Filisi tiinə bam wʋ sɛ sɩ ba wǝli Davidi
29
Filisi tiinə bam dɛɛn ma la ba jar-kərə bam ba kɩ daanɩ, yɩ ba jeeri Afɛkɩ nɩ. Kʋ daarɩ Yisɩrayɛlɩ tiinə bam dɩ ma vu ba jeeri Zizreyɛlɩ buli-yi dɩm seeni. 2 Filisi tiinə jar-kərə bam dɛɛn maa pɔɔrɩ bi bi dɩdaanɩ mʋrʋ mʋrʋ. Ba pwa banu bam ma nuŋi ba yigə nɩ ba veǝ. Davidi dɩ o nɔɔna bam maa maŋɩ kwaga nɩ ba tɔgɩ dɩ Akisi ba dɩ nuŋi ba veǝ.3 Filisi najara dɩdɛɛra bam ma bwe ba wɩ: «Ebru tiinə bantʋ tɔgɩ dɩ dɩbam sɩ ba kɩ bɛɛ mʋ?» Abimelɛkɩ ma lǝri-ba o wɩ: «Davidi dɩ o nɔɔna bam mʋ kʋntʋ. O dɛɛn yɩ Yisɩrayɛlɩ tiinə pɛ Sooli babɩa mʋ. O nan nuŋi Sooli kwaga nɩ mʋ yɩ o daarɩ o ba o mɩ dɩ amʋ. Dɩ́ na tʋŋɩ daanɩ tɩn, kʋ dwe bɩnɩ. Dɛ dɩm o na tu amʋ tee nɩ tɩn sɩ kʋ yi zɩm, a ta wʋ nɛ o wo-lɔŋɔ dɩ fɩnfɩɩn dɩ.»
4 Filisi dɩdɛɛra bam banɩ ma zaŋɩ dɩdaanɩ Abimelɛkɩ yɩ ba wɩ: «Pa nɔɔnʋ wʋm joori o viiri! Pa o joori o vu tɩʋ kʋlʋ nmʋ na pɛ‑o sɩ o taa zʋʋrɩ da tɩn. Yɩ pa o tɔgɩ dɩbam sɩ dɩ́ zaŋɩ najara yam. Ta n ye nɩ oó wanɩ o lɔ dɩbam kwaga nɩ, yɩ o pipiri o gʋ dɩ́ jar-kərə badonnǝ. Kʋntʋ wʋ́ pa o dɩ Sooli joori ba kɩ daanɩ. 5 Yɩ swe nɩ kʋ yɩ Davidi wʋm kʋntʋ taanɩ mʋ Yisɩrayɛlɩ tiinə bam saɩ yɩ ba leeni ba tee-o ba wɩ:
‹Sooli gʋ o dʋna bam
mʋrʋ dɩ mʋrʋ.
Sɩ kʋ na yɩ Davidi,
wʋntʋ gʋ o dʋna bam
mʋrrʋ fugə dɩ fugə mʋ.› »
6 Akisi ma bəŋi Davidi yɩ o ta dɩd-o o wɩ: «Amʋ dugi dɩ ŋwɩa Tu Baŋa-Wɛ nɩ a sɩɩnɩ a jɩgɩ n cɩga mʋ. Kʋ zɩgɩ nmʋ na tu n mɩ dɩdaanɩ amʋ tɩn sɩ kʋ yi zɩm maama, amʋ wʋ nɛ n wo-lɔŋɔ. Kʋ ya na yɩ amʋ tee nɩ, a ya lagɩ sɩ n da dɩdaanɩ amʋ mʋ sɩ dɩ́ vu dɩ́ kɩ najara yam. Pwa babam bam nan wʋ pɛ‑m cɩga. 7 Kʋntʋ tɩn, joori n vu sɔŋɔ cɩmm. Yɩ zaŋɩ n kɩ kʋlʋ na wʋ́ daanɩ pwa bam tɩn.»
8 Davidi ma ləri Akisi o wɩ: «A kɩ bɛɛ mʋ a cɔgɩ? Nɩnɛɛnɩ kʋ na yɩ cɩga mʋ nɩ n wʋ nɛ amʋ wo-lɔŋɔ dɩ fɩnfɩɩn dɩ, bɛ nan mʋ wʋ́ cɩ sɩ a yɩ tɔgɩ a vu a kɩ najara a wǝli nmʋ wʋlʋ na yɩ a pɛ tɩn, sɩ dɩ́ di n dʋna bam?» 9 Akisi ma joori o ləri o wɩ: «Cɩga tɩn, n tɩtʋŋa yam su amʋ yi. Amʋ maa nii nmʋ nɩnɛɛnɩ a na nii Wɛ malɛka te tɩn mʋ. Dɩ kʋntʋ dɩ, Filisi pwa badonnǝ bam nan mʋ vɩn, yɩ ba tɛ ba wɩ: nmʋ bá tɔgɩ n vu n kɩ najara yantʋ. 10 Kʋntʋ tɩn, jwa zɩzɩŋa nɩ sɩ á goni tɩga á zaŋɩ, nmʋ dɩ nɔɔna balʋ maama na dɛ dɩ nmʋ ba ba amʋ te tɩn. Tɩga na pʋʋrɩ, pa á kɔgɔ kʋm zaŋɩ á joori á viiri.»
11 Tɩga na sɩɩnɩ ka pʋʋrɩ tɩn, Davidi dɩ o nɔɔna bam ma goni tɩga ba zaŋɩ ba kwe Filisi tɩʋ cwǝŋǝ ba maa joorə. Filisi tiinə bam dɩ ma kɛ ba vu Zizreyɛlɩ.