Davidi daa ta yagɩ Sooli o pa o lu
26
Zifi tiinə badonnǝ dɛɛn ma zaŋɩ ba vu Gibea yɩ ba ta dɩ Sooli ba wɩ: «Davidi tu o səgi Hakila piu kʋm yuu nɩ, je sɩlʋ na jeeri Yesimɔn kagʋa kam nɩ tɩn mʋ.»2 Sooli na ni kʋntʋ tɩn, o ma la Yisɩrayɛlɩ tiinə jar-kərə mʋrrʋ tɩtɔ balʋ na ye najara laŋa lanyɩranɩ tɩn, yɩ ba vu Zifi kagʋa kam sɩ ba beeri Davidi je. 3 Ba na yi cwǝŋǝ kalʋ na wʋ Hakila piu kʋm təŋə nɩ tɩn ba ma zɩgɩ ba cwi ba vwə je sɩlʋ na jeeri Yesimɔn tɩn nɩ. Davidi ma maŋɩ kagʋa kam wʋnɩ. O ma ba o ni nɩ Sooli tu sɩ o beeri o je. 4 O ma tʋŋɩ nɔɔna sɩ ba ŋɔ ba nii Sooli na wʋ mɛ tɩn, yɩ ba lwarɩ nɩ o sɩɩnɩ o yi kagʋa kam seeni.
5 Davidi na lwarɩ tɩn, o laan ma zaŋɩ o vu o yi mɛ Sooli dɩ o nɔɔna bam na tigi tɩn. O ma maanɩ Sooli dɩ o jar-kərə yigə tu Abenɩra na tigi mɛ lanyɩranɩ tɩn. Abenɩra maa yɩ Nera bu. Sooli maa tigi o dɔa yɩ jar-kərə bam maama laan maa gilim‑o ba kɩ tɩtarɩ nɩ. 6 Hɛtɩ tu Ayimelɛkɩ dɩdaanɩ Zoabɩ nyaanɩ Abisayi mʋ zɩgɩ Davidi tee nɩ. Abisayi nu maa yɩ Zeruya. Davidi ma bwe-ba o wɩ: «Abam wɔɔ mʋ wʋ́ tɔgɩ dɩ amʋ, sɩ dɩ́ vu dɩ́ yi Sooli dɩ o nɔɔna bam na tigi mɛ tɩn?» Abisayi ma ləri o wɩ: «Amʋ wʋ́ tɔgɩ-m sɩ dɩ́ vu.»
7 Dɛ dɩm kʋntʋ tɩtɩɩ nɩ Davidi dɩdaanɩ Abisayi ma lɔɔrɩ ba vu Sooli dɩ o jar-kərə bam tigə je sɩm. Ba na yi da tɩn, dɩdaanɩ Sooli tigi o jar-kərə bam tɩtarɩ nɩ mʋ o dɔa. O cicwe ma mʋʋrɩ tɩga nɩ dɩ maŋɩ dɩ o yuu kʋm seeni. Abenɩra dɩdaanɩ jar-kərə bam maama maa gilim‑o ba kɩ tɩtarɩ nɩ, yɩ ba dɩ dɔa. 8 Abisayi ma ta dɩ Davidi o wɩ: «Nii Baŋa-Wɛ zɩm na kwe n dʋnʋ wʋm DƖ kɩ n jɩŋa nɩ te! Nmʋ na sɛ, amʋ wʋ́ vaŋɩ o cicwe dɩm mʋ a lɩ a joori a zɔ‑o a mʋʋrɩ a yagɩ tɩga nɩ. A maa wʋ́ zɔ‑o bɩdwɩ mʋ yɩ o tɩ, a bá zɔ bɩle.»
