28
Kʋ na wʋra kʋ wʋra tɩn, mʋ Filisi tiinə bam dɛɛn lagɩ ba jar-kərə ba kɩ daanɩ sɩ ba zaŋɩ najara dɩdaanɩ Yisɩrayɛlɩ tiinə bam. Akisi ma ta dɩ Davidi o wɩ: «Kʋ maŋɩ sɩ n ta n ye nɩ: nmʋ dɩ n nɔɔna bam wʋ́ wǝli amʋ kɔgɔ kʋm wʋnɩ mʋ, sɩ dɩ́ vu dɩ́ kɩ najara yam.» 2 Davidi ma lǝr-o o wɩ: «Dáanɩ mʋ nmʋ wʋ́ wanɩ n lwarɩ a na wʋ́ tʋŋɩ te a pa‑m tɩn.» Akisi ma lǝr-o o wɩ: «Nmʋ na sɛ amʋ kʋntʋ tɩn, amʋ wʋ́ pa n ta n yɩrɩ-nɩ maŋa maama.»Sooli ve o vʋ ciciri vʋrʋ
3 Samowɛlɩ dɛɛn nan ya maŋɩ o tɩ, yɩ Yisɩrayɛlɩ tiinə bam maama di o luə. Ba ma daarɩ ba kwe‑o ba kɩ o tɩtɩ tɩʋ Rama nɩ. Sooli nan loori yigə mʋ o zəli ciciri vʋra dɩ sampwəri maama Yisɩrayɛlɩ tɩga kam nɩ.a
4 Filisi jar-kərə bam ma vu Sunem ba gilimi daanɩ. Sooli ma bəŋi Yisɩrayɛlɩ tiinə bam o kɩ daanɩ pa ba jeeri Giliboa nɩ. 5 Sooli na yɔɔrɩ o dʋlɩ o yi o na Filisi jar-kərə bam tɩn, mʋ fʋʋnɩ zʋ-o, yɩ o yɩra saɩ vagɩ vagɩ. 6 O ma kwaanɩ o bwe Baŋa-Wɛ sɩ o nii o na wʋ́ kɩ kʋlʋ tɩn. Baŋa-Wɛ nan wʋ sɛ DƖ lǝr-o. Kʋ na yɩ dɩndwɩa, naa Yurim dɩ Tumim kandwa yam, naa nijoŋnə, Baŋa-Wɛ wʋ tɔgɩ sɩ baŋa nɩ DƖ pa‑o lərə dɩ fɩnfɩɩn dɩ. 7 Sooli laan ma ta dɩ o nakwa bam o wɩ: «Ve-na á beeri kaanɩ wʋlʋ na waɩ o bwe cirǝ sɩ o lwarɩ kʋlʋ na wʋra tɩn á pa-nɩ. Kʋ maŋɩ sɩ a vu kʋ tu tee nɩ mʋ a nii a yigə.» O nakwa bam ma ta ba wɩ: «Kaanɩ wʋdoŋ mʋ wʋ Eyin-Dɔɔrɩ nɩ, o bəi cirə.»
8 Sooli laan ma zaŋɩ tɩtɩɩ nɩ o kwe gwaarʋ tɩlʋ na daɩ o nyɩm tɩn o zʋ. O na lǝni o tɩtɩ kʋntʋ tɩn, o ma tɔgɩ dɩdaanɩ o nɔɔna bale yɩ ba nuŋi sɩ ba vu kaanɩ wʋm te. Ba na yi da tɩn, Sooli ma ta dɩ kaanɩ wʋm o wɩ: «Kwe n vʋrʋ zɩla yam sɩ n bəŋi ciru wʋdoŋ n pa-nɩ. Pa ciru wʋlʋ a na wʋ́ bəŋi o yɩrɩ tɩn nuŋi o ba amʋ te.»b
9 Kaanɩ wʋm ma ləri o wɩ: «Nmʋ nan ye Sooli na kɩ kʋlʋ yɩ o zəli ciciri vʋra dɩ sampwəri maama pa ba nuŋi Yisɩrayɛlɩ tɩga nɩ tɩn. Bɛɛ mʋ yɩ n lagɩ n kwe cɩkʋ n ma n ja amʋ? Nmʋ laan ma n lagɩ sɩ ba gʋ amʋ dɩ!» 10 Sooli ma ta o du o wɩ: «Amʋ dugi dɩ Ŋwɩa Tu Baŋa-Wɛ yɩrɩ nɩ: n na tʋŋɩ a tɩtʋŋɩ dɩm n pa-nɩ, n bá na waarɩm kʋ ŋwaanɩ.» 11 Kaanɩ wʋm ma bwe‑o o wɩ: «Wɔɔ mʋ n lagɩ sɩ a bəŋi sɩ o nuŋi o ba?» Sooli ma ləri o wɩ: «Bəŋi Samowɛlɩ ciru n pa-nɩ.»
12 Kaanɩ wʋm na yɔɔrɩ o na Samowɛlɩ tɩn, mʋ o kaasɩ cɛpɩ! O ma pipiri o ta dɩ Sooli o wɩ: «Bɛɛ mʋ kɩ yɩ n ganɩ-nɩ kʋntʋ? Nmʋ mʋ yɩ Pɛ Sooli!» 13 Sooli ma lǝr-o o wɩ: «Yɩ ta n fʋna, za n ta kʋlʋ n na nɛ tɩn n brɩ-nɩ.» Kaanɩ wʋm ma ta o wɩ: «A nɛ ciru mʋ na nuŋi tɩga nɩ, yɩ o zaŋɩ o bɩɩnɩ.» 14 Pɛ wʋm ma bwe o wɩ: «O nyɩnyʋgʋ yɩ tɩta mʋ?» Kaanɩ wʋm ma ləri o wɩ: «O yɩ nankwɩan mʋ na bɩɩnɩ yɩ o zʋ gwar-dɩdɔrɔ.»
