlɩ Davidi dɩ kandwa ba gʋ. Davidi ma salɩ Baŋa-Wɛ yɩra nɩ pa o na baarɩ.a
7 Davidi laan ma ta dɩdaanɩ Wɛ kaanɩm tu Abɩatarɩ o wɩ: «Kwe kaanɩm gwar-wʋgʋ kʋm n ja n ba, sɩ dɩ́ ma dɩ́ bwe Wɛ dɩ́ nii dɩ́ wʋ́ kɩ tɩta mʋ.» Abɩatarɩ ma ja gwar-wʋgʋ kʋm o ba o pa‑o. 8 Davidi ma bwe Baŋa-Wɛ o wɩ: «A zaŋɩ a zəli dɩ́ dʋna bantʋ na? A na pɛ ba kwaga a pu, a wʋ́ yi-ba a ja na?» Wɛ ma ləri DƖ wɩ: «Ɛɛn, ve-na á zəli-ba, sɩ á wʋ́ yi-ba. Abam nan ta wʋ́ joŋi á nɔɔna bam á yagɩ.»b
9 Davidi ma ja o nɔɔna biə-yardʋ yam sɩ ba vu ba ja ba dʋna bam. Ba ma vu ba yi Besorɩ bugə kam, yɩ o nɔɔna bam badonnǝ maŋɩ dáanɩ. 10 Nɔɔna biə-yale mʋ warɩ sɩ ba bɛ ba daa vu yigə, ba na tiini ba bwəni tɩn ŋwaanɩ. Kʋ daarɩ Davidi dɩdaanɩ nɔɔna biə-yana yam na daarɩ tɩn ma bɛ bugə kam ba maa kɛa.
11 Ba na maa ve tɩn, Davidi nɔɔna bam badonnǝ ma vu ba na Ezipi tu wʋdoŋ na beeri gaa kʋm wʋnɩ. Ba ma ja-o ba vu Davidi te, yɩ ba daarɩ ba pa‑o wʋdiu sɩ o di dɩdaanɩ na sɩ o nyɔ. 12 Ba maa kwe kapɩra maasɩ cicoro, dɩ kacɩn-kʋrrʋ zwarʋ tɩle ba pa-o, yɩ o di. O na di o ti tɩn mʋ o dam joori, bɛŋwaanɩ, da yatɔ maama mʋ o wʋ di wʋdiu yɩ o wʋ nyɔgɩ na, wɩa dɩdaanɩ tɩtɩɩ maama.
13 Davidi ma bwe‑o o wɩ: «Nmʋ yɩ wɔɔ nɔɔnʋ mʋ? N nan nuŋi yən mʋ?» Nɔn-dʋŋʋ kʋm ma lǝr-o o wɩ: «Amʋ nuŋi Ezipi mʋ, yɩ a laan yɩ Amalɛkɩ tu gambaa. Da yatɔ na kɛ tɩn, mʋ a tu wʋm dʋlɩ-nɩ o yagɩ, a na ba jɩgɩ yazurə tɩn ŋwaanɩ. 14 Dɩ́ ya ve dɩ́ ja najara dɩ tɩɩnɩ dɩlʋ na wʋ kagʋa kam seeni yɩ Kereti tiinə bam zʋʋrɩ da tɩn mʋ, dɩ Zuda laŋa kam jagwiə seeni, yɩ dɩ́ ta yi kagʋa kalʋ Kalɛbɩ dwi tiinə na wʋra tɩn. Dɩ́ ma zwɛ Zikalagɩ tɩʋ kʋm dɩ́ wǝli da.» 15 Davidi ma ta dɩd-o o wɩ: «Nmʋ wʋ́ wanɩ n ja-nɩ n yi mɛ vɩnvɩrna bantʋ na wʋra tɩn na?» O ma ləri o wɩ: «Ɛɛn, a wʋ́ sɛ a ja‑m sɩ dɩ́ vu ba na wʋ mɛ tɩn. Nan du dɩ Wɛ yɩrɩ nɩ: n bá gʋ-nɩ, n nan bá joori n kwe-nɩ n kɩ a tu wʋm jɩŋa nɩ.»
16 Ezipi tu wʋm ma ja-ba o ja o vu o yi Amalɛkɩ tiinə bam na wʋ mɛ tɩn. Ba dɛɛn laan jagɩ je sɩm maama nɩ mʋ. Ba maa di ba wʋbʋŋa ba daarɩ ba nyɔ sana yɩ ba kwɛɛrɩ yɔɔ. Bɛŋwaanɩ, wǝǝnu tɩlʋ ba na vrɩ Filisi tiinə bam dɩ Zuda tiinə bam tee nɩ tɩn tiini tɩ gaalɩ. 17 Tɩga na lagɩ ka yi tɩn, Davidi ma zaŋɩ ba baŋa nɩ. O ma lɛɛrɩ o jeeri-ba dɩ najara taa sɩ kʋ vu kʋ yi tɩga na pʋʋrɩ tɩn wa-zʋʋrɩ maŋa nɩ. Nɔɔn-nɔɔnʋ wʋ lugi, kʋ na daɩ nɔn-dʋnnʋ biə-yana yɩranɩ. Bantʋ dɛɛn kwe yogondə mʋ ba din yɩ ba duri ba viiri. 18 Davidi ma joori o joŋi nɔɔna balʋ maama Amalɛkɩ tiinə bam na jaanɩ ba vrɩ tɩn, dɩ ba jɩjɩgɩrʋ tɩm maama. O ma joŋi o kaana bale bam dɩ o wǝli da. 19 Kʋlʋkʋlʋ dɛɛn wʋ je. Nɔn-dʋnnʋ tɩm, dɩ nankwɩn sɩm, dɩ bəkəri dɩ bɩsankam sɩm maama, kʋ ta wǝli dɩ ba jɩjɩgɩrʋ tɩm maama, kʋlʋkʋlʋ wʋ daarɩ kʋ maŋɩ ba dʋna bam tee nɩ. Davidi dɛɛn joori o joŋi tɩ maama. 20 Davidi ma ja vara bam maama pa o nɔɔna bam kalɩ-ba ba kɩ ba kɔgɔ kʋm yigə nɩ. Ba maa veǝ yɩ ba wɩ: «Wǝǝnu tɩntʋ maama yɩ Davidi nyɩm mʋ najara yam ŋwaanɩ.»
