Davidi ve o səgi Filisi tiinə tɩʋ nɩ
27
Dɛ dɩdwɩ mʋ Davidi dɛɛn jǝni o bʋŋɩ o tɩtɩ nɩ o wɩ: «Kʋ laan bwələ sɩ Sooli ja-nɩ o gʋ. A na duri a vu a səgi Filisi tiinə bam tɩtarɩ nɩ, kʋʋ́ taa gara. A daa na tǝrǝ Yisɩrayɛlɩ tiinə tɩʋ kʋm maama nɩ, Sooli wʋ́ beeri-nɩ o ga. Kʋntʋ maa wʋ́ pa a lu o jɩŋa nɩ.»2 Kʋ ma pa Davidi dɩdaanɩ o nɔɔna biə-yardʋ yam duri ba vu Mawɔkɩ bu Akisi tee nɩ. Wʋntʋ dɛɛn yɩ Gatɩ tɩʋ pɛ mʋ.a 3 Davidi dɩ o nɔɔna bam ma vu ba maŋɩ Akisi tee nɩ ba zʋʋrɩ Gatɩ tɩʋ kʋm nɩ, nɔɔnʋ maama dɩ o digə tiinə. Davidi kaana bale bam dɛɛn maa tɔgɩ ba wʋ o tee nɩ: Ahinoam na nuŋi Zizreyɛlɩ tɩn, dɩdaanɩ Na-balɩ kadəm Abigayɛlɩ na nuŋi Karmɛlɩ tɩn. 4 Sooli ma ni nɩ Davidi duri o vu o wʋ Gatɩ nɩ. O ma yagɩ Davidi bərə kam.
5 Dɛ dɩdwɩ Davidi ma ta dɩ Akisi o wɩ: «Pɛ, nmʋ yi na sɩɩnɩ dɩ su dɩ amʋ tɩtʋŋa yam, sɩ n lɩ n tɩɩnɩ dɩm wʋnɩ tʋ-balaŋa dɩdʋa sɩ amʋ dɩ a nɔɔna bam taa zʋʋrɩ da. Kʋ daɩ sɩ amʋ dɩ taa tɔgɩ a zʋʋrɩ n tee nɩ pa-tɩʋ kʋntʋ wʋnɩ.» 6 Akisi ma sɛ yɩ o kwe Zikalagɩ dɩntʋ dɛ dɩm nɩ o pa Davidi. Kʋ na zɩgɩ kantʋ maŋa nɩ sɩ kʋ yi zɩm maama tɩn, Zikalagɩ lɛɛrɩ kʋ yɩ Zuda pwa bam mʋ te-kʋ. 7 Davidi dɛɛn ma zʋ Filisi tiinə bam tɩtarɩ nɩ bɩnɩ dɩdaanɩ canɩ sɩna.
8 Maŋa kam kʋntʋ nɩ, Davidi dɩ o nɔɔna bam ma yǝni ba zaŋɩ najara dɩ Gesuri tiinə, dɩ Girizi tiinə, kʋ wǝli dɩ Amalɛkɩ tiinə bam. Kʋ zɩgɩ faŋa faŋa tɩn, tɩɩnɩ dɩm kʋntʋ tiinə dɛɛn zʋʋrɩ je sɩm kʋntʋ nɩ sɩ kʋ vu kʋ yi Suuri seeni dɩ Ezipi seeni maama mʋ. 9 Davidi dɩ o nɔɔna bam na jeeri tɩʋ kʋlʋ maama, ba yǝni ba cɔgɩ kʋ maama mʋ. Ba ma gʋ kʋ nɔɔna bam, baara dɩ kaana maama, yɩ ba daarɩ ba vrɩ ba peeni sɩm, dɩ ba naanɩ dɩm, dɩ ba bɩnɛ, dɩdaanɩ ba yogondə yam, kʋ wǝli dɩ ba gwaarʋ maama. O laan ma yǝni o joori o vu Akisi te. 10 Akisi dɩ ma yǝni o bwe‑o o wɩ: «Nmʋ zɩm ve tɩʋ kɔɔ mʋ n cɔgɩ-kʋ yɩ n daarɩ n vrɩ ba wǝǝnu?» Davidi dɩ ma yǝni o ləri o wɩ: «Dɩ́ ve Zuda tɩʋ kʋdoŋ kagʋa kam wʋnɩ mʋ dɩ́ vrɩ nɔɔna bam,» naa o waɩ o tɛ nɩ: «Dɩ́ ve kagʋa kam seeni mɛ Yerameliti tiinə na wʋra tɩn mʋ dɩ́ vrɩ-ba,» naa o wɩ: «Dɩ́ ve kagʋa kam seeni mɛ Kɛnɩ tiinə na wʋra tɩn mʋ dɩ́ vrɩ-ba.» 11 Kʋntʋ ŋwaanɩ mʋ Davidi na jeeri tɩʋ kʋlʋ dɩ najara, oó kwaanɩ o gʋ kʋ nɔɔna bam maama, baara dɩ kaana. O ma yǝni o wɩ: «A na wʋ gʋ-ba, baá wanɩ ba vu Gatɩ ba ta ba brɩ Akisi amʋ na yǝni a kɩ kʋlʋ maama tɩn mʋ.»
Maŋa kalʋ maama Davidi na tu o wʋ Filisi tiinə tɩtarɩ nɩ tɩn, o dɛɛn yǝni o kɩ kʋntʋ mʋ. 12 Sɩ kʋ na yɩ Akisi, wʋntʋ dɛɛn ma kwe o cɩga maama o pa Davidi. O ma jeeli o wɩ: «Davidi na tiini o kɩ o cɔgɩ o tɩtɩ nɔɔna Yisɩrayɛlɩ tiinə bam te tɩn, o kikiə maama laan lwe ba mʋmwa nɩ mʋ. Lele kʋntʋ sɩ kʋ taa ve wuu, o laan wʋ́ taa tʋŋɩ o pa amʋ mʋ.»