9 Davidi ma lǝr-o o wɩ: «Yɩ kɩ zʋnnɩ o yɩra nɩ! Nɔɔnʋ na magɩ pɛ wʋlʋ Baŋa-Wɛ na kuri tɩn, kʋ tu kəm-balɔrɔ wʋ́ taa wʋ o yuu nɩ. 10 Ŋwɩa Tu Baŋa-Wɛ yɩrɩ ŋwaanɩ, Dɩntʋ mʋ wʋ́ magɩ Sooli DƖ gʋ. Wɛ waɩ DƖ paɩ o tʋa o tɩtɩ tʋʋnɩ, naa o tɩ jara-kǝm baŋa nɩ. 11 Baŋa-Wɛ nan wʋ́ cɩ amʋ sɩ a ma a jɩŋa a gʋ wʋlʋ Baŋa-Wɛ yu-yoŋo nugə na wʋ o yuu nɩ tɩn. Nan pa dɩ́ kwe o cicwe dɩm, dɩ na mʋʋrɩ o yuu seeni tɩn, dɩdaanɩ o na-kunkolo kʋm dɩ́ ja dɩ́ viiri.» 12 Davidi ma gɔ Sooli cicwe dɩm yɩ o daarɩ o kwe o na-kunkolo kʋm tɩ na zɩgɩ tɩ maŋɩ o yuu seeni tɩn, yɩ ba kɛ. Nɔɔn-nɔɔnʋ nan wʋ nɛ-ba. Nɔɔn-nɔɔnʋ dɩ wʋ lwarɩ kʋlʋ na kɩ tɩn. Ba maama maa tigi ba dɔa yɩ ba wʋ zaŋɩ, Baŋa-Wɛ na pɛ ba tiini ba dɔ ba lusi tɩn ŋwaanɩ.
13 Davidi dɩdaanɩ Abisayi ma joori ba tɔgɩ bolo kʋm ba bɛ daa kadoŋ kam nɩ. Ba ma vu ba din piu kʋdoŋ yuu ba zɩgɩ da, yɩ pwələ daga bantʋ dɩ Sooli nɔɔna bam tɩtarɩ laŋa nɩ. 14 Davidi laan ma nii Sooli jar-kərə bam seeni yɩ o tɔɔlɩ o bəŋi Abenɩra o wɩ: «Abenɩra, nmʋ wʋra na? Zaŋɩ n ləri-nɩ!» Abenɩra dɩ ma tɔɔlɩ o ləri o wɩ: «Nmʋ yɩ wɔɔ mʋ yɩ n kɩ sɔɔ kʋntʋ n bəŋi pɛ wʋm?» 15 Davidi ma joori o lǝr-o o wɩ: «Abenɩra, nmʋ daɩ babɩa n dwe Yisɩrayɛlɩ jar-kərə bam maama mʋ na? Bɛɛ mʋ kɩ yɩ n warɩ n pɛ wʋm sɩ n ta n yɩra? Ba ya tu mʋ sɩ ba gʋ n tu wʋm. 16 Nmʋ na kɩ te tɩntʋ tɩn ba lana. Ŋwɩa Tu Baŋa-Wɛ yɩrɩ ŋwaanɩ, nmʋ dɩdaanɩ n kwaga nɔɔna bam maama maŋɩ sɩ á tɩ mʋ, bɛŋwaanɩ á wʋ fɔgɩ á yɩrɩ a tu wʋm Baŋa-Wɛ na kuri tɩn. Laan nan fɔgɩ-na á nii! Pɛ wʋm cicwe dɩm ya na wʋ o yuu seeni tɩn wʋ yən mʋ? Sɩ o na-kunkolo kʋm dɩ bɛ?»