Sooli ma maanɩ nɩ kʋ sɩɩnɩ kʋ yɩ Samowɛlɩ mʋ. O ma vin o yibiyə tɩga nɩ sɩ o pa‑o zulə. 15 Samowɛlɩ ma bwe Sooli o wɩ: «Bɛɛ mʋ kɩ yɩ n daanɩ-nɩ kʋntʋ? N jaanɩ-nɩ n joori n ba yo seeni sɩ a kɩ bɛɛ mʋ?» Sooli ma ta o wɩ: «A wʋʋ mʋ diə, yɩ a yǝri a na wʋ́ kɩ kʋlʋ tɩn. Bɛŋwaanɩ, Filisi tiinə bam jeeri-nɩ mʋ dɩ najara. Baŋa-Wɛ nan lɔgɩ amʋ kwaga nɩ mʋ. DƖ daa ba tɔgɩ nijoŋnə baŋa nɩ, naa dɩndwɩa baŋa nɩ sɩ DƖ ləri-nɩ. Kʋntʋ ŋwaanɩ nan mʋ te a bǝŋi-m sɩ a lwarɩ a na wʋ́ kɩ te tɩn.»
16 Samowɛlɩ ma ta o wɩ: «Baŋa-Wɛ nan na lɔgɩ nmʋ kwaga nɩ pa DƖ ji n dʋnʋ tɩn, bɛɛ mʋ yɩ n daa n bǝŋi-nɩ sɩ n bwe n nii n na wʋ́ kɩ te? 17 Baŋa-Wɛ na kɩ kʋlʋ dɩ nmʋ tɩn yɩ kʋlʋ a na wuuri a ta a brɩ-m tɩn mʋ. DƖ joŋi paarɩ dɩm nmʋ jɩŋa nɩ mʋ, yɩ DƖ kwe-dɩ DƖ pa n doŋ. Davidi mʋ kʋntʋ! 18 Bɛŋwaanɩ, Baŋa-Wɛ dɛɛn pɛ‑m ni sɩ n cɔgɩ Amalɛkɩ tiinə bam dɩ ba wǝǝnu tɩm maama, DƖ banɩ na zaŋɩ dɩ ba tɩn ŋwaanɩ. Nmʋ nan wʋ sɛ n kɩ DƖ ni dɩm kʋntʋ dɩ cɩga.c Kʋntʋ nan mʋ pɛ Baŋa-Wɛ zɩm kɩ-m tɩntʋ. 19 Kʋ na wʋ́ kɩ te tɩn, Baŋa-Wɛ lagɩ DƖ kwe nmʋ dɩ Yisɩrayɛlɩ tiinə bam DƖ kɩ Filisi tiinə bam jɩŋa nɩ mʋ. Jwa dɛ dɩm nɩ, nmʋ dɩ n biə bam dɩ wʋ́ tɩ yɩ á ba curu yo seeni á wǝli amʋ wʋnɩ. Kʋ na yɩ Yisɩrayɛlɩ jar-kərə bam maama, Baŋa-Wɛ wʋ́ kɩ-ba Filisi tiinə bam jɩŋa nɩ mʋ.»
20 Sooli na ni taanɩ dɩm kʋntʋ maama tɩn, mʋ o tʋ tɩga nɩ o tigi da kʋntʋ yirr. Samowɛlɩ taanɩ dɩm ma tiini dɩ pa fʋʋnɩ zʋ-o. O yɩra maa bwəmmə, o na wʋ di wʋdiu dɛ dɩm kʋntʋ nɩ wɩa dɩ tɩtɩɩ maama tɩn ŋwaanɩ. 21 Kaanɩ wʋm ma fʋfɔ o yi Sooli yɩra, yɩ o maanɩ nɩ o bɩcarɩ tiini dɩ fwe. O ma ta dɩd-o o wɩ: «A loori-m, amʋ tu! Amʋ na sɛ nmʋ ni tɩn, a yɔɔrɩ a vɩn a ŋwɩa mʋ, yɩ a kɩ nmʋ na lagɩ te tɩn a pa‑m. 22 Kʋntʋ tɩn, a loori‑m mʋ sɩ n sɛ amʋ na wʋ́ ta kʋlʋ tɩn. Yagɩ sɩ a kɩ wʋdiu fɩɩn sɩ n di. Kʋntʋ wʋ́ pa n na dam sɩ n wanɩ n joori n viiri.»
23 Sooli ma vɩn yɩ o wɩ: «Amʋ bá di wʋdiu.» O nɔɔna bam ma tɔgɩ dɩ kaanɩ wʋm ba loori‑o. O laan ma sɛ. O ma kwaanɩ o zaŋɩ wɛɛnɩ, yɩ o daarɩ o jǝni gadogo baŋa nɩ. 24 Kaanɩ wʋm ya jɩgɩ na-paalɩ o sɔŋɔ nɩ o na jɩgɩ-dɩ o kɔnɩ tɩn. Sɩntʋ nɛ sɩm ni nɩ o ma ja-dɩ o gʋ. O ta ma kwe muni o ma fɔgɩ dɩpɛ dɩlʋ na ba jɩgɩ dabɩlɩ kʋ wʋnɩ tɩn. 25 O na ti wʋdiu kʋm yigə tɩn, o ma kwe-kʋ o pa Sooli dɩdaanɩ o nɔɔna bam. Ba ma di yɩ ba daarɩ ba goni tɩga ba zaŋɩ ba viiri.