21 Davidi ma joori o vu o yi nɔɔna biə bale balʋ ya na bwǝnǝ yɩ ba maŋɩ Besorɩ bugə kam ni nɩ tɩn te. Bantʋ ya ba jɩgɩ dam sɩ ba tɔgɩ ba vu ba ja najara yam. Ba ma nuŋi sɩ ba jeeri Davidi dɩ o kwaga kam. Davidi dɩ ma titwəni o yi-ba yɩ o daarɩ o warɩ-ba dɩdaanɩ wʋpolo. 22 Nɔn-balwaarʋ dɩ nɔn-wo-kʋrrʋ dɛɛn maa wʋ Davidi kwaga nɔɔna bam wʋnɩ. Ba ma ta ba wɩ: «Nɔɔna bantʋ wʋ wanɩ ba tɔgɩ dɩ dɩbam ba vu ba kɩ najara yam. Kʋntʋ ŋwaanɩ, dɩ́ bá sɛ sɩ dɩ́ pɔɔrɩ wǝǝnu tɩlʋ dɩ́ na vrɩ dɩ́ dʋna bam tee nɩ tɩn dɩ́ pa-ba. Dɩ́ wʋ́ pa nɔɔnʋ maama kwe o kaanɩ dɩ o biə bam yɩranɩ mʋ o ja o viiri!»
23 Davidi ma ta o wɩ: «Amʋ nɔɔna bam, yɩ kɩ-na wo-lʋŋʋ dɩdaanɩ woŋo kʋlʋ maama Baŋa-Wɛ na pɛ dɩbam tɩn. Dɩntʋ mʋ kwǝli dɩbam, yɩ DƖ daarɩ DƖ pa dɩ́ di dɩ́ dʋna balʋ ya na tu ba vrɩ dɩbam tɩn. 24 Abam taanɩ dɩm tǝrǝ. Nɔɔna bam maama wʋ́ cɛ kʋlʋ Wɛ na pɛ dɩbam tɩn, sɩ kʋ taa maɩ daanɩ. Balʋ na ve najara je tɩn, dɩ balʋ na maŋɩ kwaga nɩ ba nii zɩla yam baŋa nɩ tɩn maama wʋ́ joŋi kʋ maɩ daanɩ mʋ.» 25 Kʋ na zɩgɩ dɛ dɩm kʋntʋ nɩ tɩn sɩ kʋ ba kʋ yi zɩm, Davidi lɛɛrɩ o pa Yisɩrayɛlɩ tiinə bam tɔgɩ ni dɩm kʋntʋ mʋ.
26 Davidi ma ja kʋlʋ maama o na vrɩ Amalɛkɩ tiinə bam tee nɩ tɩn, o ja o joori Zikalagɩ. O ma pa ba lɩ wǝǝnu tɩm tɩdonnǝ ba ja ba vu ba pa Zuda nakwa bam na yɩ o yuudonnə tɩn, yɩ ba ta dɩ ba ba wɩ: «Nii-na, dɩ́ vrɩ wǝǝnu tɩntʋ Baŋa-Wɛ dʋna bam jɩŋa nɩ mʋ. Abam dɩ joŋi-na pɛɛrɩ á taá jɩga.» 27 O dɛɛn lɩ pɛɛra yam kʋntʋ doŋ mʋ o tʋŋɩ o pa Betɛlɩ tiinə bam, dɩ jagwiə kagʋa kam tɩʋ Ramɔtɩ tiinə bam, dɩ Yatira tiinə bam, 28 kʋ ta wǝli dɩ Aroyɛrɩ tiinə bam, dɩ Sifimɔtɩ tiinə bam, dɩdaanɩ Esɩtemoa tiinə bam, 29 dɩ Rakalɩ tiinə bam. O ta ma tʋŋɩ pɛɛra o pa balʋ na zʋʋrɩ Yerameliti tɩɩnɩ dɩm dɩ Kɛnɩ tɩɩnɩ dɩm wʋnɩ tɩn, 30 dɩdaanɩ Horama tiinə bam, dɩ Borasan tiinə bam, dɩ Atakɩ tiinə bam, 31 kʋ ta wǝli dɩ Ebrɔn tiinə bam. Davidi dɛɛn tʋŋɩ pɛɛra yam sɩ ya yi tɩɩnɩ dɩlʋ maama o dɩ o nɔɔna bam na kaagɩ da ba kɛa ba bərə kam wʋnɩ tɩn mʋ.