17 Sooli ma lwarɩ Davidi kwǝrǝ kam yɩ o bwe‑o o wɩ: «Amʋ bu Davidi, nmʋ mʋ kʋntʋ na?» Davidi ma lǝr-o o wɩ: «Pɛ, amʋ mʋ kʋntʋ.» 18 O ta ma ta o wɩ: «Amʋ na yɩ n tɩntʋŋnʋ tɩn, bɛ laan nan mʋ kɩ pa nmʋ yɔɔrɩ n parɩ amʋ kʋntʋ sɩ n zəli n ja? A kɩ bɛɛ mʋ a cɔgɩ? 19 Amʋ tu, a loori‑m mʋ sɩ n cəgi a taanɩ dɩntʋ. Kʋ ya na yɩ Baŋa-Wɛ mʋ na pɛ n zəli amʋ tɩntʋ, a tɩɩnɩ nɩ DƖ wʋ́ joŋi pɛɛrɩ a jɩŋa nɩ yɩ DƖ ləni DƖ wʋbʋŋa yam. Sɩ kʋ na yɩ nabiinǝ mʋ kwe amʋ yuu ba magɩ dɩ nmʋ nyɩm, Baŋa-Wɛ wʋ́ pa ba na lɛɛrʋ. Bɛŋwaanɩ, ba fɩn-nɩ ba lɩ a nabaara tɩga kam nɩ, Baŋa-Wɛ na pɛ ka taa yɩ amʋ nyɩm tɩn, yɩ ba daarɩ ba pa a kaagɩ a zʋʋrɩ jwǝ-kaana tɩɩnɩ nɩ. Ba laan maa wɩ: a taa kaanɩ jwǝnǝ. 20 Nan yɩ pa a jana lu ka kɩ vərə tɩga nɩ, yigə yigə dɩdaanɩ tɩga kalʋ na yɩ Baŋa-Wɛ nyɩm tɩn. Amʋ brɩ a yɩ wɔɔ mʋ? Kasɩla kantʋ, mʋ Yisɩrayɛlɩ tiinə pɛ tɔgɩ-nɩ o zəli? Naa a yɩ lugə mʋ yɩ n jɩgɩ-nɩ n zəgi pweeru tɩm nɩ?»
21 Sooli ma ta Davidi o wɩ: «Amʋ bu Davidi, joori n ba amʋ te! Amʋ mʋ kɩ lwarɩm. Amʋ nan daa ba bʋŋɩ sɩ a kɩ-m zʋnnɩ. Bɛŋwaanɩ, n zɩm brɩ nɩ a jɩgɩ lʋnnɩ nmʋ yibiyə nɩ, yɩ n wʋ gʋ-nɩ. Cɩga tɩn, amʋ tʋŋɩ jwərim. A tiini a tusi mʋ.» 22 Davidi daa ta maa wɩ: «Pɛ, nii n cicwe dɩm mʋ tɩntʋ. Tʋŋɩ n nɔn-dʋnnʋ tɩm dɩdʋa sɩ o ba o joŋi o ja o ba o pa‑m. 23 Baŋa-Wɛ mʋ yǝni DƖ bʋrɩ DƖ pa nɔɔnʋ maama dɩ o na jɩgɩ cɩga dɩ wʋ-dɩdʋa te tɩn. Baŋa-Wɛ ya pɛ-nɩ pwələ sɩ a gʋ-m zɩm, yɩ a wʋ kɩ kʋntʋ, nmʋ na yɩ pɛ wʋlʋ DƖ na kuri tɩn ŋwaanɩ. 24 Amʋ zɩm na pɛ n ŋwɩa kam jɩgɩ kuri amʋ yibiyə nɩ tɩn, a loori Wɛ mʋ sɩ amʋ dɩ ŋwɩa kam taa jɩgɩ kuri o yibiyə nɩ sɩ DƖ taa cʋ-nɩ cam dwi maama wʋnɩ.»a
25 Sooli laan ma ta Davidi o wɩ: «Amʋ bu, Baŋa-Wɛ yu-yoŋo taa wʋ n tee nɩ. Nmʋ na kɩ kʋlʋ maama, kʋʋ́ kɩ lam kʋ pa‑m.»
Davidi ma kwe o cwǝŋǝ o maa kɛa. Sooli dɩ ma joori o vu sɔŋɔ.